ខេត្តបាត់ដំបង ៖ កាលពីវេលាម៉ោងប្រហែល២៣យប់ ថ្ងៃទី១៨ខែសីហា ឆ្នាំ២០១៦ មានករណីឃាតកម្ម មួយបានកើតឡើង ស្ថិតក្នុងចំណុច៣២ ក្រុមទី៣ ភូមិចម្លងរមាំងលើ ឃុំអូរសំរិល ស្រុកសំឡូត ខេត្តបាត់ដំបង ដែលបង្ករឡើងដោយ ជនសង្ស័យមួយក្រុម មានគ្នា០២ ទៅ០៣នាក់ មិនស្គាល់សាវតា បាននាំគ្នាធ្វើសកម្មភាព ចាក់សំលាប់ ជនរងគ្រោះម្នាក់ ឈ្មោះ អ៊ុល ចន ភេទប្រុស អាយុ២៦ឆ្នាំ មុខរបរធ្វើចំការ រស់នៅក្បែរកន្លែងកើតហេតុ ។
ជនសង្ស័យបានចាក់សំលាប់ជនរងគ្រោះដោយដែកឆាបចំនួន០៦កន្លែង ចំពីក្រោយខ្នង០៤ដែកឆាប ចំខ្លួនពីមុខក្រោមដោះស្ដាំ០១ដែកឆាប និង ចំកន្ដៀតក្អមខាងស្ដាំ០១ដែកឆាប បណ្ដាលអោយស្លាប់ និងកន្លែងកើតហេតុ រួចក្រុមជនសង្ស័យ ក៏បានប្លន់យកម៉ូតូ របស់ជនរងគ្រោះ ចំនួន០១គ្រឿង ម៉ាកហុងដាឌ្រីម សេរីឆ្នាំ២០១៦ ពណ៌ខ្មៅ អត់ផ្លាកលេខ ជិះរត់គេចចេញទៅបាត់។
លុះព្រឹក ថ្ងៃទី២០ ខែសីហា ឆ្នាំ២០១៦នេះ សពរងគ្រោះ ត្រូវបានគេប្រទះឃើញ ក្នុងចំការដំឡូង ហើយសមត្ថកិច្ច កងរាជអាវុធហត្ថស្រុក បានចុះធ្វើកោសល្យច្ច័យ រួចប្រគល់សព ជូនក្រុមគ្រួសារ យកទៅ ធ្វើបុណ្យ តាមប្រពៃណីយ៌ ។
ចំណែកឯ ក្រុមជនសង្ស័យ កំពុងត្រូវបាន កងរាជអាវុធហត្ថ ស្រុកសំឡូត សហការជាមួយ ជំនាញអហខេត្ត តាមដានស្រាវជ្រាវ កំណត់មុខសញ្ញា ដើម្បីយកមកផ្តន្ទាទោស តាមច្បាប់ ៕
