ខេត្តបាត់ដំបង ៖ លោក តូច សុភក្តី ព្រះរាជអជ្ញារង អមសាលាដំបូង ខេត្តបាត់ដំបង ដឹកនាំកម្លាំងចម្រុះអនុវត្តន៍សាលដីការ រុះរើ តូបលក់៣កន្លែង ប៉ះពាល់ដីចំណីផ្លូវលំនិងផ្លូវជាតិលេខ៥៧អា ជាប់ដីរោងម៉ាស៊ីនស្រូវ ឈ្មោះយ៉ាំឈឿងនិងឈ្មោះអៀត សំអុល ដោយមានសំណងក្នុង១តូប ចំនួន៣០០ដុល្លា កាលពីព្រឹក ថ្ងៃទី៦ ខែកក្កដា ឆ្នាំ២០១៦ នៅក្រុមទី១៥ ភូមិច្រាបក្រសាំង សង្កាត់់វត្តគរ ក្រុងបាត់ដំបង។
តាមការអនុវត្តន៍ប៉ះពាល់លើតូបមាន ទី១ឈ្មោះ យឹម សៀប ភេទប្រុស អាយុ៦៣ឆ្នាំ ទី២ឈ្មោះ ញៀន ឃន ភេទប្រុស អាយុ៧៣ឆ្នាំ ទី៣ឈ្មោះ ញ៉ាន គង្គា ភេទប្រុស អាយុ៤៥ឆ្នាំ ទាំង៣នាក់ រស់នៅភូមិ សង្កាត់ កើតហេតុខាងលើ ។ អ្នកទាំង៣នាក់ម្ចាស់តូបយល់ថាការអនុវត្តដីការរុះរើតូបទាំង៣ខាងលើគឺដើម្បីប្រយោជន៍ រោងម៉ាស៊ីនស្រូវ ឈ្មោះអៀត សំអុល ។
ឈ្មោះ ញ៉ាន គង្គា ដែលមានតូប ជាប់ផ្លូវជាតិ៥៧អា និងផ្លូវលំចូលភូមិ កើតទុក មិនសុខចិត្ត ដោយស្រែកថាអយុត្តិធម៌ ព្រោះការអនុវត្តន៍មិនត្រឹមត្រូវ ខ្លួននិងប្រពន្ធបានទិញដីជាប់ផ្លូវពីឈ្មោះហុងជិនហូភេទប្រុសអាយុ៦៩ឆ្នាំតាំងពីថ្ងៃទី២៣ខែមេសាឆ្នាំ២០១១ដោយមានឈ្មោះសុខឈឿតចៅសង្កាត់វត្តគរចុះហត្ថលេខានិងវាយត្រាទៀតផងដើម្បីប្រកបរបរចិញ្ចឹមជីវិត។នៅម៉ោង៧ព្រឹក ថ្ងៃទី៦ ខែកក្កដា ឆ្នាំ២០១៦សមត្ថកិច្ចយកដីការមក ស្រាប់តែម៉ោង៩ព្រឹកថ្ងៃដដែលអនុវត្តន៍រុះរើតែម្តង ។
សូមថ្នាក់លើនិងអ្នកមានអំណាចជួយពិនិត្យរឿងនេះឡើងវិញផងជាពិសេសសម្តេចហ៊ុនសែននិងលោកជំទាវគតិបណ្ឌិតប៊ុនរ៉ានីមេត្តជួយឲ្យជនក្រីក្របានលក់ដូរផងហើយបើរដ្ឋអំណាចត្រូវការសាងសង់ផ្លូវ រូបខ្ញុំនឹងប្រគល់ជូនរដ្ឋដោយឥតជំទាស់។
លោកសុខឈឿតចៅសង្កាត់វត្តគរមិនអាចបំភ្លឺរឿងចុះហត្ថលេខានិងវាយត្រាចេញឲ្យឈ្មោះញ៉ានគង្គាប្រើប្រាស់ដីខាងលើបានទេគឺគាត់ខ្ចឹបមាត់រហូត។
លោកតូចសុភក្តី ព្រះរាជអជ្ញារង អមសាលាដំបូង ខេត្តបាត់ដំបងបានឲ្យដឹងថាការអនុវត្តន៍សាលដីការចុះរុះរើតូបទាំង៣ខាងលើ មិនពាក់ព័ន្ធចំពោះម្ចាស់រោងម៉ាស៊ីនខាងក្រោយទេ គឺតូបលក់នេះលក់ ប៉ះពាល់ដីចំណីផ្លួវជាតិលេខ៥៧អាដែលច្បាប់រដ្ឋឲ្យឃ្លាតពីចញ្ចើមផ្លូវ២៥ម៉ែត្រនិងគំរោងជួសជុលផ្លូវលំចូលភូមិដោយពួកគាត់បានទទួលសំណងផលប៉ះពាល់ក្នុង១តូបចំនួន៣០០ដុល្លារួចហើយ៕
