ខេត្តព្រះវិហារ ៖ កម្លាំងកងរាជអាវុធហត្ថស្រុកជាំក្សាន្ត ធ្វើការឃាត់ខ្លួនបុរសសង្ស័យម្នាក់នៅផ្ទះ និងដកហូតបានថ្នាំញៀនម៉ាទឹកកក ចំនួន ២២កញ្ចប់ និងថ្នាំញៀនយ៉ាម៉ា ចំនួន ១៨គ្រាប់ និងសម្ភារ:មួយចំនួនទៀត កាលពីវេលាម៉ោង១៣ និង៣០នាទី ថ្ងៃទី០៥ ខែតុលា ឆ្នាំ២០១៦ ដែលស្ថិតនៅចំណុច ភូមិឈើទាលគង ឃុំជាំក្សាន្ត ស្រុកជាំក្សាន្ត ខេត្តព្រះវិហារ។
បើតាមប្រភពព័ត៌មានពីលោក ឧត្តមសេនីយ៍ត្រី កង សៅគុណ មេបញ្ជាការ កងរាជអាវុធហត្ថខេត្តព្រះវិហារ បានថ្លែងប្រាប់ភ្នាក់ងារព័ត៌មានឱ្យដឹងថា បុរសជនសង្ស័យដែលត្រូវកម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ កៅ សុង ហៅ ចឹក អាយុ៥០ឆ្នាំ មុខរបរមិនពិតប្រាកដ រស់នៅភូមិឃុំខាងលើ។
លោកឧត្តមសេនីយ៍ត្រី បានបញ្ជាក់បន្តឱ្យដឹងថាទៀតថា ការឃាត់ខ្លួននេះ គឺធ្វើទៅបានដោយមានការ សហការដ៏ល្អរបស់កម្លាំងមូលដ្ឋានកងរាជអាវុធហត្ថស្រុកជាំក្សាន្ត ដែលដឹកនាំដោយលោក វរសេនីយ៍ត្រី ពេជ្រ សុភី មេបញ្ជាការមូលដ្ឋាន បានធ្វើការតាមដាននូវសកម្មភាព របស់ជនសង្ស័យខាងលើជាយូរមកហើយ។
លោកឧត្តមសេនីយ៍ត្រី បានបញ្ជាក់អោយដឹងទៀតថា ក្នុងប្រតិបត្តិការនោះផងដែរ កម្លាំងក៏បានធ្វើការចាប់យកវត្ថុតាង មួយចំនួនពីជនសង្ស័យរួមមាន៖ ០១. ថ្នាំញៀនប្រភេទម៉ាទឹកកក ចំនួន២២កញ្ចប់ ០២. ថ្នាំញៀនប្រភេទ មេតំហ្វេតាមីនគ្រាប់ ចំនួន១៨គ្រាប់, ០៣ ទូរស័ព្ទ ចំនួន០១គ្រឿង ០៤. លុយខ្មែរ ៧០.០០០រៀល និងសម្ភារៈសម្រាប់វេចខ្ចប់គ្រឿងញៀនមួយចំនួនទៀត។
បច្ចុប្បន្ន ជនសង្ស័យ រួមជាមួយនឹងវត្ថុតាង ត្រូវបានកម្លាំងមូលដ្ឋានកងរាជអាវុធហត្ថស្រុកជាំក្សាន្ត កំពុងកសាងសំណុំរឿង បញ្ចូនមកបញ្ជាការដ្ឋានខេត្តព្រះវិហារ ដើម្បីចាត់ការបន្តតាមនីតិវិធីច្បាប់៕
