កំពង់ធំៈ ប្រជាពលរដ្ឋមានការថ្នាំងថ្នាក់ និងខកបំណងយ៉ាងខ្លាំង ខណៈពេលដែលមន្ត្រី បរិស្ថានការពារព្រៃឡង់ បាននាំគ្នាចាប់ឈើរបស់ពួកគាត់ ហើយបែជាមានការឃុបឃិតគ្នាជាមួយឈ្មួញឈើដុះស្លែរ ដែលបានប៉ៅផ្តាច់ស្រុកសណ្តាន់ប្រចាំឃុំទំរីងដឹកឈើយកទៅ លក់តាមដេប៉ូឈើយ៉ាងរំភើយ ហើយក៏ត្រូវបានព្រមានពីសំណាក់មេព្រៃចំនួន ២លើកមកដែរ តែមានអន្តរាគមន៍ពីអ្នកធំនៅពីក្រោយខ្នង។
តាមប្រភពពីប្រជាពលរដ្ឋបានឲ្យដឹងថា ការដាក់មន្ត្រីបរិស្ថាន ដើម្បីការពារព្រៃឡង់ ប្រៀបបាននឹងកណ្តុរធ្លាក់ចូលក្នុងជង្រុកស្រូវ ដោយសារតែមានមន្ត្រីបរិស្ថានបានកាក់កាឡេថងដឹកឈើរបស់អ្នកភូមិ ហើយបង្គាប់ឲ្យបង់លុយក្នុងមួយគ្រឿង១៥ម៉ឺនរៀល ការកំណត់ឲ្យបង់លុយសម្រាប់បែងចែកគ្នាដាក់ហោប៉ៅនេះ បានធ្វើឲ្យឈ្មួញឈើមួយចំនួនត្រូវបានផ្អាក ហើយអ្នកខ្លះដាច់អង្ករច្រកឆ្នាំង ដោយសារតែមានកុងត្រូលជជុះចាំកាក់សេ យកលុយតាមកាឡេថង និងរថយន្ត មិនតិចជាង ២០កន្លែង ប្រភពត្រូវបានបន្តថា ដោយឡែកកាលពីថ្មីនេះ សកម្មភាពដឹកឈើរបស់មន្ត្រីបរិស្ថាន បានយកឈើដែលចាប់បានពីប្រជាពលរដ្ឋ ដឹកចូលដេប៉ូឈើដើម្បីលក់ទៅវិញ។
តាមការឲ្យដឹងពីលោក សៅ វណ្ណី នាយផ្នែករដ្ឋបាលព្រៃឈើសណ្តាន់ បានឲ្យអ្នកសារព័ត៌មានដឹងថា ការដឹកឈើរបស់មន្ត្រីបរិស្ថានគឺត្រូវបានដឹកចំនួន៤លើកមកហើយ ក្នុងនោះលោកបានធ្វើការអប់រំមិនឲ្យដឹកលើសដូចនេះទេ ដោយសារតែសុំដឹកតែ៦ម៉ែត្រគូប តែដល់ពេលដឹកបែរជាដាក់ឈើប្រភេទលេខ២ ដល់ទៅ១៥ម៉ែត្រគូប ៧ផ្លានទៅវិញ តាមរយះរថយន្តរបស់ឈ្មួញឈើដ៏ល្បីល្បាញម្នាក់ក្នុងឃុំទំរីង តែលោកក៏មិនអនុញ្ញាតិឲ្យមានការដឹកជញ្ជូនដោយខុសច្បាប់អញ្ចឹងទៀតទេ ។
លោក តុប កក្កដា ប្រធានមន្ទីបរិស្ថានខេត្តកំពង់ធំ បានឲ្យដឹងតាមទូរស័ព្ទថា ឈើទាំងអស់នេះ ត្រូវបានដឹកយកមករក្សាទុកនៅមន្ទីបរិស្ថានខេត្តកំពង់ធំ ហើយមានដិការដកហូតពីព្រះរាជអាជ្ញាអមសាលាដំបូងខេត្តកំពង់ធំ ដោយបានចេញលិខិតឲ្យដេញថ្លៃលក់ឡៃឡុង ដោយបែកចែកឲ្យរដ្ឋ៥០ភាគរយ និងកម្លាំងមន្ទីរបរិស្ថាន៥០ភាគរយ ហើយលោកបានណែនាំមិនឲ្យមន្ត្រីរបស់លោកពាក់ព័ន្ឋនឹងការយកលុយ និងដឹកឈើទៅលក់ដោយចង់បានចំណេញ១០០ភាគរយនោះទេ ចំនែកព័ត៌មានដែលលេចលឺថាមានការដឹកឈើដែលចាប់បាន យកមកលក់តាមដេប៉ូឈើនោះ គឺដោយសារតែមានដេប៉ូឈើខ្លះច្រណែនដោយមិន បានសិទ្ធទទួលទិញ។
តែទោះជាមានការបកស្រាយយ៉ាងនេះក៏ដោយ ក៏ប្រជាពលរដ្ឋក៏បានសំណូមពរ ឲ្យមន្ត្រីបរិស្ថានការពារព្រៃ ឡង់សូមមេត្តាកុំផ្កាប់ឆ្នាំបាយរបស់ប្រជាពលរដ្ឋក្រីក្ររអី សូមឲ្យបន្ធូរបន្ថយបន្តិច ដើម្បីឲ្យប្រជាពលរដ្ឋ មានដង្ហើមដកខ្លះ ព្រោះប្រជាពលរដ្ឋទាំងនេះកើតមកនឹងព្រៃឈើ រស់នឹងព្រៃឈើ ស្លាប់ក៏នឹងព្រៃឈើតាំងពីដូនតាមកម្លេះ។
