បន្ទាយមានជ័យ ៖ រថយន្តក្រុងក្រុមហ៊ុនKSRVមួយគ្រឿងបានបើកទៅបុកនិងម៉ូតូ២គ្រឿងពេញទំហឹងបណ្តាលឲ្យស្លាប់២នាក់នៅនិងកន្លែងនិង២នាក់ទៀតរងរបួសធ្ងន់ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះជីវិត ។ ចំណែកអ្នកបើកបររថយន្តគេចខ្លួនបាត់ កាលវេលាម៉ោង៤ល្ងាចថ្ងៃទី ២ខែធ្នូឆ្នាំ២០១៥នៅលើកំណាត់ផ្លូវជាតិលេខ៥ត្រង់ចំណុចភូមិ អូរស្ងួត ឃុំ បន្ទាយនាង ស្រុកមង្គលបូរី ខេត្តបន្ទាយមានជ័យ។
លោកវរសេនីយ៍ត្រី រស់ សំបូ មេបញ្ជាការកងរាជអាវុធហត្ថស្រុកមង្គលបូរីបានឲ្យដឹងថា មុនពេលកើតហេតុមានឡានក្រុងរបស់ក្រុមហ៊ុនKSRVព៌ណក្រហមពាក់ស្លាកលេខភ្នំពេញ៣D១៩០២បើកបរពីជើងទៅត្បូងលុះបើកមកដល់ចំណុចកើតហេតុខាងលើក៏បានរេចង្កូតទៅបុកនិងម៉ូតូ២គ្រឿងបើកនៅខាងមុខពេញទំហឹង បណ្តាលឲ្យអ្នកបើកនិងអ្នករួមដំណើរស្លាប់២នាក់នៅនិងកន្លែងភ្លាមៗនិង២នាក់ទៀតរងរបួសធ្ងន់ក្រោយពីកើតហេតុរួចអ្នកបើកឡានក្រុងនោះចុះគេចខ្លួនបាត់ ។
លោក រស់ សំបូ បាននិយាយបន្តទៀតថា អ្នកស្លាប់និងអ្នករងរបួសនោះមានឈ្មោះធី ស្លាប់ ភេទ ស្រី អាយុ៤០ឆ្នាំ នៅភូមិ ដងរុនលិច ឃុំ បន្ទាយនាងស្រុកមង្គលបូរី បានបើកបរម៉ូតូម៉ាកហុងដា C125 ពណ៌ ខ្មៅ សេរី 2004 ពាក់ស្លាកលេខបន្ទាយមានជ័យ1F.3847បើកបរពីជើងទៅត្បូង បានឌុបគ្នា២នាក់ពីខាងក្រោយ ។ ២ ឈ្មោះ ទូច សម្បត្តិស្លាប់ ភេទ ស្រី អាយុ៦៨ឆ្នាំនៅភូមិជាមួយគ្នា ។ ៣ មានឈ្មោះ ចន រតនី ភេទ ស្រី អាយុ ១៦ឆ្នាំ របួសធ្ងន់នៅភូមិជាមួយគ្នា ។ ៤ ឈ្មោះ តឿ ពន្លឺ របួសធ្ងន់ភេទ ប្រុស អាយុ៦៧ឆ្នាំ នៅភូមិ អូរអណ្តូង ឃុំ បន្ទាយនាង បើកបរម៉ូតូម៉ាកហុងដា C100 ពណ៌ ក្រហម ពាក់ស្លាកលេខបន្ទាយមានជ័យ1D 5749 បើកបរឆ្លងថ្នល់ពីកើតទៅលិចម៉ូតូទាំង ២ គ្រឿងនោះ ត្រូវឡានក្រុងបុកតែម្តង ។ សព ២ នាក់នោះ ត្រូវបានសមិត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីចំណែកអ្នករងរបួស ត្រូវបានដឹកយកទៅមន្ទីរពេទ្យមិត្តភាពកម្ពុជា ជប៉ុន ស្រុកមង្គលបូរី ដើម្បីសង្គ្រោះជីវិតបន្ទាន់ចំណែកឡានក្រុងបង្កនិងម៉ូតូរងគ្រោះអូសយកទៅរក្សាទុកនៅអធិការដ្ឋាននគបាលស្រុកមង្គលបូរីដើម្បីចាត់ការនៅថ្ងៃក្រោយ ៕
