ប្រទេសថៃ ៖ ពូជពង្សវង់ត្រកូលរបស់មេក្លោងគ្រឿងញៀនមួយសំបុក ដែលមានគ្នីគ្នាចំនួន១៥នាក់ ដែលពួកគេកំពុងរស់នៅសោយសុខក្នុងភាគខាងជើងនៃប្រទេសថៃត្រូវបានសមត្ថកិច្ចជំនាញធ្វើការឡោមព័ទ្ធដោយក្រសោបបានទាំងអស់ រួមជាមួយនឹង
គ្រឿងញៀនប្រភេទម៉ាទឹកកកទម្ងន់ ២០ គីឡូក្រាម និងលុយចំនួន ១១ លានបាត ព្រមទាំងអាវុធគ្រប់ប្រភេទជាង ១០ដើមផងដែរ ។
នៅថ្ងៃទី១១ ខែតុលា ឆ្នាំ២០១៦ វេលាម៉ោង២ រសៀល កំលាំងនាយកដ្ឋានតម្រួតប្រឆាំងគ្រឿងញៀន ដែលដឹកនាំដោយលោក ផនឆៃ ចំរើនវង់ បានធ្វើការសហការជាមួយកំលាំងតម្រួតព្រំដែនលេខ ៣៣៤ សរុបចំនួន ២០០ នាក់ បានចេញប្រតិបត្តិការ
ទៅកាន់ព្រំដែនភាគខាងជើងនៃប្រទេសថៃ គឺស្ថិតត្រង់ចំណុចស្ថានីយ៍ប្រេងឥន្ធនៈកាល់តិចក្នុងភូមិ១២ ឃុំថាតន ស្រុកម៉ែអាយ ខេត្តឈៀងម៉ៃ ប្រទេសថៃ បានធ្វើការបិទច្រកចេញចូលទាំងអស់ ដោយបានឡោមព័ទ្ធលំនៅដ្ឋានមួយកន្លែងជាកម្មសិទ្ធរបស់ត្រកូល
ឡៅតា សែនលី ដែលជាស្តេចក្រាញ់រកសុីគ្រឿងញៀនដ៏ធំនៅក្នុងប្រទេសថៃ ។នៅក្នុងកិច្ចប្រតិបត្តិការនេះ កំលាំងជំនាញនៃនាយកដ្ឋានតម្រួតប្រឆាំងគ្រឿងញៀនបានធ្វើការឃាត់ខ្លួនមនុស្សចំនួន១៥នាក់ ដែលជាសាច់ញាតិ និងវង់ត្រកូលនៃក្រុមរកសុីជួញដូរគ្រឿងញៀនឆ្លងដែន ព្រមទាំងបានឆែកឆេររកឃើញគ្រឿងញៀនប្រភេទ
ម៉ាទឹកកកទម្ងន់ ២០ គីឡូក្រាម ប្រាក់បាតចំនួន ១១លានបាត និងអាវុធ វែង ខ្លីចំនួនជាង១០ដើម ផងដែរ ។
លោក ផនឆៃ ចំរើនវង់ បានលើកឡើងថា ក្នុងកិច្ចប្រតិបត្តិការនេះ សមត្ថកិច្ចត្រូវការរកមុខជនសង្ស័យដែលសំខាន់ជាងគេគឺ ១ ឡៅតា សែនលី ២ វិចាន សែនលី និង៣ ត្រូវជាប្អូនប្រុសឈ្មោះ ឡៅតា ដែលជនទាំង៣នាក់នេះគឺជាមនុស្សសំខាន់ដែលលោកបានរៀបចំ
ផែនការចាប់ខ្លួនអស់រយៈពេល ២ឆ្នាំមកហើយ ដោយទើបតែពេលនេះមានឱកាសហុចអោយគឺកំលាំងបានប្រមូលគ្មានសល់ ។
នៅពេលនោះដែរ កំលាំងទាំង២០០នាក់ នៅតែធ្វើការបិទផ្លូវទាំងអស់ដើម្បីបន្តការរុករកនូវគ្រឿងញៀនបន្ថែមទៀត ព្រមទាំងមានការបញ្ជាក់ពីតុលាការថា ទ្រព្យសម្បត្តិទាំងអស់ដែលជារបស់ត្រកូល ឡៅតា សែនលី ត្រូវធ្វើការដកហូតទុកជាសម្បត្តិរដ្ឋ ដោយសារតែ
ទ្រព្យសម្បត្តិទាំងនេះអាចបានមកពីការជួញដូរគ្រឿងញៀនរយៈពេលកន្លងមក ដោយបច្ចុប្បន្នជនសង្ស័យទាំងអស់ត្រូវបានកំលាំងជំនាញ នាំយកទៅកាន់អង្គភាពដើម្បីសាកសួរបន្ត និងចាត់វិធានការតាមផ្លូវច្បាប់ ៕
