ខេត្តបន្ទាយមានជ័យ៖ មន្ត្រីរាជការក្រុងប៉ោយប៉ែត រៀបចំកែលំអក្រុង លើ ចំណាត់ការ បញ្ហាអនាម័យ និងសោភ័ណភាព បង្គោលភ្លើង ប្រព័ន្ធប្រឡាយនិងលូទឹកដើម្បីសោភ័ណភាព ក្រុងនិងសុខភាពប្រជាពលរដ្ឋ កាលរសៀលថ្ងៃទី១៩ ខែវិច្ឆិកា ឆ្នាំ២០១៥ ។
ក្រុមការងារសង្កាត់ផ្សារកណ្តាល ដឹកនាំដោយលោក គាត ហ៊ុល ចៅសង្កាត់បានបើកយុទ្ធនាការ រៀបចំសណ្តាប់ធ្នាប់ និងបោសសំអាតបរិស្ថាន តាមដងផ្លូវជាតិលេខ៥ ក្នុងដែនសមត្ថកិច្ចរបស់ខ្លួន ដោយឡែក សង្កាត់ប៉ោយប៉ែត ក៏បានដឹកនាំក្រុមការងាររបស់ខ្លួន ចុះជីករណ្តៅដាំបង្គោលភ្លើងថ្មី តាមផ្លូវជាតិលេខ៥ ចាប់ពីចំណុចរង្វង់មូល ដល់ផ្សារកណ្តាល ដើម្បីកែលម្អសោភ័ណភាព ក្រុងបន្ថែមទៀត ដែលតាមគម្រោង អាចនឹងរួចនៅមុនថ្ងៃបុណ្យឆ្លងឆ្នាំខាងមុខ ។
លោក ង៉ោ ម៉េងជ្រួន អភិបាល ក្រុងប៉ោយប៉ែត បានថ្លែងឲ្យដឹងថា បញ្ហាកែប្រែប្រព័ន្ធបង្គោលលម្អ តាមបណ្តាផ្លូវជាតិលេខ៥ តាមផ្លូវបេតុងតូចធំ ជុំវិញក្រុង គឺត្រូវកែលម្អថ្មី ដោយបំពាក់ប្រព័ន្ធអំពូលទំនើប ភ្លឺខ្លាំងជាងមុន និងដាក់បង្គោលស្អាតរឹងមាំ ចំណែកបង្គោលថ្មី និងអំពូលថ្មី ដោយការចូលរួម ថវិការដ្ឋបាលសប្បុរសជនជុំវិញក្រុង ជាពិសេសនោះក្រុមហ៊ុនអានកូ បានជួយឧបត្ថម្ភធំតែម្តង សណ្តាប់ធ្នាប់តាមដងផ្លូវកាត់សំយ៉ាប និងស្លាកយីហោទាំងឡាយណា ដែលរំលោភចូលផ្លូវសាធារណៈ ជាពិសេសផ្លូវជាតិលេខ៥ គឺត្រូវកាត់ចោលជាកំហិត ប្រសិនជនពលរដ្ឋ មិនស្តាប់ការណែរបស់រដ្ឋបាលក្រុង សង្កាត់នោះទេ នឹងចាត់ការទៅតាមនីតិវិធីច្បាប់ជាធរមាន ៕
