ខេត្តបន្ទាយមានជ័យ ៖ ថ្លែងក្នុងពិធីចុះត្រួតពិនិត្យលក្ខណៈបច្ចេកទេសយានយន្ត គ្រប់ប្រភេទនៅព្រឹកថ្ងៃទី២០ ខែមករា ឆ្នាំ២០១៧ ដែលស្ថិតនៅចំណុចស្រះឥន្ទតាំ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ លោក គឹម សុវណ្ណ ប្រធានមន្ទីរសាធារណការ និងដឹកជញ្ជូនបានមានប្រសាសន៍ថា ក្រុមគណៈកម្មាចំរុះ មានកំលាំងអាវុធហត្ថដឹកនាំដោយលោកវរៈសេនីយ៍ឯក ស ប៊ុនសឿង មេបញ្ជាការងកងរាជអាវុធហត្ថខេត្តបន្ទាយមានជ័យ នគរបាលចរាចរណ៍ដឹកនាំដោយលោកវរៈសេនីយ៍ទោអ៊ំសុផលស្នងការរងនគរបាលខេត្តបន្ទាយមានជ័យ និងមន្ទីរសាធារណៈការដឹកជញ្ជូន បានបន្តត្រួតពិនិត្យលក្ខណៈបច្ចេកទេសយានយន្តគ្រប់ប្រភេទក្នុងថ្ងៃទី៣០ ខែធ្នូ ឆ្នាំ២០១៦ រហូតមកដល់ថ្ងៃនេះសរុបរថយន្តធំតូចបានចំនួនរថយន្ត៣០៨គ្រឿងរថយន្តតូច៨គ្រឿងនិងរថយន្តធំ៣០០គ្រឿងក្នុងនោះមានរថយន្តទូរីសបានដោះកន្ទុយគ្រោយ៣គ្រឿង ធ្វើកិច្ចសន្យារថយន្តធំបានចំនួន១០៦គ្រឿង កាត់ទ្រុងបានចំនួន១៤គ្រឿង ដោះផ្លូវចេញពីរថយន្តធំបានចំនួន៣គ្រឿង មានរថយន្តត្រឹមត្រូវចំនួន១៧៧គ្រឿង ក្នុងការចុះពិនិត្យនេះបន្តត្រួតពិនិត្យរហូតដល់ខែ ២ ។
លោក គឹម សុវណ្ណ បានមានប្រសាសន៍បន្តទៀតថា កន្លងមកក្រុមគណៈកម្មាធិការចំរុះដឹកនាំដោយលោក អ៊ុំ រាត្រី អភិបាលរងខេត្តបន្ទាយមានជ័យបានចុះត្រួតពិនិត្យយានយន្តមួយចំនួនដែលកែច្នៃខុសលក្ខណៈបច្ចេកទេស ដូចជា តទ្រុង តកន្ទុយ ថែមភ្លៅ ឬកង់ប្រើប្រាស់សឹករេចរិលជាដើមដែលធ្វើឲ្យមានគ្រោះថ្នាក់ចរាចរណ៍ផ្លូវគោកដោយសារការកែច្នៃខុសលក្ខណៈបច្ចេកទេសរបស់យានយន្តធ្វើឲ្យបាត់បង់អាយុជីវិត របួសនិងខូចខាតទ្រព្យសម្បត្តិប្រជាពលរដ្ឋព្រមទាំងបង្កការខូចខាតហេដ្ឋារចនាសម្ព័ន្ធផ្លូវថ្នល់ដោយការដឹកជញ្ជូនលើសកម្រិតកំណត់នេះជាដើម ។
លោក គឹម សុវណ្ណ បានបញ្ជាក់ទៀតថា ការកំណត់ទំហំអតិបរមារបស់យានយន្តក្នុងមាត្រាទី៥៧ច្បាប់ស្តីពីចរាចរណ៍ផ្លូវគោកចុះថ្ងៃទី៩ខែមករាឆ្នាំ២០១៥នេះ ប្រវែងបណ្តោយអតិបរមារបស់រថយន្តមិនត្រូវឲ្យលើសពី១២.២ម៉ែត្រ រថយន្តសណ្តោងសឺមីរ៉ឺម៉កមិនត្រូវឲ្យលើស១៦ម៉ែត្រ រថយន្តសណ្តោងរ៉ឺម៉កមិនត្រូវឲ្យលើសពី១៨ម៉ែត្រ ប្រវែងទទឹងមិនត្រូវឲ្យលើស២.៥ម៉ែត្រ ប្រវែងកំពស់មិនត្រូវឲ្យលើស៤.២ម៉ែត្រ ប្រវែងកំពស់ទ្រុង មិនត្រូវឲ្យលើស០.៥ម៉ែត្រឡើយដាច់ខាត ។
លោក គឹម សុវណ្ណ បានបញ្ជាក់ទៀតថា ប្រសិនបើម្ចាស់យានយន្ត ដែលខុសលក្ខណៈបច្ចេកទេសណាមិនព្រមកែតម្រូវលក្ខណៈបច្ចេកទេស តាមការណែនាំរបស់សមត្ថកិច្ចនោះ ត្រូវរៀបចំសំនុំរឿងបញ្ជូន ទៅព្រះរាជអាជ្ញាអមសាលាដំបូងខេត្តបន្ទាយមានជ័យ ដើម្បីចាត់ការតាមនិធីច្បាប់បានកំណត់ ៕
