ខេត្តបន្ទាយមានជ័យ ៖ អាវុធហត្ថក្រុងខេត្តបន្ទាយមានជ័យ បញ្ជូនបុរសម្នាក់ចូលលួចទ្រព្យសម្បត្តិអ្នកដ៏ទៃ កសាងសំណុំរឿង ពីបទលួចទៅតុលាកាថ្ងៃទី១៤ ខែមករា ឆ្នាំ២០១៦ ចាត់ការតាមនិតិវិធី។
បុរសសង្ស័យត្រូវសមត្ថកិច្ចអាវុធហត្ថក្រុងប៉ោយប៉ែតឃាត់ខ្លួននៅវេលាម៉ោង៩យប់ថ្ងៃទី១៣ ខែមករា ឆ្នាំ២០១៦ នៅចំណុចភូមិអូរនាង សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យ បានឲ្យដឹងថាយោងតាមពាក្យបណ្តឹងរបស់ឈ្មោះ ហ៊ុន សម្បត្តិ ភេទ ប្រុស អាយុ៤៥ឆ្នាំ រស់នៅក្នុងភូមិ អូរនាង សង្កាត់ ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បានប្តឹងឈ្មោះ ង៉ែត វល័ក្ខ ភេទប្រុស អាយុ២៦ឆ្នាំ បានចូលលួចទ្រព្យសម្បត្តិរបស់ខ្លួនមានដូចជា ១/ ប័ណ្ណបើកបរចំនួន១សន្លឹក។ ២/ អត្តសញ្ញាណប័ណ្ណសញ្ជាតិខ្មែរ១សន្លឹក។ ៣/ប័ណ្ណសារព័ត៌មានចំនួន២សន្លឹក ៤/កាតសំរាប់បញ្ជូលទឹកប្រាក់ទូរស័ព្ទមួយចំនួន ។៥/ប្រាក់ដុល្លាចំនួន១៦០ដុល្លា ៦/ប្រាក់បាទចំនួន១.០០០បាត និងប្រាក់ខ្មែរមួយចំនួនធំ។
លោកឧត្ដមសេនីយ៍ត្រី ឱ បូរិន្ទ បញ្ជាក់ទៀតថាក្រោយពីបានទទួលពាក្យបណ្តឹងរួចមកលោកបានចាត់កំលាំង លោកវរ:សេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានចុះធ្វើការស្រាវជ្រាវឈានដល់ធ្វើការឃាត់ខ្លួនឈ្មោះ ង៉ែត វល័ក្ខ នៅចំណុចខាងលើរួចបញ្ជូនមកកងរាជអាវុធហត្ថខេត្តធ្វើការសាកសួរ។
ជនសង្ស័យបានឆ្លើយសារភាពនៅមុខអាវុធហត្ថថាខ្លួនគេពិតជាបានចូលលួចទ្រព្យសម្បត្តិឈ្មោះ ហ៊ុន សម្បត្តិ ពិតប្រាកដមែន ។ បច្ចុប្បន្នជនសង្ស័យត្រូវបានអាវុធហត្ថខេត្តកសាងសំនុំរឿងបញ្ជូនទៅតុលាការដើម្បីចាត់ការតាមនិតិវិធី៕
