ខេត្តបន្ទាយមានជ័យ ៖ សិក្ខាសាលាស្តីពីការផ្សព្វផ្សាយនិងធ្វើការវាយតំលៃអំពីទីក្រុងស្អាតថ្នាក់ខេត្តលើស្តង់ដាសាលាស្អាត ស្តង់ដាផ្សារស្អាត និងទីក្រុងស្អាត ព្រឹកថ្ងៃទី១០ខែមិនាឆ្នាំ២០១៦ នៅសាលប្រជុំក្នុងមន្ទីរអប់រំខេត្តបន្ទាយមានជ័យ។
ពិធីនេះមានការចូលរួម លោក អ៊ុំ រាត្រី អភិបាលរងខេត្តបន្ទាយមានជ័យ លោក ស្រីចាន់ ថេង អភិបាលក្រុងសិរីសោភ័ណ លោក ឈើយ ចាន់ណា ប្រធានមន្ទីរអប់រំខេត្តបន្ទាយមានជ័យ ប្រធានផ្សារ មន្ទីរជំនាញពាក់ព័ន្ធក្នុងខេត្ត មន្ត្រីក្រុងស្រុកទាំង៩ សាខាសាកលវិទ្យាល័យទាំង៤វិទ្យាល័យបានចូលរួមសរុបចំនួន៣៤០នាក់ ។
ក្នុងសិក្ខានោះ លោក ឈើយ ចាន់ណា បានមានប្រសាសន៍ថាការបើកសិក្ខាសាលាស្តីពីការផ្សព្វផ្សាយនិងធ្វើការវាយតំលៃទីក្រុងស្អាត សាលាស្អាត និងផ្សារស្អាតនោះមានគោលបំណងដើម្បីជំរុញគ្រប់ផ្សារទាំងអស់ឆ្ពោះទៅរកភាពបៃតង និងមានបរិស្ថានស្អាត ព្រមទាំងអាចបញ្ជ្រាបចំណេះដឹងទៅដល់ អាជីវករ និងអតិភិជនឲ្យមានការយល់ដឹងទៅលើការថែរក្សា បរិស្ថាន និងផលប៉ះពាល់ក្នុងការប្រើប្រាស់ថង់ប្លាស្ទិចនិងចង់បណ្តុះគំនិតឲ្យប្រជាពលរដ្ឋចេះស្រឡាញ់បរិស្ថាននិងម្យ៉ាងវិញទៀត សិក្ខាសាលានេះបានជំរុញលើកទឹកចិត្តឲ្យគ្រប់ផ្សារមានគំនិតប្រឡងប្រណាំងក្នុងការដណ្តើមកេរ្តិ៍ឈ្មោះថាជាផ្សារមានបរិស្ថានស្អាតនិងមានរបៀបរាបរយ ។
លោក ឈើយ ចាន់ណា បានបញ្ជាក់ទៀតថា ក្នុងសិក្ខាសាលនេះផងដែរក៏ចង់បណ្តុះផ្នាត់គំនិតរបស់សិស្សនុសិស្ស និស្សិត និងយុវជនជំនាន់ក្រោយឲ្យបានយល់ដឹងពីការថែរក្សានិងការពារបរិស្ថានដែលនៅជុំវិញខ្លួនឲ្យបានស្អាតល្អ និងឲ្យបានយល់ដឹងអំពីផលប៉ះពាល់ដែលបណ្តាលមកពីបរិស្ថានមិនល្អ និងបណ្តុះគំនិតប្រជាពលរដ្ឋឲ្យបានយល់ដឹងអំពីអត្ថប្រយោជន៍និងផលប៉ះពាល់ក្នុងការទុកដាក់កាកសំណល់ ផលប៉ះពាល់នៃការថង់ប្លាស្ទិចនិងឲ្យបានយល់អំពីអត្ថប្រយោជន៍ដើមឈើជាដើម ។
ក្នុងសិក្ខាសាលានោះដែរ លោក អ៊ុំ រាត្រី ក៏បានមានប្រសាសន៍ដែថាការប្រឡងប្រណាំងទីក្រុងស្អាត ផ្សារស្អាត និងសាលាស្អាតនោះប្រជាពលរដ្ឋទាំងអស់ត្រូវនាំគ្នាចូលរួនអំពីផលប៉ះពាល់បរិស្ថានដូចជា ត្រូវចូលរួមដើររើសថង់ប្លាស្ទិចនិងសំរាមនៅទីប្រជនជុំវិញផ្ទះនិងនៅតាមទីសាធារណះយកទៅដាក់ចូលក្នុងធុងសំរាម ប្រមូលដុតឲ្យបានស្អាត ប្រមូលសំរាមវិចខ្ចប់ឲ្យបានស្អាតយកទៅដាក់ក្នុងធុងសំរាមដើម្បីឲ្យរថយន្តដឹកសំរាមយកទៅចាក់ចោលនៅទីវាលចាក់សំរាមជាដើម។
លោក អ៊ុំ រាត្រី បានបញ្ជាក់ទៀតថាស្តង់ដាសាលានិងផ្សារស្អាតលុះត្រាណាតែសាលានិងផ្សារនោះពុំមានសំរាមនៅជុំវិញសាលានិងផ្សារត្រូវចេះគ្រប់គ្រងកាកសំណល់រឹងរាវឲ្យបានល្អត្រូវចេះថែរក្សាបរិស្ថានធ្វើយ៉ាណាថែរក្សានូវភាពបៃតងជានិច្ច។ លោក អ៊ុំ រាត្រីបានបញ្ជាក់ទៀតថាថ្ងៃនោះ លោក បានចូលរួមសិក្ខាសាលាស្តីពីការវាយតំលៃទីក្រុងស្អាត ផ្សារស្អាត និងសាលារៀនស្អាននេះគឺដើម្បីចូលរួមប្រឡងប្រណាំងទីក្រុងស្អាតនៅពេលខាងមុខនេះដើម្បីឲ្យទទួលបាននូវផ្ការំដួល៣ទងឲ្យបានដាច់ខាត៕
