សៀមរាប ៖ សមត្ថកិច្ចនគរបាលឃាត់ខ្លួនឃាតក ២ នាក់កាត់ក្បាលយុវតីម្នាក់ជាគូដណ្តឹងយកទៅដុតបំផ្លាញភស្តុតាង ក្រោយពីម្តាយខាងស្រីដឹងថាបុរសម្នាក់ជាគូរដណ្តឹងមានប្រពន្ធហើយសុំផ្តាច់ពាក្យ ។
ហេតុការណ៍ភ្ញាក់ផ្អើលមានឃាតកម្មកើតឡើង វេលាម៉ោង៩ព្រឹក ថ្ងៃទី១៣ ខែកុម្ភៈ ឆ្នាំ២០១៦ ផ្លូវផ្សារញ៉ែ នៅបន្ទប់លេខ៣០១ក្នុងផ្ទះសំណាក់ប្រាសាទកែវ ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប ។
ប្រភពពីម្ចាស់ផ្ទះសំណាក់បានឲ្យដឹងថានៅយប់ថ្ងៃទី១២ ខែកុម្ភៈ ឆ្នាំ២០១៦ មានបុរស២នាក់ និងក្មេងស្រីម្នាក់មកស្នាក់នៅ បន្ទប់លេខ២០៩ ដោយមិនបានកត់ឈ្មោះ ឬយកអត្តសញ្ញាណប័ណ្ណឡើយ លុះព្រឹក ថ្ងៃទី១៣ ខែកុម្ភៈ ឆ្នាំ២០១៦ អ្នករៀបបន្ទប់ប្រទះសពយុវតីនៅបន្ទប់៣០១ ដោយបាត់ក្បាល ក៏រាយការជូនសមត្ថកិច្ចតែម្តង ។
ក្រោយពេលទទួលបានព័ត៌មានសមត្ថកិច្ច បានចុះរហូតដល់វេលាម៉ោង១៥និង២០នាទី ថ្ងៃទី១៣ ខែកុម្ភៈ ឆ្នាំ២០១៦ សមត្ថកិច្ចនៃអធិការដ្ឋាននគរបាលក្រុងសៀមរាប សហការជាមួយកម្លាំងនៃការិយាល័យព្រហ្មទណ្ឌកម្រិតធ្ងន់ ក្រោមការចង្អុលបង្ហាញដោយផ្ទាល់ពីលោកឧត្តមសេនីយ៍ទោ ស៊ត ណាឌីស្នងការនគរបាលខេត្តសៀមរាបចុះបានស្រាវជ្រាវរកឃើញម្តាយជនរងគ្រោះឈ្មោះ កេង ធីតា មានទីលំនៅភូមិបឹងខ្នាត ឃុំខ្នាត ស្រុកពួក ខេត្តសៀមរាប បានបំភ្លឺជូនសមត្ថកិច្ចថា ជនរងគ្រោះ(សាកសព) មានឈ្មោះ ឡេន សិលា អាយុ២៤ ឆ្នាំរស់នៅជុំគ្នាបានបាត់ខ្លួនដោយមិនដឹងមូលហេតុរយៈពេល០២ថ្ងៃ ចាប់តាំងពីថ្ងៃទី១១ ខែកុម្ភះ ឆ្នាំ២០១៦ រហូតដល់ថ្ងៃកើតហេតុ។
ក្រោយការស្រាវជ្រាវ និងស៊ើបអង្កេតរហូតឈានដល់ការឃាត់ខ្លួនបុរសជនសង្ស័យម្នាក់ ខណ:ឃាតកកំពុងដុតក្បាលជនរងគ្រោះនៅខាងក្រោយផ្ទះ ជិតព្រលានយន្តហោះស្ថិតនៅភូមិព្រៃចាស់ សង្កាត់គោកចក ក្រុងសៀមរាបជាជនដៃដល់ឈ្មោះ ចាន់ ឆាយយ៉ា ហៅ សំ ភារ៉ាត់ អាយុ ៤០ឆ្នាំ ជាមគ្គុទេសទេសចរណ៍ភាសារថៃ មានស្រុកកំណើត នៅខេត្តបាត់ដំបង ស្នាក់នៅក្រុមទី៣ ភូមិគោកដូង សង្កាត់ទឹកវិល ក្រុងសៀមរាប។
រីឯបក្ខពួកម្នាក់ទៀតតាមចាប់ដល់ផ្ទះ បុរសជនសង្ស័យមានឈ្មោះ ណឹប សិទ្ធ អាយុ២៤ឆ្នាំ ជាអ្នកបើបររថយន្ត រស់នៅភូមិទ្រុំខាងជើង ឃុំជ្រោនាងនួន ស្រុកស្រីស្នំ ខេត្តសៀមរាប។
ជនដៃដល់ឆ្លើយថា គឺធ្លាប់មានទំនាក់ទំនងស្នេហាជាមួយនារីរងគ្រោះ រហូតជិតដល់ថ្ងៃរៀបមង្គលការ ក៏ត្រូវផ្តាច់ពាក្យវិញ ដោយជនរងគ្រោះដឹងថាខ្លួនជនសង្ស័យមានប្រពន្ធកូនរួចទៅហើយ ទើបខឹងប្រើអំពើហឹង្សាបែបនេះ ។ ដោយមានរៀបចំឧបករណ៍ជាប់ជាមួយស្រេច លុះយប់ជ្រៅបន្តិចជនសង្ស័យបានយកក្រម៉ារិតកសម្លាប់ជនរងគ្រោះរួច កាត់ក្បាលច្រកក្នុងកាបូបដែលខ្លួនរៀបចំទុក រួចយកភួយមករុំសពជនរងគ្រោះរួចអូសយកទៅលាក់ក្រោមគ្រែបន្ទប់លេខ ៣០១ រួចក៏គេចខ្លួនតែម្តង ៕
