កំពង់ឆ្នាំង៖ ប្រភពដែលគូរអោយទុកចិត្តបាន លក្ខខណ្ឌសុំមិនបញ្ចេញឈ្មោះ បានអោយដឹងថាអធិការស្រុកបរិបូណ៌ លោក ជាង វណ្ណារិទ្ធិ ត្រូវបានអង្គភាពប្រឆាំងអំពើពុករលួយយកោះអញ្ចើញអោយចូលខ្លួនសាកសួរ ដំណើរឿងពុក រលួយ នៅព្រឹកថ្ងៃទី១៩ ខែឧសភា ឆ្នាំ២០១៤ នៅអង្គភាពប្រឆាំងអំពើពុករលួយរាជធានីភ្នំពេញ ។
ប្រភពខាងលើបានបន្តអោយដឹងថា អង្គភាពប្រឆាំងអំពើពុករលួយបានកោះអញ្ចើញអធិការរូបនេះក្រោយពីមាន អ្នកចេញមុខ រាយការណ៍ភាពមិនប្រក្រតីជាច្រើនករណី ហើយអង្គភាពប្រឆាំងអំពើពុករលួយក៍បាន បញ្ជូនមន្ត្រីអធិការកិច្ចរបស់ខ្លួនចុះមកខេត្តកំពង់ឆ្នាំង ដើម្បីស៊ើបអង្កេត និងស្រាវជ្រាវកាលពីសប្តាហ៍មុន រួចមកហើយផងដែរ។
សេចក្តីរាយការណ៍បានអោយដឹងផងដែរថា លោកជាង វណ្ណារិទ្ធិ អធិការស្រុកបរិបូណ៌រូបនេះជាប់ពាក់ព័ន្ធក្នុង ការបង្កើតអោយមានល្បែងស៊ីសងគ្រប់ប្រភេទ និង ការចរាចរណ៍គ្រឿងញៀន ថ្នូរដោយទទួលយកភាគរយពីជនល្មើស ហើយកន្លងមកនេះនៅក្នុងស្រុកបរិបួណ៌ គេសង្កេតឃើញមានកើតករណីចោរកម្មលួចទ្រព្យសម្បត្តិប្រជាពលរដ្ឋដូចជា ម៉ូតូ និងទ្រព្យសម្បត្តិផ្សេងៗទៀតជាច្រើនករណី មិនតែប៉ុណ្ណោះអធិការរូបនេះ បានដោះស្រាយសំណុំរឿងព្រហ្មទណ្ឌ សំណុំរឿងគ្រោះថ្នាក់ចរាចរណ៍ក្រៅប្រព័ន្ធច្បាប់ជាច្រើនករណី បទល្មើសនេសាទ បទល្មើសព្រៃឈើ ក្នុងស្រុកបរិបូណ៌ទាំងមូល ត្រូវបានលោកអធិការប្រមូលលុយស៊ីដាច់កូនចៅជាច្រើនកន្លែង ហើយកន្លងមកនេះនៅក្នុងឆ្នាំ២០១០ ដល់២០១១ ខណៈពេលក្រសួងមហាផ្ទៃបានអនុញ្ញាតអោយបន្ថែមមន្ត្រីនគរបាលប៉ុស្តិ៍ មូលដ្ឋាន គឺលោក អធិការស្រុកបានរើសយកអ្នកដែលមានលុយរត់ការក្នុងម្នា ក់ៗចាប់ពី១ពាន់៥រយដុល្លារឡើងទៅ ក្នុងការដោះបន្ទុកសំណុំរឿងកន្លងទៅថ្មីៗក្នុងឆ្នាំ២០១៣-២០១៤ លោកអធិការបានក្រឡៃពីខ្មៅទៅស ដើម្បីទទួលលាភសក្ការៈ និងនៅមានរឿងរ៉ាវមិនប្រក្រតីជាច្រើនទៀតរាប់មិនអស់ ដែលពាក់ព័ន្ធនិងលោកអធិការស្រុករូបនេះ ទើបមានការរាយករណ៍ទៅអង្គភាពប្រឆាំងអំពើពុករលួយចុះស៊ើបអង្កេត និងស្រាវជ្រាវតែម្តង ។
ប្រភពពត៌មានពីក្នុងអធិការដ្ឋាននគរបាលស្រុកបរិបូណ៌បានបង្ហើប អោយដឹងផងដែរថា ក្រោយពីមានការកោះអញ្ចើញ ហៅទៅសាកសួររបស់អង្គភាពប្រឆាំងអំពើពុករលួយរួចមក លោកជាង វណ្ណារិទ្ធិ អធិការនគរបាលស្រុករូបនេះ បានស្វះស្វែងដុតដៃដុតជើងអោយមន្ត្រីក្រោមឱវាទរបស់ខ្លួនផ្តិតមេដៃ គាំទ្ររូប លោក និងបញ្ជាក់ថាលោកស្អាតស្អំ មិនមានពាក់ព័ន្ធនិងអំពើពុករលួយឡើយ តែទោះបីយ៉ាងណាក៍ដោយ ការផ្តិតមេដៃរបស់មន្ត្រីក្រោយឱវាទគឺធ្វើឡើងដោយការទើសទ័ល ជាទីបំផុត ព្រោះ អ្នកក្រោមឱវាទនៅកោតញញើតអំណាចលោកជាង វណ្ណារិទ្ធិ ហើយខ្លះគិតថាបើមិនផ្តិតមេដៃ តិចលោ លោក ជាង វណ្ណារិទ្ធិ មិនត្រូវបានអង្គភាពប្រឆាំងអំពើពុករលួយចាត់ការទេនោះ ពេលបានវិលមកវិញពិតជាពិបាកខ្លួនហើយ បើមិនបានផ្តិតមេដៃអោយនោះទេ ។
ពាក់ព័ន្ធទៅនឹងពត៌មានខាងលើ លោក ជាង វណ្ណារិទ្ធិបានប្រាប់អ្នកយកពត៌មានយើងតាមរយៈទូរស័ព្ទនោះរសៀលថ្ងៃ ទី២៣ ខែឧសភា ឆ្នាំ២០១៤ អោយដឹងថាអង្គភាព ACU កោះ អញ្ជើញរឿងផ្ទាល់ខ្លួនទេ មិនមានបញ្ហាអ្វីនោះឡើយ តាមពិត ACU កោះហៅតាមលិខិតអាណាមិក ដែលចោទប្រកាន់មកលើរូបលោក ទើបតម្រូវអោយមានការស្រាយបំភ្លឺនៅអង្គភាពប្រឆាំងអំពើពុករលួយ តែម្តង ។
លោក ជាង វណ្ណារិទ្ធិបានបញ្ជាក់ថា លោកមិនដែលប្រព្រឹត្តិអ្វីខុសដូចការចោទប្រកាន់ឡើយ រីឯល្បែងស៊ីសងឬគ្រឿងញៀន គឺមានតិចតួចបំផុតដោយសារតែពួកក្រុម ជនល្មើសលួចលាក់ លេងបន្តិចបន្តួច ។ ប្រជាពលរដ្ឋ នៅក្នុងខេត្តកំពង់ឆ្នាំង ពិសេសក្នុងស្រុកបរិបូណ៌ ដែលបានដឹងរឿងនេះ កំពុងទន្ទឹងរង់ចាំមើលពីជោគវាសនារបស់ លោក ជាង វណ្ណារិទ្ធិ ថាតើទៅជាយ៉ាងណា?៕
