ករណីគ្រោះថ្នាក់ចរាចររថយន្តស៊េរីទំនើបឆ្នាំ២០១៦ បុកអ្នកជិះកង់ស្លាប់ម្នាក់ នៅស្រុកលើកដែក ខេត្តកណ្ដាល កាលពីរសៀលថ្ងៃទី៥ ខែកញ្ញា កន្លងទៅ ដែលធ្វើឲ្យអតីតអ្នកនាំពាក្យអយ្យការអមសាលាដំបូងខេត្តកណ្ដាល លោក ឯក ស៊ុនរស្មី ត្រូវបានលោក លឹម សុគន្ថា ជាព្រះរាជអាជ្ញា ផ្លាស់ប្ដូរចេញនោះ ពេលនេះលេចចេញព័ត៌មានមិនប្រក្រតីមួយចំនួន ។
ប្រភពព័ត៌មានច្បាស់ការណ៍សុំមិនបញ្ចេញឈ្មោះ បញ្ជាក់ថា ពិតជាមានការបញ្ជាឲ្យដោះលែងជនបង្កប្រាកដមែន ។ ប៉ុន្ដែក្រោយការផ្សព្វផ្សាយរបស់បណ្ដាញសារព័ត៌មានថា មានការដោះលែងមិនបញ្ជូនមកតុលាការ នោះ ក៏មានការកោះហៅឃាត់ខ្លួនបញ្ជូនមកតុលាការវិញ ។ ចំណុចសំខាន់មួយទៀត គឺ ការបញ្ជូនជនបង្កមកតុលាការគឺខុសនីតិវិធីទាំងស្រុង ។ ជនបង្កត្រូវបានឃាត់ខ្លួនតាំងពីរសៀលថ្ងៃទី៥ ខែកញ្ញា តែដល់វេលាម៉ោង១១និង៣០នាទី ថ្ងៃទី៩ ខែកញ្ញា ទើបសំណុំរឿងនិងជនបង្ក ត្រូវបានចុះលេខសំណុំរឿងនៅអយ្យការអមសាលាដំបូងខេត្តកណ្ដាល ហើយបច្ចុប្បន្នជនបង្កត្រូវបានឃុំខ្លួនហើយ ។
មន្ត្រីជាន់ខ្ពស់ស្ថាប័នអយ្យការខេត្តកណ្ដាលមួយរូប និយាយថា អ្នកសារព័ត៌មានមើលឃើញតែភាពខ្មៅកង្វក់ក្នុងស្ថាប័នអយ្យការខេត្តកណ្ដាល ហើយបានផ្សព្វផ្សាយព័ត៌មានដែលជាការដាក់សម្ពាធលើស្ថាប័នតុលាការ ។
ចំណុចនេះ អ្នកសារព័ត៌មាន សូមឆ្លើយតបវិញថា សារព័ត៌មានត្រូវបានចាត់ទុកថាជាអំណាចទី៤ ដែលគ្មានចែងក្នុងរដ្ឋធម្មនុញ្ញឡើយ លើកលែងអំណាចនីតិបញ្ញត្តិ នីតិប្រតិបត្តិ និង អំណាចយុត្តាធិការ ( អំណាចតុលាការ ) ។
អ្នកសារព័ត៌មានមានវិជ្ជាជីវៈបានចូលរួមចំណែកយ៉ាងច្រើនក្នុងការជួយសង្គម ពិសេសការរិះគន់ក្នុងន័យស្ថាបនា ហើយការអាចបង្អាក់នូវការប៉ុនប៉ងប្រព្រឹត្តអំពើពុករលួយ ផងដែរ ៕
