បាត់ដំបង ៖ ប្រជាពលរដ្ឋ៦៥គ្រួសារចំណោម ៣៦៧ គ្រួសារថា ប្តឹងក្រុមហ៊ុនទឹកបរិសុទ្ធហ្គោលដិនស៊ី យូរហើយ មិនឃើញអ្នកណាចុះអន្តរាគមន៍សោះ ទើបតែឃើញលោក សៀង ឯមវូនស្ហី អភិបាលក្រុងបាត់ដំបងដឹកនាំកម្លាំងជំនាញ ចម្រុះពិនិត្យនិងបានដោះស្រាយជោគជ័យ និងសន្យាបើកផ្លូវចូលអោយធំជាងមុន និងការស្តារប្រឡាយនិងសង់បង្គន់អនាម័យ ព្រមទាំងមានចិត្តបុណ្យជូនថវិកាយាយចាស់ក្រីក្រកំពង់ដេកឈឺថែមទៀតផង កាលពីព្រឹកថ្ងៃទី១០ ខែសីហា ឆ្នាំ២០១៤ នៅភូមិអណ្តូងចេញ សង្កាត់អូរចារ ក្រុងបាត់ដំបង ។
ប្រជាពលរដ្ឋថា សិប្បកម្មទឹកបរិសុទ្ធយីហោ ហ្គោលដិនស៊ី និងជាម្ចាស់ស្ថានីយប្រេងឥន្ធនៈដែលមានម្ចាស់ឈ្មោះ ឡេង ស្រ៊ុនបានបូមទឹកចេញពីស្រះមានទុយោទំហំ ៦៤ មីឡីម៉ែត្រ ដើម្បីផ្គត់ផ្គង់អាជីវកម្មផ្នែកទឹកបរិសុទ្ធរយៈពេល១០ឆ្នាំមកហើយដែលបណ្តាលអោយស្រះទឺកស្រករីងហួត នឹងថ្ងៃក្រោយរកទឹកប្រើប្រាស់គ្មាន ។ មិនតែប៉ុណ្ណោះ គាត់បង្ហូរទឹកកាកសំណល់ចូលមកក្នុងស្រះវិញ ធ្វើអោយទឹកពិបាកប្រើប្រាស់ ប៉ះពាល់ដល់សុខភាព។
លោក ឡេង ស្រ៊ុន បានអោយដឹងថាខ្ញុំបូមទឹក ក្នុងមួយ ថ្ងៃ គឺប្រហែល ១០គូប ក្នុងមួយថ្ងៃដាក់ក្នុងអាង ដើម្បីបំរើភ្ញៀវទេសចរចេញចូលស្ថានីយ៍ប្រេងឥន្ធនៈលាងដៃជើង ។ គេចូលមកចាក់ប្រេង ចូលមកបត់ដៃបត់ជើងជួនកាលគេមិនចាក់ប្រេងទេ គេចូលមកកន្លែងហ្នឹង វាមានបន្ទប់អនាម័យ វាងាយលាងដៃលាងជើង លុបមុខមានកញ្ចក់ឆ្លុះមុខសម្អាតកាយទៀតផង ។ មិនបានបូមទឹកស្រះយកធ្វើទឹកសុទ្ធទេហើយព្រឹកនេះ បំពេញតាមសំណូមពរ សុំប្តូរទុយោទឹកពី ៦៤ មីលីម៉ែត្រមកទំហំ ៣៤ មីឡីម៉ែត្រវិញ ។ ចំពោះទុយោ ដាក់បង្ហូរចូលស្រះ គឺការរំដោះទឹកនៅតាមផ្លូវហើយទុយោនេះ បើប៉ះពាល់លោកនឹងបិទតាមការណែនាំរបស់លោកអភិបាលក្រុង ។
លោក សៀង ឯមវូនស្ហី អភិបាលក្រុងបាត់ដំបងបានអោយដឹងថា តាមការចុះមកពិនិត្យដោយកម្លាំងចម្រុះនិងអជ្ញាធរមូលដ្ឋានឃើញថា លោក ឡេង ស្រ៊ុន គាត់បូមទឹកសំរាប់ដាក់អាងអោយភ្ញៀវប្រើប្រាស់មែន ហើយខាងតំណាងប្រជាពលរដ្ឋគាត់បានយល់ព្រមគ្នាទៅវិញទៅមក និងចុះហត្ថលេខាលាយលាក់ជាអក្សរផង ដូច្នេះការដោះស្រាយបញ្ហាការទឹកចូលស្រះបានជោគជ័យដោយរលូន ។ លោកបានសន្យាដោះស្រាយបើកផ្លូវចូលពីមុនមានទំហំ ៣ ម៉ែត្រអោយបានទំហំ៦ម៉ែត្រ ធំជាងមុន ។ ការស្តារប្រឡាយដែលគែបោះបង់ចោលជាង ២០ ឆ្នាំ ដើម្បីរំដោះទឹកកុំអោយលេចលង់ផ្ទះប្រជាពលរដ្ឋនិងសង់បង្គន់អនាម័យ ជូនប្រជាពលរដ្ឋក្រីក្រកុំអោយបត់ជើងពាសវាលពាសកាល មិនតែប៉ុណ្ណោះ លោកបានជូនថវិកាយាយចាស់ក្រីក្រកំពង់ដេកឈឺផងដែរ ។ ក្នុងការដោះស្រាយជួបបញ្ហាប្រឈមដោយសារឈ្មោះមូលស្រីម្ចាស់ដីមួយកន្លែង មិនអនុញាតអោយកាយដីដាក់លូ ឬទុយោឆ្លងកាត់សំរាប់រំដោះទឹកទៅដល់ប្រឡាយ ដែលត្រូវស្តារតែទោះជាយ៉ាងណា លោកនឹងរកវិធីដោះស្រាយបង្ហូរទឹកអោយធ្លាក់ចូលប្រឡាយ មិនអោយលេចផ្លូវមុខផ្ទះប្រជាពលរដ្ឋទៀតទេ ។
ប្រជាពលរដ្ឋថា មិនដែលឃើញថ្នាក់ដឹកនាំណាចុះពិនិត្យដល់ភូមិ ដូចលោក សៀង ឯមវុនស្ហី ទេ ព្រោះគាត់ប្តឹងតាំងពីលោកអ៊ុយរីអភិបាលក្រុងបាត់ដំបងមកម្ល៉េះ ពេលនេះ ពួកគាត់សប្បាយចិត្តខ្លាំងណាស់ និងអរគុណចំពោះការយកចិត្តទុកដាក់របស់លោក សៀង ឯមវូនស្ហី អភិបាលក្រុងបាត់ដំបងឡើងថ្មី ៕
