ភ្នំពេញ៖ សពបុរសម្នាក់ត្រូវបានគេប្រទះឃើញ ស្លាប់អណ្តែតក្នុងទឹកស្រះក្រោយផ្ទះប្រជាពលរដ្ឋ។ ហេតុការណ៍នេះបង្ករអោយមានការភ្ញាក់ផ្អើលកាលពីវេលាម៉ោង ៧ ព្រឹកថ្ងៃទី ១០ ខែតុលា ឆ្នាំ ២០១៦ ស្ថិតនៅក្នុងភូមិក្រាំងក្រូច សង្កាត់ទៀន ខណ្ឌដង្កោ។
បើតាមសម្ដីនារីម្នាក់ឈ្មោះ ជា ស្រីធំ(ប្រពន្ធសព) អាយុ ២៨ ឆ្នាំ មុខរបរនៅផ្ទះបានប្រាប់អោយដឹងថាប្ដីរបស់គាត់ដែលបានស្លាប់ឈ្មោះ វិចិត្រ អាយុ៥៣ មានមុខរបរជាអ្នកអូសរទេស នៅផ្សារដើមគរ គាត់បានបន្ដទៀតថាប្ដីរបស់គាត់ជាធម្មតាមិនសូវមកផ្ទះទេ ២ ឬ ៣ ថ្ងៃទើបចូលផ្ទះម្ដង តែប៉ុន្មានថ្ងៃនេះមិនឃើញគាត់មកបែជាមិននឹកស្មានថាគាត់ស្លាប់ចឹងសោះ។
ក្នុងនោះផងដែរស្ដ្រីម្នាក់ឈ្មោះស៊ុន មិនា ភេទស្រី អាយុ ២៧ ឆ្នាំ ស្នាក់នៅកន្លែងកើតហេតុខាងលើ បានប្រាប់បញ្ជាក់បន្ថែមអោយដឹងថា មុនពេលកើតហេតុខ្លួនបានដើរទៅងូតទឹកស្រះដែលនៅក្រោយផ្ទះប្រមាណជា ២៥០ម៉ែត្រពីផ្ទះ ខណៈដែរទៅដល់នាងប្រទះឃើញសពអណ្តែតនៅក្នុងស្រះ ភ្លាមនោះនាងស្មានថាជាតុត្តកាហើយខ្លួនមកប្រាប់អ្នកភូមិអោយជួយស្រងចេញពីស្រះ ក្រោយពេលអ្នកភូមិនាំគ្នាទៅមើលទើបដឹងថានោះមិនមែនជាតុត្តកានោះទេ ជាសពមនុស្សស្លាប់អណ្ដែតទឹកទេតើ ភ្លាមនោះបងប្អូនប្រជាពលរដ្ឋបានរាយការណ៍ដល់ខាងសមត្ថកិច្ច។
ក្រោយពីធ្វើកោសល្យវិច្ឆ័យរួចមកខាងសមត្ថកិច្ចជំនាញបានសន្និដា្ឋនថាបុរសខាងលើពិតជាស្លាប់ដោសារលង់ទឹកពិតប្រាដកមែន។ បន្ទាប់ពីធ្វើកោលសល្យវិច្ឆ័យចប់រួចរាល់ខាងសមត្ថកិច្ចបានធ្វើលិខិតប្រគល់សពដល់ក្រុមគ្រួសារ នឹង សាច់ញ្ញាតិដើម្បីយកសពទៅធ្វើបុណ្យតាមប្រពៃណី។
