បាត់ដំបង ៖ លោក ង៉ោ ស៊ិតធី នាយកសាលាពេទ្យភូមិភាគបាត់ដំបងមិនបញ្ឈប់អ្នកលក់សាំងបង្កឲ្យមានការកកស្ទះចរាចរណ៍និងប្រជាពលរដ្ឋភ័យខ្លាចជួបគ្រោះអគ្គីភ័យដោយយថាហេតុ (សាលាពេទ្យភូមិភាគបាត់ដំបងចាស់) នៅផ្សារបឹងឈូកភូមិព្រែកមហាទេពសង្កាត់ស្វាយប៉ោក្រុងបាត់ដំបងសង្ស័យជួលយកលុយដាក់ហោប៉ៅខ្លួនឯង ។
ប្រជាពលរដ្ឋបានអោយដឹងនៅថ្ងៃទី៤ ខែធ្នូ ឆ្នាំ២០១៥ ថា ការលក់ដូរបន្លែឬសាំងនៅមុខ សាលាពេទ្យភូមិភាគបាត់ដំបងនៅផ្សារបឹងឈូក បង្កអោយមានការកកស្ទះចរាចរណ៍ ។ រីឯអ្នកលក់សាំងដបបានដឹកសាំងជាច្រើនប៊ីដុងតាមរថយន្តមកឈប់ចតចាំលក់ ករណីនេះ ភ័យខ្លាចមានគ្រោះអគ្គីភ័យកើតមានឡើងដោយយថាហេតុ មិនដឹងថាលោក ង៉ោ ស៊ិតធី នាយកសាលាចេញមុខដោះស្រាយឬគិតយករួចខ្លួន ព្រោះកាលពីថ្ងៃទី២៥ ខែវិច្ឆិកា ឆ្នាំ២០១៥ មានករណីផ្ទុះស្សេខ្សែភ្លើង នៅជាប់ខាងលិចសាលាពេទ្យដែរតែត្រូវបានប្រជាពលរដ្ឋ និងសមត្ថកិច្ចពន្លត់ទាន់ពេល ។ ដូច្នេះប្រជាពលរដ្ឋសំណូមពរទៅលោកនាយកសាលាពេទ្យឈប់ជួលអោយអ្នកលក់សាំងបន្តទៅទៀត ព្រោះប្រជាពលរដ្ឋរស់នៅមានការបារម្មខ្លាំង ។
ពាក់ព័ន្ធករណីនេះ លោក ង៉ោ ស៊ិតធី នាយកសាលាពេទ្យភូមិភាគបាត់ដំបងបានអោយដឹងថា ចំពោះអ្នកលក់ដូរនៅមុខ សាលាពេទ្យភូមិភាគបាត់ដំបងចាស់ មិនមានការជួលទេ ពួកគាត់សុំលក់ដូរហើយធានាសំអាតអនាម័យ ។ រីឯអ្នកលក់សាំងមិនអាចបញ្ឈប់គាត់បានទេ ជាធម្មតាអគារទុកចោល បើឲ្យគេឈប់រួចគេគង់តែមកលក់វិញដដែល ហើយបើពាក់ព័ន្ធយ៉ាងណាចាំរូបលោកសួរទៅអាជ្ញាធរសិន ៕
