ខេត្តប៉ៃលិន ៖ ផ្ទុះមីនGYATA១គ្រាប់ស្លាប់បុរសម្នាក់និងរបួសស្ត្រីម្នាក់ បុគ្គលិកអង្គការ ដោះមីនHALLO ពេលកំពុងរាវរក ហើយដោះខុសបច្ចេកទេស កាលពីវេលាម៉ោង ០៧និង៣០នាទីព្រឹក ថ្ងៃទី១៣ ខែមករា ឆ្នាំ២០១៧ នៅចំណុច អូរតាផៃ ស្ថិតក្នុងភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន។
តាមការឲ្យដឹងពីនគរបាលខេត្តប៉ៃលិនករណីផ្ទុះមីន បណ្តាលឱ្យស្លាប់មនុស្សចំនួន ០១នាក់ និងរងរបួសធ្ងន់ចំនួន ០១នាក់ មាន៖ទី១អ្នកស្លាប់ឈ្មោះ លឿង រស្មី ភេទប្រុស អាយុ ៥៥ឆ្នាំ មុខរបរបុគ្គលិកអង្គការ HALLO រស់នៅភូមិក្រពើជើង ឃុំភ្នំសំពៅ ស្រុកបាណន់ ខេត្តបាត់ដំបង។ទី២ អ្នករបួសធ្ងន់ឈ្មោះ ងុយ ថានី ភេទស្រី អាយុ ២៨ឆ្នាំ មុខរបរបុគ្គលិកអង្គការ HALLO រស់នៅភូមិអូរសំរិល ស្រុកសំឡូតខេត្តបាត់ដំបង។
ហេតុការណ៍ខាងលើនេះ បណ្តាលមកពីឈ្មោះ លឿង រស្មី (ស្លាប់) បានរាវរកឃើញមីនប្រភេទ GYATA រួចក៏ធ្វើការដោះមីន តែធ្វើមិនបានជោគជ័យ បណ្តាលអោយផ្ទុះ រងរបួសរហូតដល់បាត់បង់ជីវិតខ្លួនឯង និងបណ្តាលអោយនារីរងគ្រោះម្នាក់ទៀតឈ្មោះ ងុយ ថានី ដែលធ្វើការរាវរកមីននៅក្បែរគ្នានោះ។
ចំណែកស្ត្រី រងរបួសធ្ងន់ ត្រូវបានឧទ្ធម្ភាគចក្រដឹកយកទៅសង្គោះបន្ទាន់ នៅឯមន្ទីរពេទ្យរាជធានីភ្នំពេញ រីឯសាកសព ត្រូវបានរក្សាទុកនៅទីស្នាក់ការរបស់អង្គការ ដោះមីនHALLO ដើម្បីរងចាំសាច់ញាតិយកទៅធ្វើបុណ្យតាមប្រពៃណី៕
