ខេត្តបន្ទាយមានជ័យ៖ យុវជនផ្ដាច់គ្រឿងញៀននៅទីបញ្ជាការអាវុធហត្ថខេត្ត បន្ទាយមានជ័យ ឧបនាយករដ្ឋមន្ត្រី កែ គឹមយ៉ាន ចុះសួរសុខទុក្ខនិងចែកអំណោយ នៅព្រឹកថ្ងៃទី៩ ខែមេសា ឆ្នាំ២០១៦។ វត្តមានដ៏ខ្ពង់ខ្ពស់ឧបនាយរដ្ឋមន្ត្រី កែ គឹមយ៉ាន ប្រធានអាជ្ជាធរជាតិប្រយុទ្ធប្រឆាំងគ្រឿងញៀន ឯកឧត្ដម សួន បវរ អភិបាលខេត្ត បន្ទាយមានជ័យ និងមន្ត្រីអមដំណើរជាច្រើននាក់ទៀតបានចុះមកសួរសុខទុក្ខនិងចែកអំណោយដល់យុវជនកំពុងអប់រំស្តារនិតិសម្បទាផ្តាច់គ្រឿងញៀននៅទីបញ្ជាការកងរាជអាវុធហត្ថខេត្ត។
ជាក់ស្តែងមានចំនួន១៧៨នាក់និងមណ្ឌលភ្នំបាក់ចំនួន២៤៧នាក់។លោកឧត្តមសេនីយ៍ត្រី ឱ បូរិន្ទ បានអានរបាយការណ៍ស្តីពីយុវជនផ្តាច់គ្រឿងញៀនថា នៅទីបញ្ជារការកងរាជអាវុធហត្ថខេត្តចាប់ពីឆ្នាំ២០០២មកទល់សព្វថ្ងៃនេះសរុបមានចំនួន៣.០៣៩នាក់បន្សាបគ្រឿងញៀនហើយឲ្យវិលត្រឡប់ទៅផ្ទះវិញមានចំនួន២.៨៦១នាក់
នៅសល់ជាក់ស្តែង១៧៨នាក់កំពុងតែធ្វើការបន្សាបន្ត។
លោកឧត្ដមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថបខេត្ត បានបញ្ជាក់ទៀតថា យុវជនផ្តាច់គ្រឿងញៀនទាំងអស់នោះជាមន្ត្រីរាជការ២នាក់ សិស្ស១៥នាក់ អាជីវករ៤៤នាក់ កម្មករ១០នាក់ យុវជនគ្មានមុខរបរ ៣២នាក់និងយុវជនធម្មតា៦៤នាក់យុវជនទាំងអស់នេះមានកម្មវិធីអប់រំកាយសម្បទាមានដូចជា ការហាត់ប្រាណ និងធ្វើពលកម្មផ្សេងដើម្បីឲ្យចេញសារធាតុពុលក្នុងសារពាង្គកាយ អប់រំចិត្តសាស្ត្រ មានដូចជាអប់រំផ្លូវចិត្ត ការធ្វើប្រឹក្សា ការអប់រំច្បាប់ ការអប់រំអំពីផលប៉ះពាល់នៃការប្រើប្រាស់គ្រឿងញៀន អេដស៍ និងជន្ងឺផ្សេងៗទៀត ការអប់រំអំពីសីលធម៌ សុជីវធម៌ និងគុណធម៌ក្នុងការរស់នៅក្នុងសង្គម ។
លោកឧត្ដមសេនីយ៍ត្រី ឱ បូរិន្ទ បានបញ្ជាក់ទៀតថា សកម្មភាពនិងសមិទ្ធផលជាក់ស្តែងខាងលើនេះធ្វើឲ្យអង្គភាពកងរាជអាវុធហត្ថខេត្តបានទទួលជោគជ័យ ក្នុងនោះក៏មានការណែនាំពីនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជារការកងរាជអាវុធហត្ថលើផ្ទៃប្រទេសទៀតផង ។
នៅទីបញ្ចប់នោះ ឧបនាយករដ្ឋមន្ត្រី កែ គឹមយ៉ាន បានធ្វើការកោតសរសើដល់អង្គភាពអាវុធហត្ថខេត្តបន្ទាយមានជ័យ ដែលខិតខំយកអស់កំលាំងកាយចិត្តនិងរកគ្រប់វិធីសាស្ត្រផ្សេងៗទៀតដើម្បីយកមកអប់រំដល់យុវជនផ្តាច់គ្រឿងញៀន។
ឧបនាយករដ្ឋមន្ត្រី កែ គឹមយ៉ាន បានធ្វើការផ្តាំផ្ញើដល់យុវជនទាំងអស់ក្រោយចេញពីកន្លែងមណ្ឌលផ្តាច់គ្រឿងញៀនហើយនោះត្រូវចេះកែខ្លួនឲ្យបានល្អដើម្បីប្រែក្លាយខ្លួនទៅជាកូនល្អ មនុស្សល្អ និងជាធនធានមនុស្សដែលប្រទេសជាតិចង់បានជាទីបំផុត។
ក្នុងឱកាសនោះដែរ ឧបនាយករដ្ឋមន្ត្រី កែ គឹមយ៉ាន បានផ្តាំផ្ញើដល់កងកំលាំងអាវុធហត្ថទាំងអស់ត្រូវយកចិត្តទុកដាក់ការពារសន្តិសុខសណ្ដាប់ធ្នាប់ជូនប្រជាពលរដ្ឋ ក្នុងឱកាសបុណ្យចូលឆ្នាំខ្មែរនាពេលខាងមុខនេះ និងជូនពរដល់មន្ត្រីរាជការនិងកងកម្លាំងប្រដាប់អាវុធទាំងអស់និងជនផ្តាច់គ្រឿងញៀនទាំងអស់មានសុខភាពល្អ៕
