ការប៉ុនប៉ងធ្វើរដ្ឋប្រហារ ពីសំណាក់ពួកយោធាទួគី បានរលាយទៅវិញ នៅព្រឹកថ្ងៃសៅរ៍នេះ បន្ទាប់ពីមហាជនបានចេញតវ៉ានៅតាមដងផ្លូវ ទៅតាមការអំពាវនាវស្វែងរកការគាំទ្រពីមហាជនរបស់ប្រធានធិបតី លោក តាយីប អេដូហ្គេន។
យោងតាមទីភ្នាក់ងារព័ត៌មានរ៉យទ័រ បានរាយការណ៍ថា លោក អេដូហ្គេន ដែលកំពុងសម្រាកលម្អែកាយ នៅឯឆ្នេរសមុទ្រ នៅពេលពួកយោធាធ្វើរដ្ឋប្រហារនោះ បានធ្វើដំណើរ តាមយន្តហោះ ត្រឡប់ទៅទីក្រុងអ៊ីស្តង់ប៊ុលវិញ មុនព្រឹកថ្ងៃសៅរ៍នេះ ហើយបាន បង្ហាញមុខ នៅលើកញ្ចក់ទូរទស្សន៍ នៅក្នុងចំណោម មហានជន ជាអ្នកគាំទ្រ នៅខាងក្រៅព្រលានយន្តហោះ ។
ទីភ្នាក់ងារព័ត៌មានរ៉យទ័រ បានដកស្រង់សម្ដីលោក អេដូហ្គេន ដែលបានថ្លែងទៅកាន់អ្នកយកព័ត៌មានថា ការបះបោរប្រឆាំង គឺជា«ទង្វើក្បត់ជាតិ» ហើយអ្នកទទួលខុសត្រូវចំពោះទង្វើនេះ នឹងត្រូវទទួលទោសយ៉ាងធ្ងន់ធ្ងរ។ ការចាប់ខ្លួនមន្ត្រីយោធា កំពុងដំណើរការ ហើយនឹងមានការចាប់ខ្លួនរហូតដល់មន្ត្រីឋានៈខ្ពស់ ដែលឈានទៅដល់ការបោសសម្អាតពួកយោធា។
សំឡេងកាំភ្លើង និងគ្រាប់បែក បានលាន់លឺ ឡើង ទាំងនៅ ទីក្រុងអ៊ីស្តង់ប៊ុល និងរដ្ឋធានីអង់ការ៉ា នៅក្នុងយប់ដ៏ច្របូកច្របល់ បន្ទាប់ពីពួកយោធា បានកាន់កាប់ទីតាំងនៅទីក្រុងទាំងពីរ និងចេញបញ្ជាឲ្យទូរទស្សន៍រដ្ឋ អានសេចក្ដីថ្លែងការណ៍ថា ពួកគេបានកាន់កាប់អំណាចហើយ។
ប៉ុន្តែ នៅព្រឹកថ្ងៃសៅរ៍នេះ ទាហានប្រហែល ៣០រូប ដែលជាអ្នកគាំទ្រ រដ្ឋប្រហារនោះ បានចេញសារភាពរួមទាំងអាវុធរបស់ពួកគេ បន្ទាប់ពីត្រូវបានប៉ូលិសប្រដាប់ដោយអាវុធ បានឡោមព័ទ្ធ នៅទីលាន Taksim កណ្ដាលទីក្រុងទីស្តង់ប៊ុ៕ ដោយ សហការី
