ខេត្តឧត្តរមានជ័យៈ អ្នកកាសែត2នាក់ ត្រូវបានស្ត្រី ជនជាតិ វៀតណាមម្នាក់ ឈ្មោះ(យាយម៉ាយ) ដែលជាមេឈ្មួញដ៍ល្បី នៅក្នុងស្រុកអន្លង់វែង ខេត្តឧត្តរមានជ័យ ជិះរថយន្តដេញបុក បណ្តាលអោយរងខូចខាតរថយន្តអស់មួយចំហៀងខាងឆ្វេង ក្នុងខណៈពេលអ្នកកាសែតទាំង2ខាងលើចុះទៅថតសកម្មភាពពួកគេកំពុងទម្លាក់ឈើក្រញូងចេញពីរថយន្តមានចំណួនប្រហែលជាង1តោន ។
ហេតុការណ៍នេះកើតឡើងនៅវេលាម៉ោង8ព្រឹក នាថ្ងៃទី30 ខែកក្កដា ឆ្នាំ2016 នៅចំណុចលើផ្លូវជាតិ ខាងត្បូងសាលាឃុំត្រពាំងប្រិយ៍ ចំង៉ាយ500ម ស្ថិតក្នុងភូមិទឹកជុំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ ។
តាមសម្តីរបស់ឈ្មោះ ប៉ែន នួន ភេទប្រុស អាយុ37ឆ្នាំ ជាអ្នកបើកបរ និងឈ្មោះ ខៀវ សុផានុរស្ស ភេទប្រុស អាយុ38 ជាអ្នករួមដំណើរ អ្នកទាំង2ជាជនរងគ្រោះបានអោយដឹងថា ក្រោយពេល ពួកគាត់បានថតសកម្មភាព ក្រុមឈ្មួញខាងលើ កំពុងទម្លាក់ គំនរឈើក្រញូង ចេញពីរថយន្តម៉ាកលុចស៊ីសRX300 ព៌ណខ្មៅ ពាក់ស្លាក ភ្នំពេញ2Y-6728 នៅចំណុចភូមិពពេល ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ពួកគាត់ក៍បានជិះរថយន្តរបស់ខ្លួនម៉ាកCRV ព៌ណទឹកប៊ិច ពាក់ស្លាកលេខ ភ្នំពេញ2H-6173 ត្រឡប់មកទីរួមស្រុកអន្លង់វែងវិញ ក៍ស្រាប់តែ( យាយម៉ាយ )បើករថយន្តម៉ាកលុចស៊ីស RX300 ព៌ណខ្មៅ ពាក់ស្លាកលេខ ភ្នំពេញ2Q-1218 ដឹកកូនចៅរបស់ខ្លួន3នាក់ ដេញបុក រហូតមកដល់ចំណុចកើតហេតុខាងលើទើបបុកបានសម្រេច ដោយរថយន្តអ្នកកាសែតទាំង2ធ្លាក់ចិញ្ចើមផ្លូវ ហើយ(យាយម៉ាយ)ក៍បញ្ជាអោយកូនចៅរបស់ខ្លួនចុះមកគាស់ទ្វារថយន្តជនរងគ្រោះតែគាស់មិនបាន បានត្រឹមតែធាក់ទ្វាជាច្រើនជើង ហើយរត់ឡើងរថយន្តបើកគេចខ្លួនបាត់ ។
ក្រោយកើតហេតុក្រុមព័ត៍មានបានអត្តរាគមន៍ដល់កម្លាំងប្រដាប់អាវុធទាំងបីក្នុងស្រុក ទើបកម្លាំងនគរបាលឃាត់បានភ្លាមៗ ទាំងរថយន្តនិងអ្នកបង្ករមកអធិការដ្ឋាននគបាលស្រុកអន្លង់វែង តែត្រូវបានដោះលែង(យាយម៉ាយ)និងបក្សពួកទៅវិញ ដោយមិនឃុំខ្លួននោះឡើយ ។
ជុំវិញព័ត៌មាននេះ គឺមិនមានការឃាត់ខ្លួន(យាយម៉ាយ) និងបក្ខពួកបង្ករ នោះទេ មជ្ឈដ្ឋានទូទៅបានអោយដឹងថា យាយម៉ាយ មានខ្នងជា មន្ត្រីកងរាជអាវុធហត្ថខេត្ត ក្នុងឋានៈជាមេបញ្ជាការរង ទើបអាចរកស៊ីឈើក្រញូងខុសច្បាប់បានយ៉ាងរលូនរហូតមកដល់ពេលនេះ ដោយគ្មានសមត្ថកិច្ចណាហ៊ានបង្ល្រាបឡើយ រហូតហ៊ានដេញបុកប៉ុនប៉ងសម្លាប់អ្នកកាសែតទៀត ៕
