ខេត្តកោះកុង ៖ ប្រជាពលរដ្ឋ រស់នៅចំណុច វត្តគងឆា ស្ថិតក្នុងភូមិ ព្រះអង់កែវ ឃុំដងពែង ស្រុកស្រែអំបិល ខេត្តកោះកុង បាននិយាយថា ក្រុមហ៊ុនចំការអំពៅ របស់លោកលី.យុង (ឥឡូវក្រុមហ៊ុននេះ កាត់អោយទៅ ក្រុមហ៊ុនថៃ) បានធ្វើរបងបិតផ្លូវ និងងកាយប្រឡាយ បិតផ្លូវរទេះ ធ្វើឲ្យប្រជាពលរដ្ឋ ប្រមាណជា៥ភូមិ ត្រូវដើរកាត់តាមភ្លឺស្រែ ឬផ្លូវវៀងតូច គ្រលុគ្រលាក់ យ៉ាងវេទនា ទាំងអស់គ្នា ហើយបញ្ហានេះ ពួកគាត់បានរាយការណ៍ប្រាប់ លោកមេភូមិ និងលោកមេឃុំ ឈ្មោះម៉េង.យុយ ជាច្រើនដងដែរ តែគ្មានអ្នកណាអើពើរឡើយ ។
ពាក់ព័ន្ធនឹងការចោទប្រកាន់នេះ អ្នកសារព័ត៌មាន ធ្លាប់ព្យាយាមទំនាក់ទំនង តាមទូរស័ព្ទ ថែមទាំងធ្លាប់ទៅជួបផ្ទាល់ ដើម្បីសាកសួរព័ត៌មាន តែអស់លោក អាជ្ញាធរភូមិឃុំ នៅទីនោះ ពិបាកជួបជាង នាយករដ្ឋមន្ត្រី ទៅទៀត ។
ចំណែក ចៅហ្វាយស្រុកស្រែអំបិល លោកទួន.សីលា ត្រូវបានគេកត់ច្បាស់ថា តាំងពីកាន់តំណែង មិនដែលចុះសួរសុខទុក្ខ ប្រជាពលរដ្ឋទេ លុះត្រាតែមានកម្មពិធី ទើបឃើញមុខ ប៉ុន្តែបើបទល្មើសពាក់ព័ន្ធ កើតឡើងក្នុងស្រុក ដូចជាឈូកឆាយដីភ្នំ កាប់ព្រៃ លិចទឹកកាប់ព្រៃកោងកាង នឹងបទល្មើសផ្សេងទៀត លោកចៅហ្វាយស្រុក រូបនោះ លាក់មុខជិត ដូចអណ្តើក អីចឹ សង្ស័យពាក់ព័ន្ធ លាភសក្ការ: ។
ដោយសារ អាជ្ញាធរស្រុកស្រែអំបិល អសមត្ថភាព មិនខ្វល់ពីសុខទុក្ខប្រជាពលរដ្ឋ ប្រភពជាច្រើន បានសំណូមពរឲ្យ លោក ប៊ុន លើត អភិបាលខេត្តកោះកុង មេត្តាជួយចាត់វិធានការ ដោះស្រាយជូនពលរដ្ឋរងគ្រោះផង ជាពិសេសសូមលោកអភិបាលខេត្ត ជួយយកចៅហ្វាយស្រុកស្រែអំបិល ទៅដុះក្អែលចេញម្ដងផង កុំឲ្យត្រីស្អុយមួយ ស្អុយមួយកន្ត្រក ៕
