រាជធានីភ្នំពេញ៖ លោក ហ៊ុន សុធី អធិការខណ្ឌទួលគោក ក្រោមការបញ្ជារលោក ខាំ សុផារី ព្រះរាជអាជ្ញារងបានដឹកនាំកម្លាំង នគរបាលបង្ក្រាបឃាត់ខ្លួនបុរស២នាក់ និងដកហូតថ្នាំញៀន ៦កញ្ចប់ធំស្មើនឹងជាងកន្លះគីឡូក្រាមនិងសម្ភារៈមួយចំនួនទៀតកាលពីវេលាម៉ោង៤នឹង៥០នាទីល្ងាច ថ្ងៃទី៧ ខែមីនា ឆ្នាំ២០១៦ នៅក្នុងផ្ទះសំណាក់ខាំហ្វតហោស(Comfort House) ជាន់ទី២ស្ថិតនៅតាមបណ្តោយផ្លូវ១១២ សង្កាត់ផ្សារដេប៉ូ៣ ខណ្ឌទួលគោក។
លោកហ៊ុនសុធីអធិការខណ្ឌទួលគោកបានអោយដឹងថាបុរសសង្ស័យទាំង២នាក់ដែលសមត្ថកិច្ចធ្វើការឃាត់ខ្លួនមាន៖ ទី១ឈ្មោះគឹម សុខហៃ ហៅហៃ អាយុ២០ឆ្នាំ ស្នាក់នៅម្តុំផ្សារឌុយមិច សង្កាត់មោរម្យ ខណ្ឌ៧មករា ទី២ឈ្មោះសុខ លីន ហៅកក្តដា អាយុ២៥ឆ្នាំ ទីលំនៅមិនពិតប្រាកដ។ ដកហូតថ្នាំញៀន ៦កញ្ចប់ធំស្មើនឹងជាងកន្លះគីឡូក្រាមនិងសម្ភារៈ ជញ្ជីងសំរាប់ថ្លឹងគ្រឿងញៀនម៉ាក Poket Scal ចំនួន០១គ្រឿង ទូរស័ព្ទចំនួន០៤គ្រឿង ខ្សែកលោហធាតុស្លេក ០១ខ្សែមានបន្តោងរូបព្រះពុទ្ធ ដបទឹកបរិសុទ្ធកែច្នៃជាឧបករណ៍ សំរាប់ជក់គ្រឿងញៀនចំនួន០១ ក្បាលកែវសំរាប់ជក់គ្រឿងញៀនចំនួន០២ និងដងកែវចំនួន៣។
លោក ហ៊ុន សុធី បានបន្តអោយដឹងទៀតថាការដែលសមត្ថកិច្ចនៃអធិការដ្ឋាននរគបាលខណ្ឌទួលគោកចុះបង្ក្រាបបាននៅពេលនេះដោយមានការសហការពីបណ្តាញសម្ងាត់និងកម្លាំងរបស់់លោកបានចុះបង្ក្រាបទប់ស្កាត់មិនអោយជនសង្ស័យចែកចាយដល់អ្នកប្រើប្រាស់បានឡើយនិងរក្សាសុខសន្តិភាពជូនប្រជាពលរដ្ឋក្នុងមូលដ្ឋានស្របតាមគោលនយោបាយភូមិឃុំមានសុវត្ថិភាពទាំង៩ចំណុចផងដែរ។ ក្រោយពេលសមត្ថកិច្ចឃាត់ខ្លួនជនសង្ស័យទាំង២នាក់ រួមទាំងដកហូតបានថ្នាំញៀនជាងកន្លះគីឡូក្រាមរួចក៏បានដឹកយកជនសង្ស័យទាំង២នាក់យកទៅកាន់អធិការខណ្ឌទួលគោកដើម្បីសាកសួរនឹងស្វែងរកតាមចាប់បក្សពួកក្រុមនេះបន្តទៀតផងដែរ។
បច្ចុប្បន្នជនសង្ស័យទាំង២នាក់ខាងលើ កំពុងឃាត់ខ្លួនជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅតុលាការ ចាត់ការតាមនិតិវិធី ៕
