ខេត្តបន្ទាយមានជ័យ ៖ បុរសម្នាក់ស្រវឹងស្រាបានធ្វើសកម្មភាពដុតផ្ទះរបស់ខ្លួនឆេះម៉ត់ ដោយខឹងនិងប្រពន្ធមិនដាំបាយឲ្យហូបដោយការឆេះផ្ទះនោះមិនរៀលដាលទៅឆេះផ្ទះអ្នកដទៃនោះឡើយហើយក៏មិនបង្កឲ្យនរណាម្នាក់ទទួលរងរបួសនោះដែរ។ហេតុការណ៍នេះកើតឡើងកាលពីវេលាម៉ោង១១និង៣០នាទីព្រឹកថ្ងៃទី២៦ ខែកក្កដា ឆ្នា២០១៤ នៅចំណុចភូមិខ្លែងពណ៏ត្បូង ឃុំស្លក្រាម ស្រុកស្វាយចេក ខេត្តបន្ទាយ មានជ័យ។
លោកអនុសេនីយ៍ឯក សុង សុខុន អធិការរងនគរបាលស្រុកស្វាយចេកបានប្រាប់ឲ្យ ដឹងថា៖ជនដៃដល់ដុតផ្ទះខ្លួនឯងក្រោយពីធ្វើសកម្មភាពរួចសមត្តកិច្ចបានចុះទៅចាប់ឃាត់ខ្លួន បញ្ជូនមកកាន់អធិការដ្ឋាននគរបាលស្រុក ដើម្បីយកមកសាកសួរ និងចាត់ចែងតាមនីតិ វីធីច្បាប់។បុររសរូបនោះមានឈ្មោះ ផែន ផា អាយុ៥៩ឆ្នាំ បច្ចុប្បន្នរស់នៅភូមិឃុំខាងលើ ផ្ទះដែលឆេះធ្វើអំពីឈើប្រក់ស័ង្កសី ទំហំ៤ម៉ែត្រគុណ៧ ម៉ែត្រ។
លោកអធិការរងបានបន្តឲ្យដឹងទៀតថា៖មុនពេលកើតហេតុ បុរសជាជនដៃដល់ បាន ផឹងស្រាស្រវឹងនៅខាងក្រៅផ្ទះ លុះត្រឡប់មកផ្ទះវិញ បានរករឿងនិងធ្វើអំពើហិង្សា ទៅលើប្រពន្ធថាមិនដាំបាយឲ្យខ្លួនហូប នៅពេលនោះប្រពន្ធភ័យខ្លាំងបានរត់គេចចេញពីផ្ទះ ដែលជាហេតុធ្វើជនដៃដល់កាន់តែខឹងខ្លាំងឡើង ហើយក៏ចាក់ប្រេងម៉ាស៊ូតដែលគេយកមក ផ្ញើសម្រាប់ចាក់ត្រាកទ័រ ដុតផ្ទះខ្លួនឯងបណ្តាលឲ្យផ្ទះឆេះសន្ធោសន្ធៅឡើង ។ នៅពេលនោះ ប្រជាពលរដ្ឋអ្នកជិតខាងឃើញដូច្នេះនាំគ្នាជួយអន្តរាគមន៍ដែរប៉ុន្តែមិនអាចទប់ស្កាត់បាននោះឡើយ ផ្ទះនោះត្រូវភ្លើងឆេះអស់ទាំងស្រុងក្នុងរយៈពេលជាងកន្លះម៉ោង។ ទ្រព្យសម្បត្តិនៅក្នុង ផ្ទះរងការខូចខាត សមត្តកិច្ច ពុំទាន់ដឹងច្បាស់នៅឡើយនោះទេ ៕
