ភ្នំពេញ ៖ បុរសសង្ស័យម្នាក់ជួញដូរគ្រឿងញៀន និងថ្នាំញៀន៣កញ្ចប់ត្រូវកម្លាំងនគរបាលប៉ុស្តិ៍ចោមចៅ ឃាត់ខ្លួនកំពុងធ្វើសកម្មភាភដោះដូរថ្នាំញៀន រីឯ ជនសង្ស័យម្នាក់ទៀតរត់ គេចខ្លួនបាត់ កាលពីវេលាម៉ោង ៦ល្ងាចថ្ងៃទី០១ ខែមិនា ឆ្នាំ២០១៦ ស្ថិតនៅ តាមផ្លូវជាតិលេខ៣ ភូមិព្រៃព្រីងត្បូង សង្កាត់ចោមចៅ ខណ្ឌពោធិ៍សែនជ័យ ។
លោក នាយប៉ុស្តិ៍ចោមចៅ បានឱ្យដឹងថា បុរសជនសង្ស័យ ដែលសមត្ថកិច្ចឃាត់ខ្លួនមានឈ្មោះ អៀង ផាត អាយុ៤២ឆ្នាំ មុខរបរ រត់ម៉ូតូឌុប ស្នាក់នៅផ្ទះជួល ភូមិព្រៃព្រីងត្បូង ក្បែរកន្លែងកើតហេតុ មានស្រុកកំណើតនៅភូមិព្រៃសិលា ឃុំព្រៃសិលាខាងលិច ស្រុកទូកមាស ខេត្តកំពត ។ ចំណែកថ្នាំញៀន នគរបាលដកហូតបាន ប្រភេទក្រាមសថ្លា ( ម៉ាទឹកកក ) ចំនួន៣កញ្ចប់ តូចដែលជនសង្ស័យដាក់លាក់នៅក្នុងមួក ពាក់លើក្បាល ។
លោក នាយប៉ុស្តិ៍ចោមចៅ បានបន្តថាមុនឃាត់ខ្លួនជនសង្ស័យខាងលើបានគឺ កម្លាំងល្បាត របស់នគរបាលប៉ុស្តិ៍ ចោមចៅ ចេញល្បាតក្នុងភូមិសាស្ត្ររបស់ខ្លួន ក្រោមបញ្ជា របស់នាយស្នងការ រាជធានីភ្នំពេញ និងការបញ្ជាផ្ទាល់ពីលោក យឹម សារ៉ាន់ អធិការនគរបាលខណ្ឌពោធិ៍សែនជ័យ និងដើម្បីរក្សាបាននូវ សន្តិសុខ សុវត្តិភាព ក្នុងមូលដ្ឋានឲ្យបានល្អប្រសើរ នៅវេលាខាងលើកម្លាំង នគរបាលប៉ុស្តិ៍ចោមចៅ ល្បាតជួបប្រទះឃើញជនសង្ស័យ កំពុងធ្វើសកម្មភាព ជួញដូរថ្នាំញៀន សង្ស័យឃាត់សាកសួរ តែត្រូវបាន ជនសង្ស័យម្នាក់ទៀត គេចខ្លួនបាត់ ។
ជនសង្ស័យត្រូវបានកម្លាំងនគរបាល នាំខ្លួនទៅធ្វើការសាកសួរ នៅប៉ុស្តិ៍ចោមចៅក្រោយពីសាកសួរ រួចនិងបញ្ជូនបន្តទៅអធិការដ្ឋានខណ្ឌពោធិ៍សែនជ័យចាត់ការបន្តនិតិវិធី ៕
