បាត់ដំបង ៖ បុរសម្នាក់ ដែលជាតៃកុង រថយន្តលុចស៊ីស ៥៧០ ដែលគេសង្ស័យរថយន្តគេចពន្ធ បានស្លាប់ភ្លាមៗ នៅនឹងកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍ បើកបុក បញ្ច្រាស់ទិសគ្នា កាលពីវេលាម៉ោង ១៥ និង ៣០ នាទី ថ្ងៃទី២៦ ខែសីហា ឆ្នាំ២០១៤ លើកំណាត់ផ្លូវជាតិ៥៧ អាចំណុចភូមិ ឃុំស្តៅស្រុករតនៈមណ្ឌល ខេត្តបាត់ដំបង ។
សាក្សីបានប្រាប់សមត្ថកិច្ច ថាមុនពេលកើតហេតុរថយន្តក្រុងដឹកសិស្ស និស្សិត បើកបរពីកើតទៅលិច(ពីបាត់ដំបងទៅខេត្តប៉ៃលិន) មកដល់ចំណុចកើតហេតុ ស្រាប់តែរថយន្តលុចស៊ីស៥៧០បានបើកលឿនបញ្ច្រាស់ទិសគ្នា (ពីខេត្តប៉ៃលិនទៅខេត្តបាត់ដំបង) បានរ៉េចង្កូតចូលបុកខាងស្តាំរថយន្តក្រុង ពេញទំហឹង បណ្តាលអោយអ្នកបើកបររថយន្តលុចស៊ីសស្លាប់ ។ ភ្លាមនោះ អ្នកជិះរថយន្តក្រុងទាំងអស់ឡើងកាន់រថយន្តមួយទៀតយ៉ាងប្រញ៉ាប់ប្រញាល់ទៅអស់តែម្តង។
តាមប្រភពសមត្ថកិច្ចចរាចរណ៍បានអោយដឹងថា ជនរងគ្រោះស្លាប់មានឈ្មោះ ប៉ាង ប៉ោង អាយុ៣៦ឆ្នាំមានទីលំនៅភូមិសំណាញ់ឃុំភ្នំសំពៅស្រុកបាណន់ ខេត្តបាត់ដំបង ។ ជនរងគ្រោះបើកបររថយន្តលុចស៊ីស៥៧០ ពណ៌ស គ្មានស្លាកលេខ ។ ចំណែករថយន្តក្រុងរបស់ក្រុមហ៊ុនណាណារីពាក់ស្លាកលេខភ្នំពេញ 3B6533 ដឹកនិស្សិតទស្សនៈកិច្ច ។
សមត្ថកិច្ចបានបញ្ជាក់ថា ក្រោយពីការវាស់វែងឃើញថា រថយន្តលុចស៊ីសបានជ្រុលចង្កូតចូលខាងស្តាំរថយន្តក្រុងប្រាកដមែន ហើយឧប្បត្តិហេតុនេះ ប្រហែលការបើកបរលឿននិងមេឃភ្លៀងមើលផ្លូវមិនឃើញ ឬចាប់ហ្វ្រាំងមិនជាប់ ទើបជ្រុលចង្កូតទៅបុករថយន្តបញ្ច្រាស់គ្នាយ៉ាងខ្លាំងបែបនេះ ។ រថយន្តទាំង២គ្រឿងត្រូវដឹកជញ្ជូនទៅកាន់ការិយាល័យចរាចរណ៍ផ្លូវគោកខេត្ត ហើយសពជនរងគ្រោះប្រគល់ជូនសាច់ញាតិយកធ្វើបុណ្យតាមប្រពៃណី ។
អ្នកឈរមើលគ្រោះថ្នាក់ចរាចរណ៍ដ៏រន្ធត់នេះដាក់ការសន្និដ្ឋានថា រថយន្តទំនើប គ្មានស្លាកលេខនេះ សង្ស័យគេចពន្ធនាំចូលយកមកលក់នៅខេត្តបាត់ដំបង ។
ពាក់ព័ន្ធករណីនេះ អ្នកយកព័ត៌មានបានធ្វើការទំនាក់ទំនងជាមួយ លោក លឹម សម្បត្តិ ប្រធានស្នាក់ការគយច្រកទ្វារព្រំខេត្តប៉ៃលិន និងលោក ចាន់ សំបូរ អនុប្រធានសាខាគយ និងរដ្ឋាករខេត្តបាត់ដំបងមិនលើកទូរស័ព្ទដើម្បីបំភ្លឺថា តើការសង្ស័យរបស់មហាជនថា រថយន្តគេចពន្ធពិតឬមិនពិត ព្រោះរថយន្តនេះថ្មី ហើយគ្មានស្លាកលេខ ៕
