បុរសជាសន្តិសុខម្នាក់ មិនដឹងថាមានវិបត្តអ្វី រហូតដោះស្រាយមិនចេញ ហើយធ្វើអត្តឃាត ដោយលោតពីផ្ទះសម្លាប់ខ្លួនពីលើផ្ទះ ឬក៏ត្រូវមិត្តភក្ដិម្នាក់ទៀត ដែលផឹកស៊ីជាមួយគ្នា ច្រានទម្លាក់នោះទេ ប៉ុន្តែក្រោយពីឮស្នូរធ្លាក់មកដី អ្នកជិតខាងបាននាំគ្នា រត់ទៅមើលស្រាប់តែប្រទះឃើញ ដេកស្លាប់នៅក្នុងថ្លុក ឈាមបាត់ទៅហើយ ចំណែកមិត្តភក្ដិដែលផឹកស៊ីជាមួយគ្នានោះ ក៏បានគេចខ្លួនបាត់ស្រមោល។
ហេតុការណ៏នោះ បានបង្កឲ្យមានការភ្ញាក់ផ្អើល កាលពីវេលាថ្ងៃត្រង់ថ្ងៃទី២១ ខែកញ្ញា ឆ្នាំ២០១៦ នៅចំណុចខាងក្រោយផ្សារជម្ពូវ័ន សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា បុរសនោះ ឈ្មោះសិត រតនា ហៅឆាំរតនា អាយុ៣៦ឆ្នាំមុខរបរសន្តិសុខក្រុមហ៊ុនSSY ស្នាក់នៅបន្ទប់ជួល កើតហេតុខាងលើមានប្រពន្ធឈ្មោះ វ៉ិត ទូច អាយុ២៨ឆ្នាំមុខរបររោងចក្រ កាត់ដេរ។
នៅមុនពេលកើតហេតុ ខណៈពេលត្រឡប់មកពីយាម នៅរោងចក្រ ពេលយប់វិញ បុរសនោះបាន នាំមិត្តភក្ដិម្នាក់ ទៅជាមួយដែរ និងបាននាំគ្នាទិញស្រាបៀរទៅផឹកជាមួយគ្នានៅ រានហាលមុខបន្ទប់ជាន់ទី១ ចំណែកប្រពន្ធទៅធ្វើការរោងចក្របាត់។ លុះក្រោយមកមិនមាននរណាម្នាក់បានដឹងថា មានរឿងអ្វីកើតឡើង នោះឡើយ ស្រាប់តែឮស្នូរធ្លាក់មកក្រោម ហើយអ្នកជិតខាង បាននាំគ្នារត់ទៅមើល បានឃើញបុរសនោះដេក ស្លាប់ផ្កាប់មុខ នៅក្នុងថ្លុកឈាម ក្នុងស្ថានភាពរបួសបែកក្បាលបាត់ទៅហើយ។
ប្រភពបន្តថា ក្រោយពេលកើតហេតុ មិត្តភក្ដិដែលផឹកស៊ី ជាមួយនោះ បានគេចខ្លួនបាត់ស្រមោល ដោយមិនដឹងថា ការស្លាប់របស់ ជនរងគ្រោះនេះ មានការជាប់ពាក់ព័ន្ធជាមួយនិង ជនម្នាក់នោះ ឬក៏ជនរង គ្រោះមានវិបត្តិផ្លូវចិត្តហើយលោតសម្លាប់ខ្លួននោះឡើយ បន្ទាប់មកគេបានទូរស័ព្ទប្រាប់ប្រពន្ធឲ្យដឹង ហើយនាងបាន ចេញពីរោងចក្រទៅមើល និងយំសោកបោកខ្លួនដូចសត្វអក ពេលឃើញសពប្ដី។
ចំណែកប៉ូលិសមូលដ្ឋានបានចុះទៅកាន់ទីនោះ ធ្វើការពិនិត្យកោសល្យវិច័យ និងកំពុងធ្វើការស្រាវជ្រាវ រកមូលហេតុដែលនាំឲ្យជនរងគ្រោះធ្លាក់ពីលើផ្ទះនោះហើយ៕
