បាត់ដំបង ៖ បុរសម្នាក់ក្លែងខ្លួនជាក្រុមបង្ការបង្ក្រាប ត្រូវកម្លាំងនគរបាលក្រុមបង្ការបង្ក្រាបឃាត់ខ្លួនប្រគល់ជូនការិយាល័យព្រហ្មទ័ណ្ឌកំរិតស្រាលប៉ុន្តែសាច់ញាតិថាជនសង្ស័យសតិមិនគ្រប់។
ហេតុការណ៍ឃាត់ខ្លួន ខណៈជនដែលក្លែងបន្លំឯកសណ្ឋានឈុតខ្មៅ មានបំពាក់ដោយខ្នោះដៃ កាំភ្លើងខ្លីជ័រ កំពុងជិះម៉ូតូតាមដងផ្លូវមុខវិទ្យាល័យសោហឺ កាលពីព្រឹកថ្ងៃទី១ខែធ្នូឆ្នាំ២០១៥ ។
សមត្ថកិច្ចបានឲ្យដឹងថា យុវជនដែលក្លែងបន្លំជាសមត្ថកិច្ចខាងលើនេះ មានឈ្មោះ ហាក់ គឹមហាវ អាយុ២១ឆ្នាំរស់នៅភូមិ១៣មករា សង្កាត់ព្រែកព្រះស្តេច ក្រុងបាត់ដំបង ។ ដកហូតវត្ថុតាងឯកសណ្ឋានឈុតខ្មៅ មានបំពាក់ដោយខ្នោះដៃ កាំភ្លើងខ្លីជ័រ បណ្ណ័សំគាល់ខ្លួនក្លែងក្លាយ ក្នុងអង្គភាពបង្ការបង្ក្រាប និងសម្ភារៈផ្សេងៗមួយចំនួនទៀត។
ពាក់ព័ន្ធករណីខាងលើ ក្រុមគ្រួសារជនសង្ស័យបានប្រាប់សមត្ថកិច្ចថា យុវជនសង្ស័យជាមនុស្សសតិមិនគ្រប់ ។
សមត្ថកិច្ចបានបញ្ជាក់ថា រយៈកន្លងមកមានពាក្យចាមរាមថា ក្រុមបង្ការបង្ក្រាបដើរយកលុយពីបទល្មើស និងជិះម៉ូតូកៀរប្រជាពលរដ្ឋស្លូតត្រង់ និងប្រើអំណាចធ្វើបាបប្រជាពលរដ្ឋ ដោយមានករណីនេះសមត្ថកិច្ចស្រាវជ្រាវជាយូរខែ ទើបជួបជនសង្ស័យខាងលើធ្វើការឃាត់ខ្លួនតែម្តង ៕
