ខេត្តបន្ទាយមានជ័យ ៖ មន្ទីរសុខាភិបាលខេត្តបន្ទាយមានជ័យបានបើកកិច្ចប្រជុំដល់វេជ្ជបណ្ឌិត គ្រូពេទ្យជិត៣០០នាក់មកពីទូទាំងខេត្តបន្ទាយមានជ័យដើម្បីអបអរសាទរទិវាអភិវឌ្ឈន៍វេជ្ជសាស្ត្រឆ្នាំ២០១៥ ព្រឹកថ្ងៃទី២១ខែធ្នូឆ្នាំ២០១៥នៅសាលប្រជុំមន្ទីរសុខាភិបាលខេត្តបន្ទាយមានជ័យ។
កិច្ចប្រជុំនេះមានការចូលរួម លោកវេជ្ជបណ្ឌិត ធាគ្រុយ រដ្ឋលេខាធិការក្រសួងសុខាភិបាល លោក កែវសុភ័ត្រា ប្រធានមន្ទីរសុខាភិបាលខេត្តបន្ទាយមានជ័យ និងវេជ្ជបណ្ឌិតមកពីក្រសួងសុខាភិបាលជាច្រើននាក់ទៀត ។ លោកវេជ្ជបណ្ឌិត កែងសុភ័ត្រាបានមានប្រសាសន៍ក្នុងកិច្ចប្រជុំនោះថាលោកបានអញ្ជើញ វេជ្ជបណ្ឌិត និងគ្រូពេទ្យមកប្រជុំនេះថ្ងៃនេះគឺដើម្បីឲ្យគ្រូពេទ្យទាំងអស់ក្នុងខេត្តបន្ទាយមានជ័យបានផ្លាស់ប្តូរបទពិសោធន៍ពីគ្នាទៅវិញទៅមកហើយដើម្បីពិភាគ្សានូវប្រធានបទថ្មីៗ ឬបច្ចេកវិជ្ជាថ្មីៗក្រោមការតំរង់ទិសពីសាស្ត្រាចារ្យឯកទេសដែលមានបទពិសោធន៍ពីគ្នាទៅវិញទៅមកដើម្បីចែករំលែកដល់សហភាតរៈរបស់យើង ។
លោក កែវ សុភ័ត្រា បានបញ្ជាក់បន្តថា កិច្ចប្រជុំនេះក៏ដើម្បីពង្រឹងនូវគុណវឌ្ឈន៍របស់គ្រូពេទ្យដើម្បីឲ្យឆ្លើយតបនឹងការរីកចំរើននៃវិជ្ជាជីវះវេជ្ជសាស្ត្រការព្យាបាលជម្ងឺឲ្យប្រកបដោយប្រសិទ្ធភាពខ្ពស់និងឈានបន្តិចម្តងៗដើម្បីចូលរួមក្នុងបរិបទសមារ័ណកម្មអាស៊ាន ហើយមន្ទីរសុខាភិបាលកំពុងយកចិត្តទុកដាក់ចំពោះសេវាវេជ្ជសាស្ត្រ អមវេជ្ជសាស្ត្រជំនួយវេជ្ជសាស្ត្រឯកជនដែលកំពុងដំណើរការផងដែរ ។
ក្នុងកិច្ចប្រជុំនោះដែរ លោកវេជ្ជបណ្ឌិត ធា គ្រុយ ក៏បានមានប្រសាសន៍ដែរថា ក្រសួងសុខាភិបាលមិនអនុញ្ញាតឲ្យមានការបើកពិនិត្យព្យាបាល ដោយគ្មានច្បាប់អនុញ្ញាតចេញមកពីក្រសួងសុខាភិបាល បើមានករណីគ្រពេទ្យព្យាបាលអ្នកជម្ងឺស្លាប់គ្រូពេទ្យនោះត្រូវទទួលខុសត្រូវនិងមុខច្បាប់លោកក៏បានធ្វើការអំពាវនាវដល់វេជ្ជបណ្ឌិត លោកគ្រូពេទ្យដែលមានសញ្ញាប័ត្រជាផ្លូវការត្រូវមកចុះឈ្មោះ ក្នុងគណៈគ្រូពេទ្យដើម្បីសុំបើកសេវាព្រមទាំងបំពេញកាតព្វកិច្ចរបស់ខ្លួនក្នុងវិជ្ជាជីវះពេទ្យឲ្យបានត្រឹមត្រូវដើម្បីងាយស្រួលក្នុងការប្រកបមុខរបរជីវៈរបស់ខ្លួនទៅថ្ងៃមុខ ៕
