ខេត្តបន្ទាយមានជ័យ ៖ ដឹកនាំដោយអនុសេនីយ៍ឯក អោក សំណុក នាយរងការិយាល័យ សហការជាមួយកម្លាំងនគរបាលប៉ុស្តិ៍ឃុំអូរបីជាន់ និងកម្លាំងនគរបាលប៉ុស្តិ៍ការពារព្រំដែនគោកលេខ៩១១ បានធ្វើការទប់ស្កាត់ ឃាត់ពលករខ្មែរចំនួន១៣៧នាក់ ស្រី ៦៣នាក់ បំរុងឆ្លងដែនខុសច្បាប់ ទៅរកការងារធ្វើនៅប្រទេសថៃ កាលពីវេលាម៉ោង៩ ព្រឹក ថ្ងៃទី០៤ ខែតុលា ឆ្នាំ២០១៦ ក្នុងភូមិសាស្ត្រស្រុកអូរជ្រៅ ខេត្តបន្ទាយមានជ័យ ។
បើតាមការរៀបរាប់ពីពលករទាំងនោះបានឲ្យដឹងថា ៖ ពួកគាត់ទៅរកការងារធ្វើនៅប្រទេសថៃនេះ គឺទៅដោយចិត្តខ្លួនឯង មិនមានមេខ្សល់នោះទេ ហើយការទៅនេះក៏ដោយសារតែពួកគាត់រួចពីធ្វើស្រែចម្ការ ហើយគ្មានការងារធ្វើក៏នាំគ្នាទៅធ្វើចំណាកស្រុកឆ្លងដែនទៅប្រទេសថៃ គឺដើម្បីទៅធ្វើកម្មករដាំដំឡូងមី ដាំពោត និងអំពៅ នៅខេត្តស្រះកែវ និងខេត្តត្រាត ចំពោះការទៅនេះគឺគាត់ ឆ្លងដែនតាមច្រកអូរបីជាន់ ច្រកក្តឹបថ្ម និងច្រកចំការគ ដោយបង់ឲ្យយោធាប្រចាំការនៅតាមនីមួយៗនោះ ពី៥ពាន់ទៅ១ម៉ឺនរៀល ទើបអនុញាតិឲ្យពួកគាត់ទៅ។
លោកវរសេនីយ៍ត្រី ឡាយ គឹមលួន នាយការិយាល័យនគរបាលប្រឆាំងការជួញដូរ និងការពារអនីតិជន បានបញ្ជាក់ផងដែរថា៖ ពលករទាំង១៣៧នាក់ មានស្រី ៦៣នាក់ ក្នុងនោះគឺពួកគាត់មកពីខេត្តបន្ទាយមានជ័យ ចំនួន៦២នាក់ ស្រី២៩នាក់, ខេត្តកំពង់ធំ ចំនួន២៩នាក់ ស្រី១៣នាក់ និងខេត្តសៀមរាប ចំនួន៤៦នាក់ ស្រី២១នាក់។
ពលករទាំងនេះត្រូវបានធ្វើការអប់រំណែនាំពីបញ្ហាប្រឈមនានាចំពោះការធ្វើចំណាកស្រុកខុសច្បាប់ រួចអោយវិលត្រឡប់ទៅស្រុកកំណើតវិញ និងធ្វើកិច្ចសន្យាឲ្យគាត់វិលត្រឡប់ទៅលំនៅដ្ឋានវិញ ដើម្បីទៅធ្វើឯកសារត្រឹមត្រូវតាមច្បាប់៕
