ខេត្តបន្ទាយមានជ័យ ៖ កម្លាំងអាវុធហត្ថស្រុកមង្កលបូរីឃាត់ខ្លួន បុរសម្នាក់ចំណោមបក្ខពួក ៣ នាក់មកពីក្រុងភ្នំពេញចូលលួចកាបូបលុយក្នុងផ្សារអូរស្ងួត នៅវេលាម៉ោង១ថ្ងៃត្រង់ ថ្ងៃទី ២៣ ខែវិច្ឆិកា ឆ្នាំ២០១៥ នៅក្នុងផ្សារអូរស្ងួត ក្នុងភូមិអូរស្ងួត ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ។
លោកវរ:សេនីយ៍ត្រី រស់ សំបូរ មេបញ្ជាការមូលដ្ឋានអាវុធហត្ថស្រុកមង្គលបូរីបាននិយាយថា បុរសសង្ស័យ ដែលឃាត់ខ្លួនមានឈ្មោះសំទីនអាយុ១៧ឆ្នាំរស់នៅសង្កាត់ចោមចៅខណ្ឌពោធិសែនជ័យរាជធានីភ្នំពេញ ។
លោកបានបន្តទៀតថា មុនពេលកើតហេតុ ជនសង្ស័យមួយក្រុមបានចូលក្នុងផ្សារអូរស្ងួតចាស់ ដើម្បីធ្វើសកម្មភាព លួចលុះមានឱកាសល្អចោរនោះបានចូលលួចកាបូបលុយរបស់ជនរងគ្រោះឈ្មោះ ស៊ុយ ប៊ុនលី ភេទប្រុស អាយុ ៣៥ឆ្នាំ ក្នុងកាបូបនោះមានលុយចំនួន ១០០.០០០ បាត(ដប់ម៉ឺនបាត) និង៧០០ដុល្លា។
ក្រោយពេលឃាត់ខ្លូន ជនសង្ស័យបានសារភាពថា ខ្លួនមានបក្សពួកបីនាក់មកពីភ្នំពេញ បានចូលធ្វើសកម្មភាពចូលលួចលុយក្នុងផ្សារអូរស្ងួត តែសំណាងអាក្រក់ត្រូវអាវុធហត្ថឃាត់ខ្លួនបានម្នាក់ចំណែក ២ នាក់ទៀតរត់គេចខ្លួនបាត់ កំលាំងអាវុធហត្ថកំពុងតាមស្វែងរកចាប់ខ្លួនបន្ត ចំណែកកាបូបលុយនិងលុយបានប្រគល់ជូនម្ចាស់ដើមវិញហើយ ។
ចំណែកជនសង្ស័យអាវុធហត្ថខេត្តកំពុងកសាងសំណុំរឿងបញ្ជូនទៅតុលាការខេត្តដើម្បីចាត់ការទៅតាមផ្លូវច្បាប់ ៕
