ខេត្តបាត់ដំបង៖ មន្ត្រីយោធាម្នាក់ ជាមេបញ្ជារការរងគ២ ឈរជើងនៅចំណុចភ្នំកេះនៃរវៈ៥៣៤ បានលួចបាញ់សម្លាប់យោធាម្នាក់ទៀតនៅវរៈ៥៣៣ចំណុះកងពល៥៣ដូចគ្នាដោយរឿងស្នេហាត្រីកោណ។
ជនសង្ស័យត្រូវកម្លាំងនគរបាលខេត្តនិងស្រុកកំរៀងស្រុកភ្នំព្រឹកស្រាវជ្រាវឃាត់ខ្លួនកាលរសៀលថ្ងៃទី១៨ខែវិច្ឆិកាឆ្នាំ២០១៥នៅភូមិកំប្រ៉ង់ឃុំតាក្រីស្រុកកំរៀងខេត្តបាត់ដំបង។
គួររំលឹកដែរថា ៖ កាលពីរវេលាម៉ោង១៨និង៤០នាទី ថ្ងៃទី១៤ ខែវិច្ឆិកា ឆ្នាំ២០១៥ នៅចំណុចក្រោយស្នាក់ការភូមិភ្នំប្រាំពីរ ស្ថិតក្នុង ភូមិ ភ្នំប្រាំពីរ ឃុំ បួរ ស្រុក ភ្នំព្រឹក មានករណីឃាតកម្មកើតឡើងដោយមានជនមិនស្គាល់អត្តសញ្ញាណបានប្រើប្រាស់អាវុធខ្លី មិនស្គាល់ម៉ាក ចូលទៅលបធ្វើសកម្មភាពបាញ់ចំនួន ០១គ្រាប់ ទៅលើជនរងគ្រោះ ចំក្បាលពីក្រោយផ្នែកខាងស្តាំ ធ្លុះទៅក្រោមត្រចៀកខាងឆ្វេង និងធ្លុះពីកំភួនដៃទៅកែងដៃឆ្វេង បណ្តាលអោយជនរងគ្រោះស្លាប់នៅនិងកន្លែងកើតហេតុ ។
ជនរងគ្រោះឈ្មោះលី ឈនឈុន ភេទ ប្រុស អាយុ ៤៧ឆ្នាំ ប្រពន្ធជនរងគ្រោះឈ្មោះ សឿន ស៊ីវន អាយុ ៣៧ឆ្នាំ មានកូន៣នាក់ ស្រី១នាក់ មានទីលំនៅ ភូមិ ឃុំកើតហេតុខាងលើ ។ពេលកើតហេតុ ប្រពន្ធ និងកូនជនរងគ្រោះមិននៅផ្ទះទេ។
លោក ជេត វណ្ណនី ស្នងការរងកណ្តាលយុត្តិធម៌នៃស្នងការដ្ឋាននគរបាលខេត្តបាត់ដំបងបានអោយដឹងនៅរសៀលថ្ងៃទី១៩ខែវិច្ឆិកាឆ្នាំ២០១៥ថា ជនសង្ស័យដែលឃាត់ខ្លួនមាន ឈ្មោះ នី.នឿន ភេទប្រុស អាយុ៥១ឆ្នាំ មានមុខងារជា មេបញ្ជារការរងគ២ ឈរជើងនៅចំណុចភ្នំកេះនៃរវៈ៥៣៤ចំណុះកងពលថ្មើជើងលេខ៥៣។
ក្រោយពីកើតហេតុ ថ្ងៃទី១៤ខែវិច្ឆិកាឆ្នាំ២០១៥នៅចំណុចក្រោយស្នាក់ការភូមិភ្នំប្រាំពីរ ស្ថិតក្នុង ភូមិ ភ្នំប្រាំពីរ ឃុំ បួរ ស្រុក ភ្នំព្រឹកកម្លាំងសមត្ថកិច្ចចម្រុះខិតខំស្រាវជ្រាវកំណត់មុខសញ្ញា ក្រោយពីដឹងថា ឃាតកជាយោធាដូចគ្នាក៏សហការជាមូយលោកជាភួងភារម្យមេបញ្ជាការកងពលថ្មើរជើងលេខ៥៣និងស្នើរយោបល់លោកសថេតស្នងការនិងលោកនួនសានព្រះរាជអជ្ញាអមសាលាដំបូងខេត្តបាតដំបងនាំខ្លួនជនសង្ស័យ ឈ្មោះ នី.នឿន នាំ មកកាន់អធិការដ្ឋាននគបាលស្រុកភ្នំព្រឹក ដើម្បីធ្វើការសាកសួរ ។
ជនសង្ស័យដែលជាឃាតក បានសារភាពនៅចំពោះមុខសមត្ថកិច្ចជំនាញថា ខ្លួនពិតជាបានប្រើអាវុធខ្លីបាញ់សម្លាប់ជនរងគ្រោះមែន មូលហេតុជនរងគ្រោះទាក់ទងជាមួយស្រីកំណាន់របស់ខ្លួន។
បច្ចុប្បន្នជន សង្ស័យខាងលើសមត្ថកិច្ចជំនាញកំពុងកសាងសំណុំរឿងទៅស្នងការដ្ឋាននគរបាខេត្តចាត់ការបន្តទៅតុលាការ ដើម្បីចាត់ការតាមនិតិវិធី៕
