ខេត្តប៉ៃលិន ៖ នគរបាលស្រុកសាលាក្រៅយកកាំភ្លើងគំរាមបាញ់សំលាប់អ្នកសារព័ត៌មានកម្ពុជាអភិវឌ្ឍន៍ម្នាក់ដល់ផ្ទះ បន្ទាប់អ្នកសារព័ត៌មានចុះយកព័ត៌មានករណីបាញ់បោះសេរីនៅស្រុកសាលាក្រៅ ហើយនគរបាលរូបនេះត្រូវកម្លាំងនគរបាលខេត្តប៉ៃលិនចាប់ខ្លួនយកមកស្នងការដ្ឋានខេត្ត នៅយប់ថ្ងៃទី១០ ខែមេសា ឆ្នាំ២០១៦ដើម្បីដាក់ទោសទ័ណ្ឌតាមផ្លូវច្បាប់។
ជនរងគ្រោះ ឈ្មោះ អ៊ុក ទូច ភេទប្រុស អាយុ៤៣ឆ្នាំ ជាភ្នាក់ងារសារព័ត៌មានកម្ពុជាអភិវឌ្ឍន៍ រស់នៅភូមិអូររអិល ឃុំស្ទឹងកាច់ ស្រុកសាលាក្រៅ បានឲ្យដឹងកាលព្រឹកថ្ងៃទី១១ ខែមេសា ឆ្នាំ២១៦ថា នៅព្រឹកថ្ងៃទី១០ខែមេសាឆ្នាំ២០១៦មានប្រជាពលរដ្ឋប្រាប់ថាកាលពីម៉ោង៩ និង៣០នាទីយប់ថ្ងៃទី០៤ ខែមេសា ឆ្នាំ២០១៦ កន្លងទៅ មានបុរសម្នាក់ ឈ្មោះ ឃា សុខន ហៅក្តាម ភេទប្រុស អាយុប្រហែល២៨ឆ្នាំ ជាមន្ត្រីនគរបាលប្រចាំនៅស្រុកសាលាក្រៅ បាននាំគ្នាផឹកស៊ីស្រវឹងជាមួយមិត្តភក្តិរួចយកកាំ ភ្លើងអាកាស្វាយបត់បាញ់ចូលទៅក្នុងផ្ទះប្រជាពលរដ្ឋមួយកន្លែងអស់ ចំនួន៤គ្រាប់ នៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ ។ តែមិនបណ្តាលឱ្យរងរបួសនរណាម្នាក់នោះឡើយ គ្រាន់តែព្រលឹងចុងសក់ ហើយរើសបានសំបកគ្រាប់ចំនួន៤ និងក្បាលគ្រាប់១ផងដែរ ។
ក្រោយទទួលព័ត៌មានអ្នកសារព័ត៌មាន៣នាក់ចុះទៅយកព័ត៌មាននៅស្រុកសាលាក្រៅ មានទី១. ឈ្មោះ អ៊ុក ទូច ភ្នាក់ងារកាសែតកម្ពុជាអភិវឌ្ឍន៍ រស់នៅភូមិខាងលើ ទី២. ឈ្មោះ អៀង សារ៉ូន្នីយ៉ា ភេទប្រុស អាយុ៣៧ឆ្នាំ ជាភ្នាក់ងារសារព័ត៌ មានទូរទស្សន៍ប៉ុស្តិ៍លេខ៥ និងទី៣. ឈ្មោះ ឡោ សុខហៃ ភេទប្រុស អាយុ៤៥ឆ្នាំ ជាភ្នាក់ងារសារព័ត៌មានទូរទស្សន៍ប៉ុស្តិ៍អប្សរាANN ទាំងពីរនាក់រស់នៅក្រុងប៉ៃលិន ។ បន្ទាប់ពីយកព័ត៌មានក្រុមអ្នកសារព័ត៌មានបានត្រឡប់មកវិញដោយបែកផ្លូវទៅផ្ទះរាងខ្លួន ចំណែកខ្ញុំជាជនរងគ្រោះ ត្រូវមន្ត្រីនគរបាលស្រុកសាលាក្រៅម្នាក់ ជិះម៉ូតូយកកាំភ្លើងម៉ាក អាកាស្វាយបត់ ទៅគម្រាមប៉ងបាញ់សម្លាប់នៅក្នុងផ្ទះ តែត្រូវខ្លួនជាជនរងគ្រោះព្យាយាមសម្របសម្រួលអង្វរ ឲ្យនគរបាលឈ្មោះ ឃា សុខន ឈប់ធ្វើបាបខ្លួន នឹងព្រមលុបរូបភាព និងឯកសារពាក់ព័ន្ធករណីបាញ់បោះសេរីចោលមិនចុះផ្សាយទេ ក្រោយការសម្របសម្រួលគ្នា ជនសង្ស័យបានត្រឡប់ទៅវិញតែម្តង កាលពីវេលាម៉ោង៥ និង២០នាទីល្ងាច ថ្ងៃទី១០ ខែមេសា ឆ្នាំ២០១៦។
ពាក់ព័ន្ធករណីបាញ់បោះសេរីនិងភ្ជង់បាញ់សម្លាប់អ្នកសារព័ត៌មានខាងលើ លោកជា ចាន់ ឌិន ស្នងការនគរបាលខេត្តប៉ៃលិនបានប្រាប់អ្នកយកព័ត៌មាននៅព្រឹកថ្ងៃទី១១ ខែមេសា ឆ្នាំ២០១៦ថា មន្ត្រីនគរបាលបាញ់បោះសេរីត្រូវបានចាប់់ខ្លួន តាំងពីយប់់ថ្ងៃទី១០ ខែមេសា ឆ្នាំ២០១៦ ដាក់ទោសទ័ណ្ឌកម្មតាមវិន័យនគរបាលជាតិ ហើយបើរកឃើញថា បាញ់ត្រូវគេរបួសនឹងកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់។
គួររំលកផងដែរថា កាលពីខែមិនាឆ្នាំ២០១៦ កន្លងទៅ មានករណី មន្ត្រីសមត្ថកិច្ចនគរបាលស្នងការខេត្តចំនួន២នាក់ បានបាញ់បោះសេរី នៅក្នុងហាងសម្រស់ជាយក្រុង ហើយលោកស្នងការថាដាក់ទោសលើបញ្ឈរជើង និងដកឋានន្តរសក្តិផងដែរ ។ តែពួកគេមិនដល់ថ្នាក់ជាប់គុក ឬច្រវាក់អ្វីនោះឡើយ ។ ការថាចេះតែថា រហូតពេលនេះ នគរបាល២នាក់នោះនៅមានសេរីភាព និងមានចរឹកក្រអើតក្រទមដដែលគ្មានរាងចាល ។ បច្ចុប្បន្ន មានរឿងនគរបាលសាលាក្រៅម្នាក់ទៀត លោកស្នងការថា ចាប់តែជនសង្ស័យនៅអធិការរដ្ឋាននគរបាលស្រុកសាលាក្រៅនៅឡើយ ឬមួយលោក ជា ចាន់ ឌិន កាន់ជើងកូនចៅខិលខូចទាំងនេះ ៕
