បាត់ដំបង ៖ ផ្ទះប្រជាពលរដ្ឋរស់នៅភូមិដាច់ស្រយ៉ាលទើបលក់ស្រូវបានលុយ១០ម៉ឺនបាត(ប្រាក់ថៃ)ហើយសងបំណុលគេខ្លះសល់លុយ៣ម៉ឺន៣ពាន់បាតត្រូវចោរ៣នាក់មានកាំភ្លើងវែងខ្លី២ដើមចូលភ្ជង់គំរាមប្លន់យកហើយគេចខ្លួនបាត់។
ហេតុការណ៍នេះកើតឡើង កាលពីម៉ោង១០និង៤៥នាទី យប់ថ្ងៃទី១៣ ខែមករាឆ្នាំ២០១៦ចំណុចព្រះស្រែ ស្ថិតនៅ ភូមិស្លាស្លាក់ ឃុំអង្លន់រុន ស្រុកថ្មគោល ខេត្តបាត់ដំបង ។
ប្រភពប្រជាពលរដ្ឋជិតខាងផ្ទះកើតហេតុ(សុំមិនបញ្ចេញឈ្មោះ)បានឲ្យដឹងនៅថ្ងៃទី១៤ខែមករា ឆ្នាំ២០១៦ថានៅយប់កើតហេតុកូនប្រុសរបស់់គាត់បានចូលរួមផឹកស៊ី ជាមិត្តភ៍ក្តិ៤ ទៅ៥នាក់ ក្នុងនោះ ក៏មានបុរសម្នាក់ឈ្មោះប៊ុនផៃអាយុ៥៦ឆ្នាំទើបចេញពីគុកបានប្រហែលជិត២ខែ(ធ្លាប់ជាប់គុកជាង១០ឆ្នាំពីបទចាប់ជំរិតឈ្មោះទាឡេង ឈ្មោះទាស៊ី ឈ្មោះទាសុង) នៅភូមិកើតហេតុជាមួយគ្នា។
លុះយប់ជ្រៅក៏មានការភ្ញាក់ផ្អើលមានចោរប្លន់ផ្ទះឈ្មោះ អោម ពត អាយុ៤២ឆ្នាំប្រពន្ធឈ្មោះ គិន សាវង្ស អាយុ៣៣ឆ្នាំ ។ ក្រោយកើតហេតុប្លន់ក៏បាត់ជនសង្ស័យឈ្មោះ ប៊ុន ផៃ ពីភូមិតែម្តង។
ជនរងគ្រោះឈ្មោះអោមពតបានឲ្យដឹងថានៅយប់កើតហេតុ នៅម៉ោង១០និង៤៥នាទី យប់ថ្ងៃទី១៣ ខែមករា ឆ្នាំ២០១៦ ពេលចូលដេក២នាក់ប្តីប្រពន្ធបានទុកប្រាក់៣ម៉ឺន៣ពាន់បាត និងប្រាក់ខ្មែរ១ម៉ឺនរៀលសល់ពីការលក់់ស្រូវនៅជិតខ្លួន បន្ទាប់មកបានឭសម្លេងមនុស្សដើរចូល ៣ នាក់មានភ្លើងពិលដកកាំភ្លើងវែង១ដើម ខ្លី១ដើម ភ្ជង់គំរាមឲ្យក្រាមចុះ ហើយសួរថា តើលុយលក់ស្រូវជាង៣ម៉ឺនបាតលាក់នៅឯណា ខណៈនោះគ្នាវាម្នាក់ទៀតឡើងរុះរើកន្លែងដេក ឃើញលុយរួចយកទៅបាត់តែម្តង ។
បច្ចុប្បន្ន កម្លាំងសមត្ថកិច្ចប្រដាប់អាវុធកំពុងសាកសួរសាកសីនិងកំណត់មុខសញ្ញាតាមចាប់ខ្លួនជនសង្ស័យយកមកផ្តន្ទាទោសតាមផ្លូវច្បាប់ ៕
សោមវីឡា
