ខេត្តបន្ទាយមានជ័យ ៖ កម្លាំងអាវុធហត្ថស្រុកមង្គលបូរីឃាត់ខ្លួនជនសង្ស័យ ៣ នាក់ ដើរចរាចរណ៍ក្រដាស់ប្រាក់ដុល្លាក្លែងក្លាយ នៅវេលាម៉ោង៥ថ្ងៃទី២៥ខែកុម្ភៈឆ្នាំ២០១៦ នៅចំណុចកន្លែងលក់ទូរស័ព្ទយីហោ យីលាភ នៅភូមិ ឃុំ ឫស្សីក្រោក ស្រុកមង្គលបូរី ខេត្តបន្ទាយមានជ័យ។
យោងតាមពាក្យបណ្តឹងរបស់ម្ចាស់ហាងឈ្មោះយីលាភភេទស្រីអាយុ៤២ឆ្នាំបានប្តឹងជនសង្ស័យឈ្មោះ ហុក ដូក នៅថ្ងៃទី១៩ ខែកុម្ភៈ ឆ្នាំ២០១៦ បានមកទិញស៊ីមទូរស័ព្ទនៅផ្ទះខ្លួន ឲ្យក្រដាស់ប្រាក់២០ដុល្លា រួចចេញទៅបាត់ ពេលនោះម្ចាស់ផ្ទះ ទើបដឹងថា ក្រដាស់ប្រាក់នោះ ក្លែងក្លាយទើបទៅដាក់ពាក្យបណ្តឹងទៅកងរាជអាវុធហត្ថស្រុកមង្គលបូរីតែម្តង។
ក្រោយពីទទួលបានពាក្យបណ្តឹងហើយ លុះនៅព្រឹកថ្ងៃទី២៥ ខែកុម្ភៈ ឆ្នាំ២០១៦ ជនសង្ស័យបានមកទិញស៊ីមកាតម្តងទៀត ពេលនោះម្ចាស់ផ្ទះបាន រាយការណ៍ទៅអាវុធហត្ថក្រោយពីបានទទួលព័ត៌មាន ហើយកងកំលាំងអាវុធហត្ថស្រុកមួយក្រុម ដឹកនាំដោយលោកវរៈសេនីយ៍ត្រី រស់ សំបូរ មេបញ្ជាការអាវុធហត្ថស្រុកមង្គលបូរី បានចុះទៅដល់កន្លែងកើតហេតុរួចធ្វើការឃាត់ខ្លួនជនសង្ស័យបានម្នាក់ហើយឈានទៅដល់ឃាត់បក្សពួក២នាក់បន្ថែមទៀតរួចបញ្ជូនមកកងរាជអាវុធហត្ថខេត្តដើម្បីសាកសួរ។
លោកវរៈសេនីយ៍ត្រី ព្រហ្ម ថេង ប្រធានមន្ទីរស្រាវជ្រាវយុត្តិធម៍បានឲ្យដឹងថាជនសង្ស័យ៣នាក់មានឈ្មោះ១/ហុក ដូក ភេទ ប្រុស អាយុ៤៤ឆ្នាំ មុខរបរជាងសំណង់ ទីលំនៅភូមិ ដាក់សរសរ សង្កាត់ ឱម៉ាល់ ក្រុងបាត់ដំបង ខេត្ត បាត់ដំបង។ ២/ឈ្មោះ គី ចិន្តា ភេទ ប្រុស អាយុ២៦ឆ្នាំ មុខរបរកម្មករសំណង់ រស់នៅភូមិ .ឃុំ រកា ស្រុក ពារាំង ខេត្ត ព្រៃវែង ៣/ឈ្មោះ ហៀង ប៉ូច ភេទ ប្រុស អាយុ២៧ ឆ្នាំមុខរបរតៃកុងឡានក្រុមហ៊ុនសំណង់ រស់នៅភូមិ ត្របែក ឃុំ ស្តៅកោង ស្រុក បាភ្នំ ខេត្ត ព្រៃវែង។
អាវុធហត្ថបានដកហូតវត្ថុតាងមានក្រដាស់ប្រាក់ក្លែងក្លាយប្រភេទ២០ដុល្លាចំនួន៤សន្លឹក រថយន្ត១គ្រឿងម៉ាកហ្វតទ្វា៤ ពណ៌ទឹកប្រាក់ ពាក់ស្លាកលេខ ភ្នំពេញ2H0275 ។ ជនសង្ស័យទាំង៣នាក់ត្រូវបានបញ្ជូនខ្លួនទៅតុលាការដើម្បីចាត់ការតាមនិតិវិធី៕
