ភ្នំពេញ ៖ បុរសជាប្ដី ដោយសារខ្លួនឯងខូចខិលខ្លាំងពេក ដូចជាលេងល្បែងស៊ីសងផឹកស៊ីស្រវឹង និងមានរឿងជា ច្រើនទៀត ដែលស្ត្រីជាប្រពន្ធភាគច្រើនមិនអាចទទួលយកបាន ប៉ុន្តែប្រពន្ធរបស់គាត់ ហាក់មិនដាច់ចិត្តជាមួយប្ដី ខ្លួននោះទេ ដល់ប្រពន្ធមិនខ្វល់ពីរឿងនេះ បែរជាខ្លួនឯងខ្វាយខ្វល់ទៅវិញ ពេលផឹកស៊ីស្រវឹងជាមួយមិត្តភក្ដិ បែកគំនិតឲ្យមិត្តភក្ដិខ្លួនលួងលោមប្រពន្ធសុំស្នេហ៍ ដោយខ្លួនឯងចាំលបស្ដាប់ពីខាងក្រៅផ្ទះ។
បន្ទាប់ពីលបស្ដាប់មិនឮគេនិយាយគ្នា ពោលគឺឃើញតែគេអង្គុយជិតគ្នាក៏ស្ទុះមកវាយប្រពន្ធ រហូតប្រពន្ធដឹងថា ជាគម្រោងរបស់ប្ដីចង់សាកចិត្ត ក៏សុំបែកផ្លូវគ្នាតែម្ដង។ ហេតុការណ៍នេះបានកើតឡើង កាលពីវេលាម៉ោង ១០និង៣០នាទីយប់ថ្ងៃទី១៥ ខែកញ្ញា ឆ្នាំ២០១៦ស្ថិតនៅផ្ទះជួលភូមិត្រពាំងរំចេក សង្កាត់ចោមចៅ ខណ្ឌពោធិ៍សែនជ័យ។
បុរសជាប្ដីមានឈ្មោះ ទ្បេង វុធ អាយុ៣១ឆ្នាំ មុខរបរកម្មករសំណង់ ស្នាក់នៅផ្ទះជួល ភូមិកើតហេតុខាងលើ ដោយឡែកស្ដ្រីរងគ្រោះជាប្រពន្ធ សុំមិនបញ្ចេញឈ្មោះទេ និងមានកូនប្រុសអាយុជាងមួយឆ្នាំ។
តាមប្រភពព័ត៌មានពីនារីរងគ្រោះបាននិយាយថា មុនពេលកើតហេតុប្ដីរបស់នាងបាននាំមិត្តភក្ដិម្នាក់ មកផឹកស៊ី នៅក្នុងបន្ទប់ជួលរបស់នាង ហើយដោយផឹកស៊ីស្រវឹងស្រឿងៗប្ដីរបស់គាត់បាននិយាយគ្នាជាមួយមិត្តភក្ដិគាត់ថា ឲ្យមិត្តភក្ដិម្នាក់នោះលួងលោមជាមួយប្រពន្ធដើម្បីបង្កើតសេ្នហាត្រីកោណជាការសាកចិត្តប្រពន្ធខ្លួនថាតើប្រពន្ធនេះ នៅតែមានចិត្តស្មោះនឹងខ្លួនឬទេ ព្រោះខ្លួនឯងពេលផឹកស៊ីស្រវឹងម្ដងៗ តែងតែវាយធ្វើបាបប្រពន្ធមិនសូវលស់ពេល យ៉ាងនេះទៅហើយនោះ។ ប្រភពបន្ដថា បន្ទាប់ពីនិយាយគ្នារួចប្តីរបស់គាត់ បានចេញទៅក្រៅថា ទៅរកទិញស្រា ថែមទៀត តែតាមការពិតគាត់បានលបស្ដាប់មិត្តភក្ដិម្នាក់នោះនិយាយគ្នាជាមួយប្រពន្ធខ្លួនទៅវិញទេ។
ពេលប្តីថាទៅទិញស្រា មិត្តភក្ដិរបស់ប្តីបានមកអង្គុយជិតនាង ហើយសាសងសុំស្នេហ៍រូបនាង។ តែនាងបានប្រកែក មិនព្រម ព្រោះនាងមានប្តី ថែមទាំងមានកូនទៀតផង។ ពេលនោះមិត្តភក្តិប្តីរបស់នាងបានបបួលនាងរត់ នាងមិន ព្រមឡើយ។ បន្ទាប់មកប្តីនៅពួនខាងក្រៅ បានស្ទុះចេញមកវាយប្រពន្ធខ្លួនបណ្ដាលឲ្យរងរបួសយ៉ាងធ្ងន់ធ្ងរ តែការដែលវាយប្រពន្ធនេះ មិនដឹងថា ប្រពន្ធខ្លួន និងមិត្តភក្ដិប្ដីនោះនិយាយគ្នាយ៉ាងណានោះទេ ពោលគឺគ្រាន់តែ ឃើញគេអង្គុយជិតគ្នាតែប៉ុណ្ណោះ។
ដោយឃើញគេវាយប្រពន្ធរបស់គេបែបនេះមិត្តភក្ដិរបស់ប្តីគាត់បានចេញទៅបាត់ស្រមោល។ ក្រោយពេលកើត ហេតុឆាកល្ខោន ធ្វើឲ្យបាត់គ្រួសាររបស់ខ្លួន គឺប្រពន្ធសុំបែកផ្លូវ តែប្តីសុំអង្វរ សុំទោស ហើយឱបប្រពន្ធរហូត តែប្រពន្ធមិនអនុគ្រោះឲ្យប្ដីឡើយ ហើយចុងក្រោយប្រពន្ធបីកូនរត់ចោលប្តីដើរតែតោលមិនដឹងជាទៅទីណា ឯម្ចាស់ផ្ទះ ក៏បណ្ដេញបុរសជាប្ដីឈប់ឲ្យស្នាក់នៅទៅទៀតដែរ។ និយាយជារួមឆាកល្ខោន ដែលលោកប្ដីកំហូច បង្កើតឡើង ដើម្បីចង់សាកចិត្តប្រពន្ធថា ស្មោះចំពោះគាត់ឬក៏អត់នោះ ធ្វើឲ្យស្ដ្រីជាប្រពន្ធខឹងសម្បាយ៉ាងខ្លាំង បន្ទាប់ពីដឹងសាច់រឿងពិតភ្លាមៗនោះ នាងក៏សុខចិត្តបីកូនចាកចេញពីប្ដីបាត់តែម្ដង ប៉ុន្តែនៅពេលក្រោយមក ទៀតវាទៅជាយ៉ាងណានោះគេមិនអាចមើលដឹងទេ៕
