បាត់ដំបង ៖ កម្លាំងនគរបាលខេត្តបាត់ដំបងសហការនគរបាលខេត្តព្រះវិហារ ចាប់ខ្លួនបុរសម្នាក់តាមដីការលេខ៧៥ដបខ ចុះថ្ងៃទី២៧ ខែមេសា ឆ្នាំ២០០៦ ដោយលោក ផាន់ វណ្ណរ័ត្ន ចៅក្រមស៊ើបអង្កេតខេត្តបាត់ដំបងពីបទប្លន់ប្រដាប់អាវុធកាល១០ឆ្នាំមុន។ការឃាត់ខ្លួននៅក្បែរបន្ទាយយោធា នាថ្ងៃទី១០ ខែមីនា ឆ្នាំ២០១៦ វេលាម៉ោង១២ និង ៣០នាទី នៅភូមិស្រអែមជើង ឃុំស្រអែម ស្រុកជាំក្សាន្តខេត្តព្រះវិហារ។
គួរបញ្ជាក់ដែរថានៅថ្ងៃទី១៨ ខែមេសា ឆ្នាំ២០០៦ អស់រយៈពេលជិត១០ឆ្នាំក្រុមចោរប្លន់៤នាក់ប្រដាប់អាវុធមួយ ក្រុមបានធ្វើសកម្មភាពប្លន់ផ្ទះឈ្មោះញឹមសុគុណអាយុ៥៦ឆ្នាំនៅចំនុចភូមិ បន្សាយត្រែង ឃុំបន្សាយត្រែង ស្រុកថ្មគោលខេត្តបាត់ដំបង (ប្លន់គំនុំសម្លាប់ឬឃាតកម្មគិតទុកជាមុន) ដោយកាលនោះក៏មានការបាញ់តបតគ្នារវាងក្រុមចោរមានគ្នា៤នាក់បាញ់រះតបតកំលាំងសមត្ថកិច្ចបណ្តាលអោយចំប្រជាពលេដ្ឋម្នាក់ឈ្មោះ អឿន អ៊ុយ អាយុ២១ឆ្នាំស្លាប់។ ប៉ុន្តែការព្យាយាម និងតស៊ូរបស់សមត្ថកិច្ចក្នុងការទប់ស្កាត់បទល្មើសទើបកំលាំងសមត្ថកិច្ចធ្វើការឡោមព័ទ្ធចាប់ខ្លួនបានក្រុមចោរចំនួន២នាក់និងបាញ់ស្លាប់ម្នាក់នៅនឹងកន្លែងកើតហេតុដោយឡែកបក្ខពួករបស់ក្រុមចោរម្នាក់ទៀតដែលមានឈ្មោះរិនរ៉ើនភេទប្រុសអាយុ៤៤ឆ្នាំ មានទីលំនៅនៅភូមិព្រៃផ្តៅ ឃុំតាគ្រាម ស្រុកបាណន់ខេត្តបាត់ដំបងបានរត់គេចខ្លួនបាត់ស្រមោល ប៉ុន្តែក្រោយមកទើបសមត្ថកិច្ចបានទទួលដំណឹងថាជនសង្ស័យរូបនេះបានទៅសំងំលាក់ខ្លួនរស់នៅ ក្នុងខេត្តឧត្តរមានជ័យ និងបន្តទៅខេត្តព្រះវិហារ។
ពិរុទ្ធជនឈ្មោះ រិន វ៉ើន ត្រូវតុលាការចេញដីការឲ្យចាប់ខ្លួននិងផ្តន្ទាទោស ឲ្យជាប់ពន្ធនាគាររយៈពេល២០ឆ្នាំ គិតចាប់តាំងពីថ្ងៃទទួលទោសក្នុងពន្ធធនាគារ។
លោកវរសេនីយ៍ទោ អូន ហ្វៃ នាយការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគបាលខេត្ត ក្រោយពីទទួលបានព័ត៌មាននេះនិងព្រមទាំងមានដីការបានដឹកនាំកំលាំងជំនាញចុះតាមចាប់ខ្លួនជនឈ្មោះ រិន វ៉ើន ដែលមានទីលំនៅនៅភូមិព្រៃផ្តៅ ឃុំតាគ្រាម ស្រុកបាណន់ ខេត្ត បាត់ដំបងតែរកមិនឃើញ។
ក្រោយស្រាវជ្រាវដឹង ក៏មានការសហការរវាងអាជ្ញាធរខេត្តព្រះវិហា មានលោកឧត្តមសេនីយ៏ ស៊ី គីរី ស្នងការនគរបាលខេត្ត ព្រះវិហា និងសហការជាមួយលោកអធិការ ស្រុកជាំក្សាន្ត នាថ្ងៃទី១០ ខែមីនា ឆ្នាំ២០១៦ វេលាម៉ោង១២ និង ៣០នាទី នៅភូមិស្រអែមជើង ឃុំស្រអែម ស្រុកជាំក្សាន្ត សំរេចចាប់ខ្លួនបានពិរុទ្ធជននេះតែម្តងនិងឆែកឆេរផ្ទះ រកឃើញអាវុធវែងធុន AK និងធុនCKC ព្រមទាំងគ្រាប់ចំនួន៣០គ្រាប់និងបាននាំខ្លួនមកកាន់ស្នងការដ្ឋាននគរបាលខេត្ត បាត់ដំបងដើម្បី់បញ្ជូនបន្តទៅកាន់សាលាដំបូងខេត្តហើយ ៕
