ខេត្តបន្ទាយមានជ័យ៖ កាលព្រឹកថ្ងៃទី៩ ខែធ្នូ ឆ្នាំ២០១៥លោក លី សារី អភិបាលរង ខេត្តបន្ទាយមានជ័យអញ្ជើញបើកសិក្ខាសាលាសមាហរណកម្មផែនការឃុំសង្កាត់នៅក្រុងសិរីសោភ័ណ លើកម្មវិធីវិនិយោគបីឆ្នាំរំកិល២០១៦-២០១៨។
លោក វ៉ៃ កេងលី អភិបាលរងក្រុងបានឲ្យដឹងថា សិក្ខាសាលាសមាហរណកម្ម នៃកម្មវិធីវិនិយោគបីឆ្នាំរំកិល២០១៦-២០១៨ បានរៀបចំឡើងតាមផែនការអភិវឌ្ឍន៍៥ឆ្នាំរបស់សង្កាត់និងខណ្ឌ ដែលនៅក្នុងនោះចាំបាច់ត្រូវ មានការចូលរួមគាំទ្រពីសំណាក់ អស់លោក លោកស្រី ដើម្បីឲ្យគម្រោងដែលបានរៀបចំ ឆ្លុះបញ្ចាំងពីតម្រូវការជាអាទិភាព នៅថ្នាក់មូលដ្ឋាននិងប្រើប្រាស់ធនធានឲ្យចំគោលដៅនិងអនុវត្តទៅប្រកបដោយប្រសិទ្ធភាព គោលបំណងនៃការរៀបចំ សិក្ខាសាលានេះគឺដើម្បីផ្សព្វផ្សាយគម្រោង វិនិយោគអាទិភាពបីឆ្នាំរំកិល២០១៦-២០១៨ របស់ខណ្ឌនិងផ្សព្វផ្សាយគម្រោងវិនិយោគអាទិភាព របស់សង្កាត់សម្រាប់អនុវត្តន៍ឆ្នាំ២០១៤ និងស្នើសុំការគាំទ្រពីមន្ទីរ-អង្គភាព អង្គការដៃគូរអភិវឌ្ឍន៍នានា និងសប្បុរសជនដើម្បីគាំទ្រគម្រោងរបស់ខណ្ឌនិងសង្កាត់ ។
ក្នុងនោះដែរ លោក លី សារី អភិបាលរងខេត្តបន្ទាយមានបានណែនាំដល់បណ្តាអង្គការ និងមន្ទីរពាក់ព័ន្ធនានា ត្រូវតែពិនិត្យគម្រោងអភិវឌ្ឍន៍ ថ្នាក់ខណ្ឌនិងថ្នាក់សង្កាត់ឲ្យបានច្បាស់លាស់ គឺត្រូវតែញែកចេញពីគ្នាឲ្យដាច់ថា គម្រោងណាដែលយើងត្រូវគាំទ្រថ្នាក់ក្រុង ហើយគម្រោងណាត្រូវគាំទ្រថ្នាក់សង្កាត់ ដើម្បីឲ្យគម្រោងអភិវឌ្ឍន៍ទទួលបាន ជោគជ័យ។
ចុងបញ្ចប់ អាជ្ញាធរក្រុងសូមថ្លែងអំណរគុណ យ៉ាងជ្រាលជ្រៅដល់បណ្តាអង្គការជាដៃគូ អភិវឌ្ឍន៍ មន្ទីរក្នុងការគាំទ្រ គម្រោងយ៉ាងច្រើនលើសលប់នាពេលនេះ ដើម្បីការអភិវឌ្ឍន៍នៅថ្នាក់មូលដ្ឋានបានរលូន ៕
