ខេត្តរតនៈគិរី ៖ កំលាំងរដ្ឋបាលព្រៃឈើប្រចាំផ្នែក ៣ ស្រុក មានស្រុកបរកែវស្រុកអូរយ៉ាដាវ និងស្រុកអណ្តូងមាសរុករកឃើញគំនរឈើប្រណិតមានចំនួន ១៨១ ដុំ ស្មើនឹង៩០ម៉ែត្រគូប ដែលឈ្មួញលាក់ទុកក្នុងគម្ពោតព្រៃ នៅព្រឹកថ្ងៃទី១៨ ខែមករា ឆ្នាំ២០១៦ តាមបណ្តោយមាត់ទន្លេសេសាន្ត ក្នុងភូមិសាស្ត្រឃុំតាឡាវស្រុកអណ្តូងមាស ។
បន្ទាប់ពីមានបទបញ្ជាពីប្រមុខរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រកាសបង្កើតគណៈកម្មាការបង្ក្រាបព្រៃឈើ និងទប់ស្កាត់ការនាំចេញឈើខុសច្បាប់របស់ ឧកញ៉ា លឹម ប៊ុណ្ណា ហៅខ្នា និងឧកញ៉ា សឹង សំអុល នៅក្នុងស្រុកមេមត់ ខេត្តត្បូងឃ្មុំ កាលពីថ្ងៃទី១៥ខែមករាកន្លងមក។
បើតាមការឱ្យដឹងពីលោក ឡេង យុគនាយផ្នែករដ្ឋបាលព្រៃឈើបរកែវ អណ្តូងមាស និងអូរយ៉ាដាវដែលដឹកនាំកម្លាំងចុះល្បាតតាមបណ្តោយមាត់ទន្លេសេសាន្តក្នុងភូមិសាស្ត្រឃុំតាឡាវស្រុកអណ្តូងមាសក៏បានប្រទះឃើញគំនរឈើប្រណិតនោះតែម្តងរាប់រយកំណាត់សុទ្ធសឹងជាប្រភេទឈើ(សុក្រំកកោះនិងគគីរ)ឡាំងបួនជ្រុង ។
តាមការវាស់វែងឈើប្រណិតដែលត្រូវដកហូតបានមានចំនួន១៨១ដុំ ស្មើនឹង៩០ម៉ែត្រគូប (មុខកាត់និងប្រវែងចម្រុះ) ។
បច្ចុប្បន្នឈើទាំងអស់នេះ លោកបានដឹកជញ្ជូនមកផ្ញើរទុកនៅក្នុងក្រុមហ៊ុនដីសម្បទានសេដ្ឋកិច្ចហ័ងអាញ់អូរយ៉ាដាវ ដោយសារការដឹកជញ្ជូនមានការស្មុគស្មាញ នឹងលំបាកឆ្លងទឹកទន្លេសេសាន្ត ។
បើតាមប្រភពពីប្រជាពលរដ្ឋ ដែលរស់នៅតាមតំបន់ដែលមានក្រុមហ៊ុនកាប់ទន្ទ្រានព្រៃនានា ក្នុងខេត្តរតនៈគិរីបានបង្ហើបថា នៅក្នុងក្រុមហ៊ុនទាំងនោះភាគច្រើនសុទ្ធសឹងជាក្រុមហ៊ុនដែលធ្វើជំនួញបទល្មើសព្រៃឈើក្រោមលេសវិនិយោគអភិវឌ្ឍន៍វិសយ័ដំណាំកសិឧស្សាហកម្ម ។ ហើយក៏បានប្រព្រឹត្តបទល្មើសព្រៃឈើយ៉ាងអនាធិបតេយ្យផងដែរ ថែមទាំងមានការដឹកជញ្ជូនតាមរថយន្តយីឌុបមួយជើងៗរាប់សិបគ្រឿង លើសទំងន់បង្ករការបាក់ស្រុតផ្លូវលំនិងផ្លូវជាតិទៀតផងដោយមិនគោរពលក្ខ័ន្តិកៈការវិនិយោគនោះឡើយ ៕
