បន្ទាយមានជ័យ ៖ បុរសម្នាក់ស៊ីឈ្នួលបើកត្រាក់ទ័រដីរានថ្មី កិនជាន់មីនតោនផ្ទុះបណ្តាលអោយរងរបួសធ្ងន់និងរងការខូចខាតត្រាក់ទ័រ កាលពីវេលាម៉ោង ០៨និង៤០នាទី ព្រឹកថ្ងៃទី១៨ ខែសីហា ឆ្នាំ២០១៤នៅចំនុចដីចំការមួយកន្លែង ក្នុងភូមិក្រឡថ្មីឃុំ បន្ទាយឆ្មារស្រុកថ្មពួក ខេត្ត បន្ទាយមានជ័យ។
សមត្ថកិច្ច ដែលឈរជើងនៅព្រំដែន ចំណុចកើតហេតុ បានឲ្យដឹងថា ជនរងគ្រោះ មានឈ្មោះ អឿត មឿង អាយុ ២៥ឆ្នាំ រស់នៅភូមិគោកខ្ពស់ ឃុំគោកកឋិន ស្រុកថ្មពួក ជាអ្នកបើកត្រាក់ទ័រ ឲ្យឈ្មោះ តែ ដារ៉ា ភេទប្រុស អាយុ ៣០ឆ្នាំ រស់នៅភូមិផ្លាស់កង់ ឃុំសារង្គ ស្រុកស្វាយចេក បានបើកត្រាក់ទ័រមួយគ្រឿង ពណ៌ក្រហម ចូលទៅភ្ជួរដីចំការមួយកន្លែង កំពុងតែរានដីថ្មី រីឯម្ចាស់ដី ឈ្មោះ ហិប សាមៀត ភេទប្រុស អាយុជាង ៥០ឆ្នាំ រស់ភូមិខាងលើនេះ។
ក្រោយពីកើតហេតុគេឃើញមាន សមត្ថកិច្ច មូលដ្ឋានចុះទៅត្រួតពិត្យនិងបានសន្និដ្ឋានថា ត្រាក់ទ័រជាន់លើមីនតោននេះបានបង្សល់កប់ចោលតាំងពីសម័យសង្គ្រាម និងកន្លែងកើតហេតុជាការរានថ្មីៗ និងមិនដឹងថាចំណុចនៅសល់គ្រាប់មីននោះដែរ ត្រាក់ទ័រជាន់គ្រប់មីនផ្ទុះឡើងបណ្តាល ឲ្យមនុស្សអ្នកបើកបរឈ្មោះ អឿត មឿង បុើងខ្ទាតចេញពីត្រាក់ទ័រ ដាច់ជើងឆ្វេងមួយកំណាត់ រីឯត្រាក់ទរ័ក្រឡាប់ផ្ងារជើង ខូចខាតស្ទើរទាំងស្រុងផងដែរ។
ភ្លាម នោះសមត្ថកិច្ចបាន បញ្ជូនជនត្រូវបានក្រុមហេឡូត្រាស់ ដឹកយកទៅសង្គ្រោះបន្ទាន់ នៅមន្ទីរពេទ្យបង្អែក ស្រុកថ្មពួក ដើម្បីព្យាបាលជម្ងឺ។
នៅក្នុងខេត្តបន្ទាយមានជ័យ មានករណីផ្ទុះមីន បីលើកមកហើយ ដែលទីតាំងផ្ទុះសុទ្ធតែកើតឡើង នៅតាម បណ្តោយព្រំដែនកម្ពុជា ថៃ និងបានស្លាប់មនុស្សម្នាក់ និងរងរបួសប្រមាណជា៥នាក់មកហើយ ។ តែមកដល់ពេលនេះតើជនរងគ្រោះមានអាការៈយ៉ាងណានៅឡើយដែរ សង្ឃឹមថាជនរងគ្រោះនិងផុតពីការគ្រោះថ្នាក់ផ្ទុះមីននេះ ៕
