បាត់ដំបង ៖ ផ្លូវក្នុងក្រុងមានការខូចខាត មិនមានការជួសជុលយូរឆ្នាំមកហើយ រហូតដល់ថ្ងៃទី៣ ខែកញ្ញា ឆ្នាំ ២០១៤ បង្កការគ្រោះថ្នាក់ ដល់អ្នកដំណើរជាច្រើននាក់ ហើយផ្លូវនោះ មានផ្លូវលេខ១០២ចាប់ពីសណ្ឋាគារអាស៊ីដល់ ផ្លូវលេខ ៣ ខាងលិច វិទ្យាល័យព្រះមុនីវង្ស និងផ្លូវលេខ១០៦ចាប់ពីបេនរថយន្ត កាពីតូល ដល់មុខបេនរថយន្តលាងយូអេស ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។
ប្រជាពលរដ្ឋធ្វើដំណើររតាមផ្លូវកាត់ទទឹងលេខ ១០២ ថា ផ្លូវនេះមានទឹកដក់ជង្ហុគ បាយខុម បើកបរម៉ូតូរថយន្ត ជួបការលំបាកខ្លាំង បណ្តាលអោយខ្ទាតទឹកភក់សាចប្រឡាក់ខោអាវ ព្រមទាំងខូចរថយន្តនិងម៉ូតូទៀតផង ។
ប្រជាពលរដ្ឋរស់នៅតាមផ្លូវកាត់ទទឹងលេខ ១០២ ថា ផ្លូវនេះខូចខាតយូរឆ្នាំមកហើយ ដោយសារទឹកជំនន់ និងរថយន្តដឹកជញ្ជូនធ្ងន់ឆ្លងកាត់ នៅដើមឆ្នាំ ២០១៤ ឃើញមានអ្នកមកវាស់វែងដែរ តែមិនឃើញមកជួសជុល ធ្វើអោយពួកគាត់ប្រកប របរលក់ដូរអ្វីមិនបានសោះ ។
តាមប្រភពពីអ្នកផឹកកាហ្វេ នៅចំណុចផ្លូវលេខ ១០៦ វិញថា ផ្លូវនៅមុខបេនរថយន្តលាងយូអេស មានជង្ហុគខ្លាំង អ្នកជិះម៉ូតូឆ្លងកាត់ ដួលជាច្រើននាក់ និងរថយន្តមួយចំនួនបើកមក មិនស្គាល់ភូមិសាស្ត្រ ពេលបើកឆ្លងកាត់ធ្លាក់បោកបែកម៉ាស៊ីននិងរ៉េចង្កូតទៅរកបុកអ្នកជិះម៉ូតូនិងរថន្តដ៏ទៃទៀត ។
គួរណាស់អាជ្ញាធរ ឬមន្ទីរសារធារណៈការ និងដឹកជញ្ជូនជួយពិនិត្យមើលផង ។
ពាក់ព័ន្ធករណីផ្លូវកាត់ទទឹង ២ ខ្សែក្នុងភូមិព្រែកមហាទេព លោក សៀង ឯមវូនស្ហី អភិបាលក្រុងបាត់ដំបង បានអោយដឹងតាមទូរស័ព្ទថា ដោយថវិកាមានកំណត់ និងចាយវាយ អោយត្រូវខ្ទង់សាលាក្រុង បានជ្រើសរើសផ្លូវសំខាន់ៗជួសជុលមុន ។
សាលាក្រុងបានរៀបចំគំរោងស្តារ និងជួសជុលជាង ១៣០ ករណីក្នុងនោះ មានការស្តារប្រព័ន្ធលូ រំដោះទឹកជួសជុលផ្លូវថ្នល់ បំពាក់អំពូលភ្លើងបំភ្លឺផ្លូវជាដើម ។
ចំពោះផ្លូវលេខ១០២ និងផ្លូវជុំវិញសាលាវិទ្យាល័យ ព្រះមុន្នីវង្ស អាជ្ញាធរក្រុងបានរៀបគំរោងជួសជុលរួចហើយ ។ និងគ្រោងបើកការជួសជុលកសាងនឹងធ្វើឡើងចុងឆ្នាំ២០១៤ ។ ចំណែកផ្លូវលេខ១០៦ មុខបេនរថយន្តលាងយូអេសមានជហ្ហុគខ្លាំង អាជ្ញាធរនឹងដឹកគ្រួសទៅចាក់បំពេញ អោយប្រជាពលរដ្ឋបើកបរធ្វើដំណើរអោយបានស្រួលជាងមុន ៕
