ខេត្តបន្ទាយមានជ័យ៖ ពលរដ្ឋខ្មែរ នៅច្រកទ្វាអន្តរជាតិប៉ោយប៉ែតនិងប្រជាពលរដ្ឋទូទៅសុំឲ្យមានភ្លេងគោរពទង់ជាតិខ្មែរឡើងវិញ ពីព្រោះពួកគាត់ខានលឺភ្លេងគោរពទង់ជាតិខ្មែរយូរណាស់មកហើយ គឺលឺតែខាងភ្លេងគោរពទង់ជាតិថៃតែប៉ុណ្ណោះ។
នៅថ្ងៃទី២៨ ខែវិច្ឆិកា ឆ្នាំ២០១៥ពលរដ្ឋជាច្រើននាក់ សំណូមពរដល់អស់លោកចៅហ្វាយក្រុង មេត្តាជួយដាក់ភ្លេងគោរពទង់ជាតិខ្មែរឡើងវិញ រយៈពេលជាងបីឆ្នាំហើយគឺភ្លេងគោរពទង់ជាតិខ្មែរ ត្រូវបានបាត់សូនឈឹងពីច្រកទ្វាអន្តរជាតិរហូតមកដល់ពេលនេះក្រោយពីមានការដោះដៃអស់ប្រធានច្រកទ្វា និងលោកប្រធានការិយាល័យប៉ូលិសអន្តោប្រវេសន៍រួចមក ខណៈពេលនេះគឺមហាជនខ្មែររាប់លាននាក់ សុំឲ្យមានការដាក់ភ្លេងគោរពទង់ជាតិលើងវិញ កុំឲ្យខ្មាសខាងថៃ ។
តាមប្រភពព័ត៌មានពីច្រកទ្វាបានឲ្យដឹងថា កន្លងទៅរាល់ម៉ោង៧ព្រឹកគឺមានការចាក់ភ្លេងចម្រៀងកំដរអារម្មណ៍លុះដល់ម៉ោង៧ ទើបគេដាក់ភ្លេងគោរពទង់ជាតិខ្មែរបន្ទាប់មក គឺគេចាក់សេចក្តីណែនាំផ្សេងៗរបស់សាលាខេត្ត រហូតដល់ម៉ោង៥ល្ងាច ទើបគេចាក់ម្តងទៀត ប្រភពដដែល បានបន្តថាកាលណោះ គឺខាងប៉ូលិសជាអ្នកទទួលខុសត្រូវលើការចាក់ភ្លេងជាតិជាប្រចាំ ឥឡូវគឺបាត់អស់ហើយ លឺតែខាងថៃតែប៉ុណ្ណោះ ដែលគេបានចាក់រាល់ថ្ងៃ ដែលមានពលរដ្ឋខ្មែរនិងថៃ នាំគ្នាឈរគោរពភ្លេងជាតិនៅលើស្ពានអន្តជាតិថៃ ជាប្រចាំនោះ ។
លោក អាន វណ្ណះ ប្រធានស្នាក់ការច្រកទ្វាអន្តជាតិខាងលើ បានឲ្យដឹងថា ក្រោយពីលោកមកធ្វើជាប្រធានស្នាក់ការ រួចមកគឺលោកមិនដែលឃើញគេគោរពទង់ជាតិ នៅឯច្រកទ្វានោះឡើយលោកបានបន្តថា លោកនឹងយកសំណើសំណូមពររបស់ពលរដ្ឋ ទៅដាក់ក្នុងអង្គប្រជុំនាពេលដ៏ខ្លីខាងមុខនេះដើម្បីជាតម្រូវការរបស់ពលរដ្ឋយើងនោះ៕
