ខេត្តកណ្តាល ៖ ជនសង្ស័យមួយក្រុម ជិះម៉ូតូដេញតាមកៀបប្លន់ម៉ូតូរបស់នាយផ្នែក នគរបាលស្រុកស្អាងម្នាក់ ត្រូវបានប្រជាពលរដ្ឋជាច្រើននាក់ ជួយអន្តរាគមន៍ឡោមព័ទ្ធចាប់បាន២នាក់ រួចនាំគ្នាវាយ១ដៃ១ជើងឡើងទ្រោមខ្លួនទើបប្រគល់ឲ្យនគរបាល ដោយស្ថានភាពជនសង្ស័យរងរបួសធ្ងន់ធ្ងរទើបនគរបាលឲ្យក្រុមគ្រួសារមកទទួលយកទៅព្យាបាលក្រោយបញ្ជូនដល់មន្ទីរពេទ្យក៏ស្លាប់ម្នាក់ និងម្នាក់រងរបួសធ្ងន់ ។
ហេតុការនេះកើតឡើងកាលពីម៉ោង១៧និង៤៥នាទីថ្ងៃទី២១ខែតុលា ឆ្នាំ២០១៦នៅចំណុចផ្លូវលំបត់ចូលវត្តធន់មន្ត ភូមិស្វាយតានី ឃុំព្រែកគយ ស្រុកស្អាង ខេត្តកណ្តាល។
មន្ត្រីនគរបាលស្រុកស្អាងបានឲ្យដឹងថា ជនសង្ស័យដែលស្លាប់នោះទីឈ្មោះ ចំរើន សីហា ភេទប្ររុសអាយុ២៦ឆ្នាំ និងម្នាក់ទៀតឈ្មោះ ទិត លាភ ប្រុសអាយុ២២ឆ្នាំរបួសធ្ងន់។
ចំណែកនគរបាលរងគ្រោះនោះទី១ឈ្មោះ ឆៃ សុីណា ភេទប្រុសអាយុ៣៣ឆ្នាំមានមុខរបរជានាយផ្នែកនគរបាលស្រុកស្អាង រស់នៅភូមិព្រែកថ្មី ឃុំទឹកវិល ស្រុកស្អាង ទី២ឈ្មោះ ភក្តី វិទូ ភេទប្រុស អាយុ៣៣ឆ្នាំមានមុុខរបរជាអធិការរងនគរបាលស្រុកស្អាង រស់នៅភូមិក្នុងព្រែក ឃុំព្រែកគយ ស្រុកស្អាង ទី៣ ឈ្មោះ ឃាង សុងថេង ភេទប្រុសអាយុ៣១ឆ្នាំ មានមុខរបរជានាយផ្នែកនគរបាលស្រុកស្អាង រស់នៅភូមិព្រែកអុងប៉ាង ឃុំទឹកវិល ស្រុកស្អាង ។
បើយោងតាមប្រជាពលរដ្ឋឈ្មោះ ច្រែស ឋាន ភេទប្រុសអាយុ៦០ឆ្នាំ រស់នៅក្នុងភូមិស្វាយតានី ឃុំព្រែកគយ ស្រុកស្អាង ខេត្តកណ្តាល បាននិយាយប្រាប់អ្នកយកព័ត៌មានយើងថា នៅ មុនពេលកើតហេតុរូបគាត់បានធ្វើដំណើរតាមផ្លូវលំទៅវត្តធន់មន្តក្នុងគោលបំណងទៅបុណ្យពេលនោះមិនដឹងរឿងអ្វីកើតឡើងទេស្រាប់តែឃើញឈ្មោះ ឆៃ សុីណា ជានគរបាលបានផ្តួលម៉ូតូ រួចឃើញជនសង្ស័យទាំងពីរនាក់ដើរសំដៅចូលទៅរកធ្វើឲ្យឈ្មោះសុីណាភ័យខ្លាចទើបស្រែកថាចោរៗភ្លាមនោះប្រជាពលរដ្ឋបានចេញមកព្រោងព្រាតជួយអន្តរាគមន៍ចាប់បានជនសង្ស័យ២នាក់ និងបក្ខពួកមួយចំនួនទៀតរត់គេចខ្លួន រួចប្រជាពលរដ្ឋចោមរោមវាយ១ដៃ១ជើងម្នាក់ឡើងទ្រោមខ្លួនបន្តិចក្រោយ មកបានឃើញនគរបាល២នាក់ទៀតទៅដល់រួចឃាត់ខ្លួនជនសង្ស័យទាំង២នាំមកកាន់អធិការ ប៉ុន្តែពេលឌុបចេញមកនោះ ប្រជាពលរដ្ឋបានដេញតាមវាយនៅលើម៉ូតូបន្ថែមទៀតឡើងស្ទះផ្លូវទំរាំដឹកចេញផុត។
ចំណែកនគរបាលបានឲ្យដែរថា ក្រោយពីឃាត់ខ្លួននាំមកកាន់អធិការ ហើយនោះដោយពិនិត្យឃើញស្ថានភាពជនរងគ្រោះ មានរបួសធ្ងន់ទើបលោក សេង សុជាតិ អធិការនគរបាលស្រុកស្អាងបានបញ្ជាឲ្យនាយផ្នែកព្រហ្មទណ្ឌទំនាក់ទំនងទៅក្រុមគ្រួសារ ឲ្យមកទទួលយកទៅព្យាបាលសិនរហូតដល់ម៉ោង១៩និង២៥នាទីទើបក្រុមគ្រួសារជនសង្ស័យមកដល់រួចទទួលយកជនសង្ស័យទៅកាន់មន្ទីរពេទ្យជ័យជំនះក្រុងតាខ្មៅ ខេត្តកណ្តាល ដើម្បីព្យាបាលលុះដល់ព្រឹកថ្ងៃទី២២ខែតុលា ឆ្នាំ២០១៦ នគរបាលបានទទួលព័ត៌មានថាជនសង្ស័យម្នាក់ឈ្មោះ ចំរើន សីហា ស្លាប់នៅមន្ទីរពេទ្យ ចំណែកម្នាក់ទៀតរងរបួសកំពុងសម្រាកព្យាបាល ។
ភ្លាមនោះកម្លាំងនគរស្រុកស្អាងបានមកសហការជាមួយនគរបាលខេត្តទៅពិនិត្យសាកសពឃើញថាសាកសពមានស្នាមជាំលើដើមទ្រូង និងមានស្នាមធ្លាប់វះកាត់ពោះផងដែរ បើតាមក្រុមគ្រួសារអះអាងថាសាកសពធ្លាប់វះកាត់តពោះវៀនរហូតដល់ទៅ២កំណាត់ ដូច្នេះ ទំនងជាអាចពលរដ្ឋទាត់ធាក់ត្រូវចំស្នាមរបួសចាស់ទើបបណ្តាលឲ្យរបួសចាស់សើរើរហូតដល់ស្លាប់បែបនេះ ។
បច្ចុប្បន្នសាកសពត្រូវក្រុមគ្រួសារដឹកបញ្ជូនទៅកាន់ស្រុកកំណើតដើម្បីធ្វើបុណ្យតាមប្រពៃណី៕
