ភ្នំពេញ៖ បុរសស្រវឹងស្រាម្នាក់បើករថយន្តក្នុងល្បឿនលឿនរ៉េពេញផ្លូវ ហើយក៏ជ្រុលទៅបុកចំពី មុខរថយន្តក្រឡុកសុីម៉ងរបស់ក្រុមហ៊ុន ថៃហ្គឺ ដែលបើកបញ្ច្រាសទិសគ្នា បណ្តាលអោយរងការខូច ខាតរថយន្តខ្លួនឯង ចំណែករថយន្តក្រឡុកសីុម៉ង កំបុិតផ្នែកខាងមុខបន្តិចបន្តួច ។
ហេតុការណ៍គ្រោះ ថ្នាក់ចរាចរណ៍នេះបានកើតឡើងកាលពីវេលាម៉ោង ១០.៣០នាទីយប់ថ្ងៃទី ២២ខែសីហាឆ្នាំ២០១៦ តាមបណ្តោយផ្លូវលេខ៧០ កែងផ្លូវលេខ៥កា ស្ថិតក្នុងសង្កាត់ ទួលសង្កែរខណ្ឌប្ញស្សីកែវ ។
រថយន្តបង្ករម៉ាក កូរ៉ូឡា ពណ៍ទឹកប្រាក់ពាក់ស្លាកលេខភ្នំពេញ 1AF-5521 បើកដោយបុរសម្នាក់ក្នុងស្ថានភាពស្រវឹង និងមិនស្គាល់អត្តសញ្ញាណទេ ចំណែករថយន្តរងគ្រោះ ជារថយន្តក្រឡុកសីុម៉ង របស់ក្រុមហ៊ុន ថៃហ្គឺ ពាក់ស្លាកលេខភ្នំពេញ 5A-1448 ។
អ្នកបើករថយន្តក្រឡុកសីុម៉ងបានអោយដឹងថា មុនពេលកើតហេតុ រូបគេបើករថយន្តក្រឡុកសីុម៉ង(មានសីុម៉ងពេញ) តាមបណ្តោយផ្លូវលេខ៧០ក្នុងទឹសដៅពីលិចទៅកើត ពេលដែល ធ្វើដំណើរមកដល់ភ្លើងស្តុបផ្លូវ K៥ ក៏ត្រូវរថយន្តបង្ក ដែលធ្វើដំណើរបញ្ច្រាសទិសគ្នា ក្នុងល្បឿនលឿន ថែមទាំងរ៉េពេញផ្លូវថែមទៀតផង មកបុកចំពីមុខរថយន្តផ្នែកខាងស្តាំ បណ្តាលអោយរថយន្តរងគ្រោះរងការខូចខាតផ្នែកខាងមុខទាំងស្រុង ឯរថយន្តក្រឡុកសីុម៉ង់វិញក៏រងការខូចខាតដែរ ។
ប្រភពដដែលបានបន្តទៀតថា នេះសំណាងហើយ ដែលរូបគេ ទាញចង្កូតគេចចេញទៅឆ្វេង បើរូបគេមិនទាញចង្កូត ទៅឆ្វេងទេ ម្លេះសមរថយន្តបង្ករបុកចំពីមុខ ចូលក្រោមរថយន្ត ក្រឡុកសីុម៉ង់បាត់ទៅហើយ ហើយប្រហែល ជាអាចរងរបួស ដល់អ្នកបើកបរថែមទៀតផង ។
បន្ទាប់ពីបុកភ្លាមៗនោះក៏មានតំណាងក្រុមហ៊ុនក្រឡុកសីុម៉ង់មកដល់ដែរ ព្រោះថាក្នុងរថយន្តនោះមានសីុម៉ង់ពេញ បំណងយកទៅ ចាក់នៅ ការដ្ឋានក្បែរកោះពេជ្រ ។ ក្រោយពេលកើតហេតុ សម្ថកិច្ចមូលដ្ឋាន បានចុះមកដល់ និងបានធ្វើការ សំរបសំរួល ភាគី ទាំងសងខាង ។
ក្រោយពីការចរចារគ្នារួចមកខាងរថយន្តបង្ករបានចេញថ្លៃសងការខូចខាត ចំនួន១០០០ដុល្លា ដល់ក្រុមហ៊ុនក្រឡុកសីុម៉ង ដើម្បីបញ្ចប់រឿង នៅកន្លែងកើតហេតុ ៕
