បាត់ដំបង ៖ មន្ត្រីយោធាម្នាក់រថក្រោះកងទ័ពជើងគោកប្រើអាវុធខុសច្បាប់ម្តងហើយម្តងទៀត ត្រូវនគរបាលខេត្តចាប់អប់រំ ដោយសារតែបាញ់បោះសេរី ណែនាំហើយមិនរាងចាល នៅវេលាម៉ោង១០និង៤៥នាទីយប់ថ្ងៃទី២២ ខែវិច្ឆិកា ឆ្នាំ២០១៥ បានបាញ់នៅបន្ទប់ខារ៉ាអូខេព្រីនសេស ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ម្តងទៀត ដោយគេយកឡេសថាបាត់ទូរស័ព្ទដៃ១គ្រឿងត្រូវនគរបាលវាយជាប់ខ្នោះបញ្ជូនទៅតុលាការ។
ប្រភពពីមេកានិងសន្តិសុខ ខារ៉ាអូខេព្រីនសេស បានអោយដឹងថា ប្រហែល៤ថ្ងៃមុនមន្ត្រីយោធាខាងលើ បានមកច្រៀង ខារ៉ាអូខេ ព្រីនសេស រួចដកកាំភ្លើងខ្លីកំញើញស្រីៗ នៅក្នុងបន្ទប់ដោយអត់លុយអោយថ្លៃច្រៀង ត្រូវបានសមត្ថកិច្ចនៃស្នងការដ្ឋាននគរបាលខេត្តឃាត់ខ្លួនម្ដងយកទៅធ្វើការអប់រំ ធ្វើកិច្ចសន្យាហើយក៏ប្រគល់កាំភ្លើងឲ្យត្រឡប់ទៅវិញ។
ប៉ុន្តែនៅម៉ោង១០និង៤៥នាទីយប់ថ្ងៃទី២២ ខែវិច្ឆិកា ឆ្នាំ២០១៥យោធាម្នាក់ខាងលើនិងអ្នករួមដំណើរ២នាក់បានមកក្លឹប ខារ៉ាអូខេព្រីនសេសម្តងទៀត យោធាម្នាក់ខាងលើផឹកស្រាស្រវឹង បានចេញចូលបន្ទប់ចុះឡើងក្នុងពេលកំពុងច្រៀងខារ៉ាអូខេក៏រករឿងថា បាត់ទូរស័ព្ទដៃអាយហ្វូន៥១គ្រឿង នៅក្នុងបន្ទប់ដែលមានលេខ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីចែកអោយ បន្ទាប់មកមន្ត្រីយោធារូបនេះ បានបាញ់គំរាមចំនួន១គ្រាប់ ទៅនឹងជញ្ជាំងខារ៉ាអូខេ បណ្ដាលឲ្យមានការភ្ញាក់ផ្អើលយ៉ាងខ្លាំង ហើយស្រីខារ៉ាអូខេម្នាក់ក៏បានសន្លប់ផងដែរ មួយសន្ទុះក្រោយមកទើបសមត្ថកិច្ចចម្រុះចុះមកអន្តរាគមន៍ ជនសង្ស័យត្រូវនគរបាលឃាត់់ខ្លួនយកទៅស្នងការដ្ឋាននគរបាលខេត្ត។
ប្រភពពីសមត្ថកិច្ចនគរបាលបានឲ្យដឹងថា មន្ត្រីយោធាដែលបាញ់បោះសេរីមានឈ្មោះ រ័ត្ន សេរីបញ្ញា អាយុ៣៥ឆ្នាំ បម្រើការនៅបញ្ជាការដ្ឋានរថក្រោះ កងទ័ពជើងគោក ឋានន្តរស័ក្ត៤ កាន់ផ្នែកហិរញ្ញវត្ថុ ប្រចាំការនៅភ្នំតូច ស្រុកបាណន់ ខេត្តបាត់ដំបង ។ ដកហូតបានកាំភ្លើងខ្លីម៉ាកCF98(ឡុកចិន)១គ្រឿងទូរស័ព្ទអាយហ្វូន៦មួយគ្រឿង គ្រាប់កាំភ្លើង១៤គ្រាប់និងសំបកគ្រាប់់ចំនួន១ផងដែរ។ប៉ុន្តែមនុស្ស២នាក់ទៀតជាកម្មករសំណង់ក្នុងបន្ទាយរថក្រោះរួមដំណើរមិនមានពាក់ព័ន្ធនោះទេ។
ជនសង្ស័យឈ្មោះ រ័ត្ន សេរីបញ្ញា បានសារភាពថា ខ្លួនពិតជាបានបាញ់នៅបន្ទប់ខារ៉ាអូខេព្រីនសេសប្រាកដមែន ដោយសារតែបាត់ទូរស័ព្ទអាយហ្វូន៥មួយគ្រឿង ដែលមានលេខសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីចែកអោយ លេខទូរស័ព្ទនោះហៅចេញមិនគិតលុយ(ហ្រ៊ី១ខែ៣០ដុល្លា)។
ពាក់ព័ន្ធករណីនេះ លោក ស ថេត ស្នងការនគរបាលខេត្តបាត់ដំបងបានអោយដឹងនៅម៉ោង១១ព្រឹក ថ្ងៃទី២៣ ខែវិច្ឆិកា ឆ្នាំ២០១៥ថា ជនសង្ស័យបង្កការបាញ់បោះសេរី ត្រូវបានការិយាល័យជំនាញកសាងសំណុំរឿងបញ្ជូនទៅតុលាកាចាត់ការតាមនិតិវិធី។
លោក ទុយ ណារ៉ុង ប្រធានការិយាល័យទេសចរណបានអោយដឹងថា ពាក់់ព័ន្ធមានករណីបាញ់បោះសេរីនៅក្លឹបកំសាន្តខារ៉ាអូខេព្រីនសេស លោកមិនទាន់ទទួលព័ត៌មាននៅឡើយ ប៉ុន្តែបទបញ្ជាហាមមិនឲ្យយកគ្រឿងផ្ទុះចូលហាមមិនឲ្យប្រើប្រាស់គ្រឿងញៀន ហាមជួញដូរផ្លូវភេទ ហាមបង្ករំខានដោយសម្លេងដល់អ្នកជិតខាង ហើយបើមានអ្នកជិតខាងប្តឹងមក ការិយាល័យទេសចរណ៍ដោយលាយលាក់ជាអក្សរ រូបលោកនិងខាងមន្ទីរទេសចរណ៍អាចចុះទៅបិតផ្អាកអាជីវកម្មហាងឬក្លឹបកំសាន្តជាបណ្តោះអសន្ន ៕
