ខេត្តបាត់ដំបង ៖ តាមអនុសាសន៍ណែនាំរបស់ឧត្តមសេនីយ៍ទោ ស ថេត ស្នងការនៃស្នងការដ្ឋាននគរបាលខេត្តបាត់ដំបង នៅថ្ងៃ ទី១៤ខែ កញ្ញា ឆ្នាំ ២០១៦ លោកវរសេនីយ៍ក កុយ ហៀង ស្នងការរង ទទួលផែនប្រឆាំងបទល្មើស ក្នុងនោះមានលោក វរសេនីយ៍ត្រី ស៊ាន សុណាល់ នាយការិយាល័យ នគរបាលប្រឆាំងគ្រឿងញៀននៃស្នងការដ្ឋានព្រមទាំងលោកវរសេនីយ៍ត្រី សុខ និមល នាយរងការិយាល័យបាន ដឹកនាំកម្លាំងជំនាញ សហការណ៍ជា មួយកម្លាំងបង្ការបង្ក្រាប នៃស្នងការដ្ឋាន ធ្វើការបង្ក្រាបករណី( រក្សាទុក ដឹកជញ្ជូន និងជួញដូរគ្រឿងញៀន ) ដោយខុសច្បាប់មួយករណី ក្នុងភូមិសាស្ត្រសង្កាត់ទួលតាឯក ក្រុងបាត់ដំបង ខេត្តបាត់ដំបង ។ ក្នុងប្រតិបត្តិការនេះបានឃាត់ខ្លួនជន សង្ស័យចំនួន ០១ នាក់ឈ្មោះ អៀម ផានិត ហៅ លួត ភេទប្រុស អាយុ ២២ ឆ្នាំ រស់នៅសង្កាត់ទួលតាឯក ក្រុងបាត់ដំបង ដោយដកហូតបាន៖
-ថ្នាំញៀនប្រភេទ មេតំហ្វេតាមីន ( ម៉ាទឹកកក ICE ) ចំនួន ០១ ថង់មានទំងន់ ៣៩.៥៨ក្រាម។
-ម៉ូតូចំនួន ០១ គ្រឿង
-ទូរស័ព្ទដៃចំនួន ០១ គ្រឿង
– កាបូបដាក់លុយចំនួន ០១
លោកវរសេនីយ៍ក កុយ ហៀង បានបញ្ជាក់ថា ក្នុងរយៈ ពេលចុងក្រោយនេះ កម្លាំងជំនាញនៅស្នងការដ្ឋានក៏ដូច ជាកម្លាំងនគរបាលនៅតាមបណ្តាអធិការដ្ឋាននគរបាលក្រុង ស្រុកធ្វើការបង្ក្រាបករណីគ្រឿង ញៀនជាបន្តបន្ទាប់ ទោះមានចំនួនតិចតួច តែប្តេជ្ញាបន្តជំរុញដឹកនាំ ធ្វើការបង្ក្រាបទោះក្នុងរូបភាពណាក៏ដោយ ។ ដើម្បីឲ្យការងារនេះទទួលបានលទ្ឋផល លោកសូមស្នើសុំអាជ្ញាធរ ស មត្ថកិច្ចពាក់ព័ន្ឋក៏ដូចជាប្រជាពលរដ្ឋ នៅមូលដ្ឋានសហការណ៍ ឬហ៊ានរាយការណ៍ជូនសមត្ថកិច្ចបានទាន់ពេល ដើម្បីសមត្ថកិច្ចមានវិធានការបង្ក្រាបបានទាន់ពេលវេលា ។
ជនសង្ស័យ និងវត្ថុតាងកំពុងរៀបចំសំណុំរឿងបញ្ជូនទៅតុលាការខេត្តបាត់ដំបង ដើម្បីចាត់ការ តាមនីតិវិធី ។
