ត្បូងឃ្មុំ ៖ បុរសម្នាក់ខឹងម្តាយក្មេកស្តីបន្ទោសបន្តិចបន្តួច យកភ្លើងដុតផ្ទះឆេះអស់គ្មានកន្លែងដេក ហើយត្រូវសមត្ថកិច្ចឃាត់ខ្លួន កាលពីវេលាម៉ោង៧និង២០នាទីព្រឹក ថ្ងៃទី២៣ កុម្ភៈ ២០១៦ ស្ថិតនៅក្នុងភូមិចំបក់ ឃុំត្រពាំងព្រីង ស្រុកតំបែរ ខេត្តត្បូងឃ្មុំ។
មន្ត្រីនគរបាលមូលដ្ឋានបានឲ្យដឹងថា ៖ បុរសចិត្តខ្លាំងនេះមានឈ្មោះណយ ណេត អាយុ៤៣ឆ្នាំ ។ផ្ទះមានទំហំ៦ម៉ែត្រគុណ១១ម៉ែត្រ ដែលសាងសង់អំពីឈើប្រក់ក្បឿង ម៉ូតូចាស់២គ្រឿង ស្រូវចំនួន១០បាវ ប្រាក់២០ម៉ឺនរៀល និងសម្ភារៈមួយចំនួនទៀតត្រូវអគ្គិភ័យឆាបឆេះគ្មានសល់ ។
បុរសចិត្តភ្លើងត្រូវបានសមត្ថកិច្ចឃាត់ខ្លួនដើម្បីធ្វើការសួរនាំនៅអធិការដ្ឋាននគរបាលស្រុកតំបែរ តែដោយសារមានការស្នើសុំពីក្រុមគ្រួសារ សមត្ថកិច្ចបានធ្វើការអប់រំរួចឲ្យត្រឡប់ទៅវិញ គឺមិនបានចោទប្រកាន់នោះទេ ៕
