ខេត្តបន្ទាយមានជ័យ៖ កម្លាំងនគរបាល ខេត្តបន្ទាយមានជ័យស្រាវជ្រាវឃាត់ខ្លួន ក្រុមក្មេងទំនើងប្រុសស្រី៩នាក់ប្រើដាវសាម៉ូរ៉ៃកាប់ យុវជន២នាក់់ដាច់ដៃ ពេលចេញពីក្លឹបហ្គោលថោន ហើយរត់គេចខ្លួនអស់ពេលជាច្រើនថ្ងៃ។ ហេតុការណ៍ឃាត់ខ្លួនធ្វើឡើង កាលពីថ្ងៃទី១០ ខែវិច្ឆិកា ឆ្នាំ២០១៥ សង្កាត់ព្រះពន្លា ក្រុងសិរីសោភ័ណនិងស្រុកមង្គលបូរី ខេត្តបន្ទាយមានជ័យ។
គួររំលឹកផងដែរ៖ កាលពីយប់ថ្ងៃទី៣០ ខែតុលា ឆ្នាំ២០១៥ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យយុវជន២នាក់់ ចេញពីក្លឹបហ្គោលថោនត្រូវ ក្រុមក្មេងទំនើងមួយក្រុមកាប់ដាច់ដៃម្នាក់ និងបែកក្បាលម្នាក់របួសធ្ងន់ហើយក្រុមជនសង្ស័យគេចខ្លួនបាត់ ។
ប្រភពពីសមត្ថកិច្ចបានអោយដឹងថា យុវជនរងគ្រោះទាំង២នាក់ មានទី១-ឈ្មោះ កេង ឡៃស៊ីម អាយុ១៨ឆ្នាំ រងការដាច់ដៃ រស់នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណទី២-ឈ្មោះ វ៉េង ឡុង អាយុ២១ឆ្នាំ រងរបួសបែកក្បាល រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ។
លោក សិទ្ធ ឡោះ ស្នងការរងកណ្តាលយុត្តិធម៌ខេត្តបន្ទាយមានជ័យបានអោយដឹងថា ក្រុមក្មេងទំនើងដែលកាប់ជនរងគ្រោះរួចគេចខ្លួន សមត្ថកិច្ចស្រាវជ្រាវឃាត់ខ្លួនបានប្រុសស្រី៩នាក់ មានទី១ឈ្មោះ សេង ស៊ីណូ ភេទប្រុសអាយុ១៧ឆ្នាំ អ្នកកាន់ដាវសាម៉ូរ៉ៃធំកាប់ ទី២ ឈ្មោះ សែ តាបហេង ភេទប្រុសអាយុ១៩ឆ្នាំ អ្នកកាន់ដាវសាម៉ូរ៉ៃតូចកាប់ ទី៣ ឈ្មោះ ស៊ុន ចាន់ដេត ភេទប្រុសអាយុ១៧ឆ្នាំ ទី៤ឈ្មោះ សុវណ្ណាណន់ ធានីន ភេទប្រុសអាយុ១៥ឆ្នាំ ទី៥ ដាវ វណ្ណឌី ភេទប្រុសអាយុ១៦ឆ្នាំ ទី៦ឈ្មោះ នឹម ភួយ ភេទប្រុសអាយុ១៦ឆ្នាំ ទី៧ ឈ្មោះ យូ ស្រីនិច្ច ហៅ និច្ចតូច ភេទស្រីអាយុ១៨ឆ្នាំ ទាំង៧នាក់រស់នៅស្រុកមង្គលបូរីខេត្តបន្ទាយមានជ័យ ។ ទី៨ ឈ្មោះ ជៀន ស្រីនិច្ច ភេទស្រីហៅ និច្ចធំ អាយុ១៦ឆ្នាំ និងទី៩ ឈ្មោះ ជី ស្រីឡាយ ហៅ មុំ ភេទស្រីអាយុ១៧ឆ្នាំ រស់នៅក្រុងសិរីសោភ័ណខេត្តបន្ទាយមានជ័យ ។ វត្ថុតាងដកហូតបានមានដាវសាម៉ូរ៉ៃចំនួន២ផងដែរ។
បច្ចុប្បន្ន សមត្ថកិច្ចនគរបាលកំពុងរៀបចំកសាងសំណុំរឿងបញ្ចូនខ្លួនជនសង្ស័យទាំង៩នាក់ និងវត្ថុតាងទៅតុលាកាចាត់ការតាមនិតិវិធី ៕
