ខេត្តសៀមរាប ៖ ប្រភពព័ត៌មានពីប្រជាពលរដ្ឋដែលរស់នៅក្បែងបនល្បែងស៊ីសងបៀរ អាប៉ោងយ៉ាងដុះស្លែ នៅភូមិចុងកៅស៊ូ និងបើកជល់មាន់នៅបារាយណ៍មានម្ចាស់ឈ្មោះ ភា លោកអធិការក្រុងសៀមរាប ទើបមានការ ភ្ញាក់ផ្អើល នៅពេលថ្មីៗនេះ ពេលអ្នកសារព័ត៌មានធ្វើការបទសម្ភាសន៍ ។
ប្រភពពីអ្នកលេងល្បែងស៊ីសង និងប្រជាពលរដ្ឋបន្តឱ្យដឹងទៀតថា ឈ្មោះ ភា បានបើកលេងល្បែង អាប៉ោងយូរឆ្នាំ មកហើយ ប្រជាពលរដ្ឋក៏មានការធុញថប់ខ្លាំងដែរ ពេលមានរឿងឈ្លោះប្រកែកគ្នាពីអ្នកលេងល្បែង និងសម្លេងហូរកញ្ច្រៀវ និងសម្លេងម៉ូតូ-ឡាន ចេញចូលរាល់ថ្ងៃយប់ ប៉ុន្តែមិនដឹងទៅប្តឹងសមត្ថកិច្ចណាទេ ព្រោះពេលរាយការណ៍ប្រាប់អស់លោក គឺវាដដែលៗ ។ ហើយបនល្បែងស៊ីសងគ្រប់ប្រភេទ ធ្វើឱ្យមានបទល្មើសផ្សេងៗទៀត កើតឡើងយ៉ាងពេញបន្ទុក ហើយអ្នក ញៀនល្បែងខ្លះចាញ់អស់ដី ផ្ទះសម្បែង អស់លុយអស់ទ្រព្យសម្បត្តិនាំឱ្យមានអំពើហិង្សាក្នុងគ្រួសារទៀតផង ។ ដោយឡែកល្បែងស៊ីសង គឺជាប្រភពនៃអសន្តិសុខ សណ្តាប់ធ្នាប់ដល់សង្គមជាតិ ព្រោះដើម្បីស្រង់ដើមអ្នកចាញ់ល្បែងខ្លះបាន ប្រព្រឹត្តអំពើចោរកម្ម លួចឆក់ប្លន់បាញ់សម្លាប់ គួរឱ្យព្រួយបារម្ភ ។
ប្រភពបន្តទៀតថា ឈ្មោះ ភា មិនត្រឹមតែបើកវង់អាប៉ោងទេ ថែមទាំងបើកសង្វៀនជល់មាន់នៅបារាយណ៍ទៀតផង ម្យ៉ាងទៀតបើមានល្បែងលេងក្រុមគ្រួសារពួកខ្ញុំដែ់រស់នៅជិតគ្នារកចំណូលបានតិចតួច ឆ្លៀតយកប្រាក់ទៅលេងចាញ់អស់រក ប្រាក់ឱ្យកូនទៅរៀនមិនបាន និងប្រាក់ទិញម្ហូបប្រចាំថ្ងៃគ្មាន ។ ដូច្នេះសូមសមត្ថកិច្ចទើបមកកាន់តំណែងថ្មី ក្នុងខេត្តសៀមរាប មេត្តាជួយបង្ក្រាបវង់ល្បែងនេះផង ។ ហើយក្នុងការពង្រឹងសន្តិសុខ សង្គមជាតិ ត្រូវគោរពគោលនយោបាយភូមិ-ឃុំ សង្កាត់ មានសុវត្ថិភាព ទាំង ៩ចំណុច របស់រដ្ឋាភិបាល ។
ពាក់ព័ន្ធវង់ល្បែងស៊ីសងរបស់ឈ្មោះ ភា ពេលអ្នកយកព័ត៌មានយើងធ្វើបទសម្ភាសន៍ លោក ទិត្យ ណារ៉ុង អធិការក្រុងសៀមរាប យោងតាមសំដីរបស់លោកបានថ្លែងប្រាប់ថា លោកកំពុងរៀបចំផែនការ និងកំពុងសហការជាមួយ កងរាជអាវុធហត្ថខេត្ត ក្រោមការចង្អុលបង្ហាញពីឯកឧត្តម អភិបាលនៃគណៈអភិបាលខេត្ត ឃឹម ប៊ុនសុង ដើម្បីចុះទៅបង្ក្រាប បនល្បែងស៊ីសងរបស់ឈ្មោះ ភា នោះហើយ ។/
ដោយៈ សុជា
