ខេត្តបន្ទាយមានជ័យ ៖ កម្មករអូសរទេះ១ក្រុម បាននាំគ្នាលើកបដា ផ្ទុះការតវ៉ា នៅច្រកទ្វារអន្តរជាតិប៉ោយប៉ែត បន្ទាប់ពីសន្តិសុខថៃ (យ៉ាម) ចាប់រទេះរបស់ពួកគាត់ យកទៅទុករាប់ខែឆ្នាំ សង្ស័យប្រកាន់បក្ខពួក ជាហេតុធ្វើពួកគាត់ខ្លះ ត្រូវពិបាកគ្មានអ្វីរកស៊ី ខ្លះត្រូវរកលុយសង ថ្លៃរទេះដែលជួល ពីគេដើម្បីយកមករកស៊ី ។
ប្រភពពីកម្មករប្រាប់ថា កន្លងមកសន្តិសុខថៃ (យ៉ាម) បានចាប់រទេះពួកគាត់ ទៅទុកដោយគ្មានមូលហេតុ អស់រយ:ពេលជាច្រើនខែឆ្នាំ ហើយទង្វើនេះបានបន្ត កាន់តែខ្លាំងឡើងៗ ខណះអ្នកខ្លះ បានរត់ទៅប្តឹង មន្ត្រីពាក់ព័ន្ធ ឲ្យជួយអន្តរគន៍ បានត្រឹមតែម្តងឬជា២ដង ប៉ុណ្ណោះ ។
ប្រភពបន្តថា សន្តិសុខថៃ (យ៉ាម) ដែលបានចាប់រទេះ របស់ក្រុមកម្មករខ្មែរ យកទៅទុកនោះ ហាក់បីដូចជា ប្រកាន់បក្ខពួក ធ្វើតាមទំនើងចិត្ត មិនខ្វល់ពីផលប៉ះពាល់ ការរកស៊ីនិងជីវភាព គ្រួសាររបស់គេនោះទេ ហើយករណីនេះ មន្ត្រីពាក់ព័ន្ធនៅច្រកព្រំដែន នៃប្រទេសទាំង២ ហាក់មិនអើពើរចំពោះ ក្រុមកម្មករអូសរទេះខ្មែរ ដែលជាជនរងគ្រោះ នោះឡើយ ។
ទោះបីជាយ៉ាងណា ខណះពេលកំពុងផ្ទុះការតវ៉ា នៅចំណុច ច្រកទ្វារព្រំដែន អន្តរជាតិអន្តរជាតិប៉ោយប៉ែត នាព្រឹកថ្ងៃទី២០ ខែកក្កដា ឆ្នាំ២០១៦នេះ គេឃើញមន្ត្រីនគរបាល ប្រចាំច្រកទ្វារនោះ ចេញមកធ្វើការដោះស្រាយ ដោយស្នើរសុំឲ្យ ក្រុមកម្មករអូសរទេះ បញ្ឈប់ការតវ៉ា រួចទុកពេលឲ្យ មន្ត្រីកម្ពុជា ចំនួន២ទៅ៣ថ្ងៃ ក្នុងការទាក់ទង រកដំណោះស្រាយ ជាមួយភាគីថៃ ដើម្បីផ្តល់យុត្តិធម៌ ជួនពួកគាត់វិញ ៕
ក្រោយពីមានចរចាររួចមក ក្រុមកម្មករអូសរទេះ បានសម្រេចចិត្ត រំសាយការតវ៉ា ហើយនាំគ្នាត្រឡប់ទៅលំនៅដ្ឋាន រៀងៗខ្លួន ៕
