កំពង់ធំ ៖ បុរស២នាក់ចុះស្ដារទឹកអណ្ដូងចេញដើម្បីអោយមានទឹកប្រើប្រាស់ ដោយចុះជ្រៅ គ្មានខ្យល់អ៊ុកស៊ីសែន បានដាច់ខ្យល់ស្លាប់ភ្លាមៗ នៅរសៀលម៉ោង៤ថ្ងៃទី២៤ ខែកុម្ភៈ ឆ្នាំ២០១៤ នៅចំនុចភូមិថ្នល់បែកឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
បើតាមប្រភពព័ទ៌មានពីសមត្ថកិច្ចបានអោយដឹងថា ជនរងគ្រោះក្រោយពីចុះទៅក្នុងអណ្ដូង១សន្ទុះក្រោយមក ស្រាប់តែទន់ដៃទន់ជើង ស្រែកថាជួយផង ស្រាប់តែអ្នកចុះទៅជួយដល់ក្រោមក៏មានសភាពទន់ដៃទន់ ជើងថប់ដង្ហើមដូចគ្នា ។
អ្នកស្លាប់មានឈ្មោះ សុខ ធន ភេទប្រុស អាយុ៥៤ឆ្នាំ និងអ្នកចុះទៅជួយឈ្មោះសាន គឹមសេង ភេទប្រុស អាយុ២៣ឆ្នាំ ទាំង២នាក់រស់នៅ ភូមិឃុំខាងលើ ក្រោយពីពលរដ្នបានស្រង់រួចបញ្ចូនទៅពេទ្យនោះ គឺជនរងគ្រោះទាំង២ មានអាការៈធ្ងន់ធ្ងរ ដង្ហើមចុងក្រោយ ពេទ្យពុំអាចជួយសង្គ្រោះបានឡើយ ។
ក្រុមសមត្ថកិច្ចធ្វើកោសសលវិច័យបានឲ្យដឹងថា ករណីស្លាប់ខាងលើគឺមកពីចុះអណ្តូងគ្មានអុកស៊ីសែន មិនមែនជាករណីឃាតកម្មទេ ហើយសពប្រគល់អោយសាច់ញាតិក្រុមគ្រួសាររៀបចំដំកល់ធ្វើបុណ្យតាមប្រពៃណី ៕
